بسم اللہ الرحمن الرحیم
گذشتہ سے پیوستہ

یوں تو ہمارے معاشرے میں کئی گروہوں کو شدت پسندی کا بخار چڑھا ہوا ہے اور وہ اپنی آخری حدوں کو چھو رہے لیکن اس تحریر میں دو ایسی سوچ رکھنے والے گروہوں کی بات کرتے ہیں جو اپنی شدت پسندی کی وجہ سے مذہب، معاشرے اور انسانیت کو بہت نقصان پہنچا رہے ہیں۔

کچھ لوگ جہاد کے معاملے میں ایسے شدت پسند بنے ہوئے ہیں کہ ایک طرف ہر جائز و ناجائز حرکت کو جہاد میں شامل کر کے جہاد کو بدنام کر رہے ہیں اور دوسری طرف روشن خیالی کی مخالفت میں عورت کی آزادی ختم کرتے ہوئے عورت کو کال کوٹھری میں ڈالنے کے نعرے لگاتے ہیں۔ اسی گروہ کی مخالفت میں ”میڈم“ کا لشکر میدان میں ہے جو عورت کی آزادی کے لئے ایسا شدت پسند بنا ہوا کہ عورت کو سرِبازار نیلام کرنے پر آ گیا ہے اور مخالفت میں جہاد جیسے اہم فریضہ کو بدنام کر رہا ہے۔

غور کرنے کی بات تو یہ ہے کہ ”مذہبی شدت پسند“ اور ”روشن خیال شدت پسند“ یعنی میڈم کا لشکر، دونوں ہی اپنی اپنی شدت پسندی کی وجہ سے انسانیت، مذہب اور معاشرے کو نقصان پہنچا رہے ہیں۔ نہ ”مذہبی شدت پسندوں“ کا مذہب کو فائدہ ہو رہا ہے اور نہ ہی ”روشن خیال شدت پسندوں“ کا روشن خیالی کو فائدہ ہو رہا ہے۔ الٹا ان کی سوچ اور عمل سے اس کو نقصان ہو رہا ہے جن کا نام لے کر یہ شدت پسند بنے ہوئے ہیں۔ ان حالات میں کسی کو تو آگے بڑھنا ہو گا اور اسلام کی درست تعریف کرتے ہوئے ان دونوں گروہوں کو بتانا ہو گا کہ اسلام تاریکیوں سے نکال کر روشنی کی طرف لاتا ہے۔ اسلام ایک روشن خیال مذہب ہے۔ کسی کو تو ان دونوں گروہوں کو سمجھانا ہو گا۔ کوئی تو مردِ مومن اٹھے اور ان دونوں گروہوں کا قبلہ درست کروائے۔

مجھے رونا آتا ہے، جب روشن خیالی اور مذہب کو ہی مذہب کے نام پر بدنام کیا جاتا ہے۔ ہمارے نبیﷺ کی سنتوں کو کیسے یہ لوگ بدنام کر رہے ہیں کہ اب داڑھی سے لوگوں کو ڈر آتا ہے اور جس نبیﷺ نے عورت کو معاشرے میں بہت بڑا مقام دیا آج اسی نبیﷺ کے ماننے والے عورت کو قید کرنا چاہتے ہیں۔
میرا دل تب بھی دکھتا ہے جب ”میڈمی لشکر“ مذہب اور روشن خیالی کو ہی روشن خیالی کے نام پر بدنام کرتے ہیں۔ جس مذہب نے مرد کو حکم دیا کہ تم چاہے جانوں کے نذرانے دو لیکن عورت کی حفاظت کرو اور اسے حقوق دو لیکن آج یہ لوگ اسی مذہب کو بدنام کر رہے ہیں۔ جس مذہب کی روشن خیالی نے عورت کو لونڈی سے ملکہ بنا دیا۔ آج یہ ”میڈمی لشکر“ عورت کو ملکہ سے پھر سربازار نیلام کررہا ہے۔

کوئی تو ان شدت پسند گروہوں (مذہبی+روشن خیال)کو سمجھائے کہ اسلام بہت روشن خیال مذہب ہے۔ کوئی تو انہیں بتائے کہ بے گناہ انسان کو مارنا جہاد نہیں بلکہ ظالم سے ٹکرانے کو جہاد کہتے ہیں۔ انسانیت کی فلاح اور انسانیت کے دفاع کے لئے لڑنے کو جہاد کہتے ہیں۔ کوئی تو قدم بڑھائے اور ان کا دماغ روشن کرے اور اسلامی تعلیمات کا بتائے کہ اسلام عورت کو ملکہ بناتا ہے۔ ہے کوئی جو میانہ روی کا بتائے اور حق کی صدا لگائے۔۔۔

کاش کہ ہم ان شدت پسندوں کے جھرمٹ سے نکلیں اور میانہ روی پر عمل کریں۔ کبھی کبھی مجھے لگتا ہے کہ مذہب اور روشن خیالی کی غلط تعریف بھی دشمن نے پھیلائی ہے۔ یہ ”مذہبی شدت پسند“ اور ”روشن خیال شدت پسند“ دونوں گروہ ہی دشمن کے ایجنٹ ہیں اور ان کا مقصد صرف اور صرف غلط تاثر دیتے ہوئے مذہب اور روشن خیالی کو ایک دوسرے سے جدا کرنا ہے تاکہ ہم لوگ جس طرف رغبت رکھتے ہیں بس اسی کے ہو کر رہ جائیں اور دوسرے کو سرے سے ہی غلط سمجھ بیٹھیں۔ جو لوگ عبادات کی طرف رغبت رکھتے ہیں وہ صرف عبادات میں ہی جھگڑے رہیں، جو جہاد کی طرف رغبت رکھتے ہیں وہ صرف ادھر لگے رہیں اور جو لوگ معاشرے کی فلاح چاہتے ہیں انہیں روشن خیالی کا ٹھیکہ دے دو۔ یوں پوری قوم بکھر کر رہ جائے اور اپنے اپنے کاموں میں شدت پسندی اختیار کرتے ہوئے صرف اپنے کام اور سوچ کو ہی درست سمجھے اور ایک دوسرے کی دشمن بن جائے۔ چاہے یہ دشمن کی سازش ہے یا ہماری خود کی خرابی ہے۔ جو بھی ہو لیکن ہمیں اس سے نجات حاصل کرنا ہو گی۔ یہ نہیں کہ ہمارے معاشرے میں صرف یہ دو گروہ ہی شدت پسند ہیں بلکہ اور کئی گروہ ہیں جن کو شدت پسندی کا بخار چڑھا ہوا ہے۔ ہمیں ہر قسم کی شدت پسندی کو روکنا ہو گا۔

نوٹ:- میں کسی خاص گروہ کو نشانہ نہیں بنا رہا بلکہ میں ہر اس بندے کی بات کر رہا ہوں جو اس مذہبی و روشن خیال جیسی شدت پسندی میں ڈوب رہا ہے۔

اگلا اور آخری حصہ:- ہماری ضرورتیں اور شدت پسندی