خیر جتنا کچھ میرے علم میں ہے اس کے مطابق جواب اور وضاحت کر دیتا ہوں۔ ”موجودہ دور میں اردو زبان“ والی تحریر کی باتیں نیلے رنگ میں درج ہیں اور ساتھ میری طرف سے کچھ وضاحت پیش خدمت ہے۔

ابھی تک ونڈوز اردو زبان میں دستیاب نہیں ہے۔
کوئی بھی کمپنی، کوئی بھی چیز منافع کمانے کے لئے بناتی ہے۔ اگر ونڈوز اردو زبان میں موجود نہیں تو اس میں مائیکروسافٹ کا کوئی قصور نہیں کیونکہ وہ تب ہی ونڈوز اردو میں بنائیں گے، جب اردو والے خود ایسی چیز خریدنا پسند فرمائیں گے۔ یہاں حال ایسا ہے کہ چوری کی ونڈوز تیس چالیس روپے میں حاصل کی جاتی ہے اور پھر اس چوری شدہ ونڈوز کو استعمال کرتے ہوئے مذہب کی تبلیغ کی جاتی ہے۔ آج پاکستانی جو ونڈوز استعمال کر رہے ہیں وہ اصلی ونڈوز پر منتقل ہونے کی مائیکروسافٹ کو گارنٹی دیں اور اردو ونڈوز کا کہیں تو پھر دیکھیں مائیکروسافٹ ونڈوز اردو میں بناتی ہے یا نہیں۔ اور تو اور مائیکروسافٹ خود کسی اچھے پاکستانی ادارے کو پیسے دے کر انگریزی کا اردو میں بہتر سے بہتر ترجمہ کروا لے گی۔

ٹوٹی پھوٹی سی اردو آپ آفس یا ایکسپلورر میں دیکھ سکتے ہیں جو کہ ایسے لکھی گئی ہوتی ہے کہ پڑھتے ہوئے سر میں درد ہوتا ہے۔
پتہ نہیں یہ کس ”اردو“ کی بات کر رہے ہیں۔ ہماری اردو نہ تو ٹوٹی پھوٹی ہوتی ہے اور نہ ہی ہمیں پڑھتے ہوئے سر میں درد ہوتا ہے، بلکہ ہماری اردو مکمل نستعلیق رسم الخط میں ہے اور ہمیں پڑھتے ہوئے خوشی ہوتی ہے۔

پہلے مرحلے میں فاسٹ فاؤنڈیشن کے CRULP کو بھی کچھ گرانٹ دی گئی جس نے اردو فونٹس اور کی بورڈ وغیرہ پر کچھ کام کیا ہے۔ (فاسٹ کے لیے پاکستانی قوم ہمیشہ آغا حسن عابدی اور بی سی سی آئی کی مشکور رہے گی کہ اکیلے اس ادارے نے پاکستان میں کمپیوٹر کی ترقی کے لیے جتنا کام کیا ہے، باقی سب نے مل کر بھی نہیں کیا ہو گا۔)
اس میں کوئی شک نہیں کرلپ نے اردو کے لئے کام کیا ہے اور میں ذاتی طور پر خود اس ادارے کا مشکور ہوں۔ لیکن شاید آپ بھول رہے ہیں کہ کرلپ کے فانٹس سے پہلے بھی یونیکوڈ فانٹس بن چکے تھے اور کرلپ کا اردو کیبورڈ لے آؤٹ، مائیکروسافٹ کیبورڈ لے آؤٹ کریئٹر ریلیز ہونے کے بعد بنا۔ مائیکروسافٹ کیبورڈ لے آؤٹ کریئٹر سے لے آؤٹ بنانا کوئی ”راکٹ سائنس“ نہیں بلکہ یہ بچوں کا کھیل ہے۔ آپ بات کرتے ہیں کہ کرلپ نے پاکستان میں کمپیوٹر (اردو) کی ترقی کے لئے جتنا کام کیا ہے، باقی سب نے مل کر بھی نہیں کیا ہوگا، تو حضرت عرض ہے کہ ہم کرلپ کے مشکور ہیں لیکن یہاں آپ غلطی کر گئے ہیں۔ شاید آپ نے اردو محفل، القلم، شاکرالقادری، نبیل نقوی، زکریا اجمل اور امجد علوی وغیرہ وغیرہ کا نام نہیں سنا۔ کرلپ نے تو پھر بھی گرانٹ لے کر دو چار فانٹ بنائے لیکن یہاں تو لوگ گرانٹ نہیں بلکہ الٹا اپنی جیب سے خرچ کر کے، اپنا قیمتی وقت اردو کی خدمت میں لگا کر اردو فانٹس سرور تک بنائے بیٹھے ہیں جہاں آپ کو رنگا رنگ یونیکوڈ اردو فانٹس ملیں گے۔ ٹھیک ہے کرلپ نے کام کیا ہے لیکن یہ بات میں پورے وثوق کے ساتھ کہہ سکتا ہوں کہ کرلپ کا کام باقی اردو کے لئے کام کرنے کے مقابلے میں کچھ بھی نہیں۔ شاید کئی دوستوں کو میری اس بات پر حیرانگی ہو لیکن دوستو! باقی لوگوں کو چھوڑو صرف کبھی اردو محفل کے کام پر نظر ڈالیے گا تو خود اندازہ ہو جائے گا کہ چند لوگ، ایک گرانٹ لے کر کام کرنے والے ادارے کی نسبت کیا کیا کر چکے ہیں اور کیا کر رہے ہیں۔ لوگ مانیں یا نہ مانیں لیکن یہ اردو بلاگنگ، اردو فورمز اور زیادہ تر اردو ویب سائیٹ اور باقی سب کچھ جہاں آج کھڑا ہے اس سب کے پیچھے بالواسطہ یا بلا واسطہ اردو محفل ہی ہے۔ آپ کو بتاتا چلوں کہ بندہ ناچیز (م بلال م) بھی آج تک جو کچھ کر سکا ہے اس کا زیادہ حصہ اردو محفل کی ہی بدولت ہے۔ بھائی لوگو! آخر تحقیقی مباحثے بھی کوئی چیز ہیں۔ اردو کمپیوٹنگ پر ایسی تحقیق اور باتیں ہمیں سوائے اردو محفل کے کسی ادارے کے پاس نہیں ملتیں۔ یونیکوڈ اردو کے بے شمار مسائل کے حل اردو محفل نے ہی دریافت کیے۔ ڈیٹابیس سے لے کر اردو ویب بیج بنانے، وی بلیٹن، پی ایچ پی بی بی، جملہ، دروپل، ورڈپریس اور کئی چیزوں کی اردو میں تحقیق، تراجم، انسٹال کرنے کا طریقہ اردو میں اور پھر مدد اردو محفل ہی نے دی اور ابھی تک دے رہی ہے۔ اردو محفل کے مزید کارنامے بتانے شروع کیے تو عام تحریر نہیں بلکہ پوری کتاب لکھنی پڑ جائے گی۔ خلاصہ یہ کہ میری نظر میں فی الحال اردو محفل کا کوئی ثانی نہیں۔

انڈیا نے تقریباً 1982 میں ہندی زبانوں کو کمپیوٹر پر استعمال کرنے کے لیے ایک اچھا سٹینڈرڈ بنا لیا تھا۔ ہم نے رو پیٹ کر 2000 کے بھی کافی بعد ایسا کیا۔ لیکن اردو کیونکہ کمپیوٹر پر ایک یتیم زبان ہے، اس لیے اس کوبھی کوئی نہیں پوچھتا۔
محترم مجھے اس بات کی سمجھ نہیں آئی کہ آپ ”اچھا سٹینڈرڈ“ کس چیز کو کہہ رہے ہیں؟ مجھے انڈیا کا تو پتہ نہیں لیکن اردو کا نوری نستعلیق فانٹ بھی تقریباً 1980ء کے آس پاس تیار ہو چکا تھا۔ 1982ء تک سات آٹھ ایسے پبلشنگ ادارے وجود میں آ چکے تھے جو نوری نستعلیق میں کتابت کرتے تھے۔ باقی بھائی جان ہمارے ہاں جب سے کمپیوٹر عام انسان تک پہنچا ہے تب سے لوگ کمپیوٹر پر اردو وقت کے حساب سے ”اچھے سٹینڈرڈ“ پر لکھ رہے ہیں۔ کم از کم میں تو 2000ء سے ہی اردو میں ہی ای میل کرتا آ رہا ہوں۔ ٹھیک ہے وقت کے ساتھ ساتھ ٹیکنالوجی تبدیل ہوتی آئی ہے لیکن اس کا مطلب یہ تو نہیں ہم اردو کو کمپیوٹر پر ایک یتیم زبان کہیں۔ اردو کمپیوٹر پر یتیم نہیں ں ں ں ں۔۔۔ بلکہ یتیم ہماری سوچ ہے۔ اردو کو اگر کوئی پوچھتا نہیں تو اس کی وجہ اردو کی یتیمی نہیں بلکہ ہماری ذہنی غلامی ہے۔ شاید حالات کو کوسنا ہماری عادت بن چکی ہے۔ بھائی صاحب اگر اردو آج پیچھے ہے تو اس کے ذمہ دار بھی ہم ہیں۔ اردو کو یتیم کہنے سے پہلے اتنا تو سوچ لیتے کہ آج اس کے وارث ہم ہیں۔ جب ہم ہی کسی قابل نہیں تو اس میں اردو کا کیا قصور؟

بے قدری کی انتہا تو دیکھیں کہ اردو میں ڈیسک ٹاپ پبلشنگ کا تقریباً واحد سافٹ وئیر، ان پیج، ایک بھارتی سافٹ وئیر ہے۔
جناب آپ کی اطلاع کے لئے عرض ہے کہ نوری نستعلیق فانٹ پاکستان میں ہی بنا تھا لیکن مزید پروگرامنگ کا کام پاکستان میں ممکن نہ ہو سکا تو پھر ہندوستان کے لوگوں نے اس پر مزید کام کر کے سافٹ ویئر تیار کیا۔ مجھے سمجھ نہیں آتی، اردو کے معاملے میں اتنی تنگ نظری کیوں۔ جس مشین پر آپ یہ تحریر پڑھ رہے ہیں وہ پاکستان نے تو نہیں بنائی بلکہ وہ بھی غیر ملکی ہی ہے۔ مجھے بھی آپ کی طرح ہندوستانیوں سے بے شمار نظریاتی اختلاف ہو سکتے ہیں، لیکن اس میں اردو کو کیوں گھسیڑ رہے ہو۔ ٹھیک ہے اردو پاکستان کی قومی زبان ہے لیکن اردو ہندوستان میں بھی بولی جاتی ہے اور یہ ان کی بھی زبان ہے، اس لئے اردو میری یا آپ کی جاگیر نہیں بلکہ یہ ہر اس انسان کی زبان ہے جو اسے پسند کرتا ہے۔
باقی آپ کو بتاتا چلوں کہ اب اردو والے انپیج کے محتاج نہیں۔ اب اردو میں ڈیسک ٹاپ پبلشنگ کئی اور سافٹ ویئر کے ذریعے ہو سکتی ہے البتہ ہم دوسری طرف نہ دیکھیں تو یہ علیحدہ بات ہے۔

سن 2010 میں جاکر حکومت (اور) لوگوں نے ونڈوز وسٹا اور سیون میں موجود اردو لکھنے کی سپورٹ اور فونٹس کی وجہ سے اردو بلاگز میں زیادہ دلچسپی دکھانی شروع کی۔ اسے سے پہلے کوئی بھی اردو ویب سائٹ دیکھنے کے لیے اس پر موجود فونٹ کو ڈاونلوڈ کرنا پڑتا تھا۔ بی بی سی اردو پہلی مقبول اردو ویب سائٹ بنی۔
حضرت زیادہ نہیں تو تھوڑی سی تحقیق کر لیتے۔ ایک طرف آپ کہہ رہے ہیں کہ 2010ء میں اردو لکھنے کی سپورٹ اور فانٹس کی وجہ سے اردو بلاگز میں دلچسپی دکھانی شروع کی، تو دوسری طرف کہتے ہیں کہ بی بی سی اردو پہلی مقبول اردو ویب سائیٹ بنی۔ کیا آپ جانتے ہیں کہ بی بی سی اردو کی ویب سائیٹ تو 2002ء میں شروع ہوئی تھی۔ یوں 2010ء والی بات سمجھ نہیں آتی۔
خیر آپ کو بتاتا چلو کہ 2010ء میں نہیں بلکہ بہت پہلے ہی ونڈوز ایکس پی میں اردو لکھنے اور فانٹس کی مکمل سہولت موجود تھی اور اردو ویب سائیٹ دیکھنے کے لئے کسی فانٹ کی ضرورت نہیں پڑتی تھی۔ اگر آپ کی مراد نستعلیق فانٹ ہے تو بھائی جان نستعلیق فانٹ تو وسٹا اور سیون میں بھی موجود نہیں، پھر آپ یہ سہرا وسٹا اور سیون کے سر کیوں سجا رہے ہیں؟ بلکہ یہ سہرا ونڈوز 8 کے سر سجائیے گا کیونکہ اس میں نستعلیق فانٹ آ رہا ہے۔۔۔ باقی اگر بات اردو بلاگنگ کی کی جائے تو عرض ہے کہ 2008ء سے تو میں بھی بلاگنگ کر رہا ہوں جبکہ کہا جاتا ہے کہ 2002ء میں عمیر سلام پہلا اردو بلاگر تھا۔ 2004ء سے تو اپنے خاور کھوکھر صاحب بھی بلاگنگ کر رہے ہیں۔ 2005ء میں اردو محفل (پہلی یونیکوڈ اردو فورم) کیا بنی پھر تو جیسے اردو بلاگنگ میں انقلاب آ گیا۔ آپ کو بتاتا چلوں کہ 2005ء میں ہی اردو سیارہ پہلا اردو بلاگ ایگریگیٹر بھی وجود میں آ چکا تھا۔ بھائی جی یہ کوئی قبل مسیح کی باتیں تو نہیں جو آپ تاریخ میں اتنی بڑی غلطیاں شامل کر رہے ہیں۔

انٹرنیٹ پر دنیا کی پہلی پانچ مقبول ترین زبانوں میں سے ایک کا ہندی چہرہ تو نظر آتا ہے، اردو نہیں۔ گوگل اور وکی پیڈیا جیسی سائٹس پر اردو ایک دو سال پہلے تک موجود نہیں تھی حالانکہ ایسی زبانیں موجود تھیں جنہیں ایک دو کروڑ سے بھی کم لوگ بولتے تھے۔ اب ورڈ میں اردو مل جاتی ہے، لیکن اردو ڈکشنری کے بغیر۔
ویسے تحریر میں یہاں تک پہنچنے تک میرے دماغ کی بتیاں بجنے لگ پڑیں تھیں کہ یہ بھائی صاحب آخر لکھ کیا رہے ہیں۔ خیر پانچ مقبول ترین زبانوں میں اگر اردو چہرہ نظر نہیں آتا تو اس کی سیدھی سی وجہ یہ ہے کہ ان چہروں کی تعداد کم ہے جو انٹرنیٹ پر اردو لکھنے کو فوقیت دیتے ہوں۔ گوگل پر ایک دو سال پہلے تک اردو نہیں تھی اگر اس سے مراد تلاش کے نتائج میں اردو کا کہہ رہے ہیں تو پھر عرض ہے کہ جس دن انٹرنیٹ پر یونیکوڈ اردو لکھی جانی شروع ہوئی اسی دن گوگل کی تلاش میں اردو شامل ہو گئی تھی۔ مزید آپ وکی پیڈیا پر اردو ایک دو سال پہلے تک موجود نہیں تھی کا کہتے ہو جبکہ ایسا نہیں تھا۔ اگر آپ قریب ترین ہوتے پھر بھی کوئی بات ہوتی لیکن آپ تو بہت فرق ڈال گئے۔ جناب وکی پیڈیا پر اردو 2004ء سے موجود ہے۔
ورڈ میں ڈکشنری سے مراد اگر یہ ہے کہ غلط الفاظ کی نشاندہی ورڈ خودبخود کر دے تو عرض ہے کہ ورڈ میں اردو ڈکشنری ”موجود“ ہے۔

باقی رہی بات معیاری اردو کی سند کے لئے اور دیگر الفاظ کے تراجم کے لئے ادارہ ہونا چاہئے تو میں اس بات پر آپ سے مکمل اتفاق کرتا ہوں۔ اب اصطلاحات کا ترجمہ کیا اور کس طرح ہونا چاہئے اس پر میں کچھ نہیں کہہ سکتا کیونکہ میں لسانیات کا ماہر نہیں اور یہ کام تو ماہرین کا ہے۔ بھائی صاحب آپ کی تحریر کے جواب میں میری اس تحریر کو اگر آپ پڑھیں تو برائے مہربانی غصہ نہ کیجئے گا۔ دراصل میں نے آپ کی تحریر میں جو غلطیاں دیکھیں سوچا ان کی نشاندہی کر دوں تاکہ لوگوں تک حقائق پہنچیں۔ یقیناً آپ اور میں ایک ہی کشتی کے سوار ہیں۔ آپ نے بھی اردو کی بہتری کے لئے تحریر لکھی ہے لیکن مجھے محسوس ہوا کہ جہاں جہاں غلطیاں ہیں ان کی مجھے نشاندہی ضرور کرنی چاہئے، سو کر دی۔ باقی اگر میں کسی جگہ غلطی پر ہوں تو امید کرتا ہوں کہ آپ اچھے انداز میں میری اصلاح ضرور کریں گے۔ آخری بات یہ کہ کمپیوٹر اور انٹرنیٹ پر اردو لکھنا اور پڑھنا کوئی مشکل نہیں بلکہ یہ بالکل انگریزی یا دیگر زبانوں کی طرح ہی ہے۔ عام صارفین کے لئے کمپیوٹر اور انٹرنیٹ پر اردو لکھنے اور پڑھنے کی مکمل سہولت موجود ہے، اس لئے بہتر یہ ہے کہ لوگوں کو اردو لکھنے کی طرف قائل کرو، نہ کہ مسائل کا انبار سنا کر لوگوں میں مایوسی پیدا کرو۔ ٹھیک ہے چند ایک مسائل کا حل ہونا ابھی باقی ہے لیکن اب اتنے بھی مسائل نہیں جن کا آپ نے ذکر کر دیا ہے، ویسے اگر کہیں مسئلہ ہے تو وہ ہماری سوچ کا ہے جو ہم اردو لکھنا پسند ہی نہیں کرتے۔ اس لئے لوگوں کے حوصلے بڑھاؤ اور اردو لکھنے اور پڑھنے کی طرف قائل کرو۔۔۔

اب دیکھئے اپنے ارد گرد کے حالات۔ ضرورت موجود ہے، حالات رستہ دیکھا رہے ہیں، ذہانت کے سمندر بہہ رہے ہیں لیکن کوئی خاص ایجاد نہیں۔ ضرورت ایجاد کی ماں ہے اور یہی ضرورت چیخ و پکار کر رہی ہے لیکن ہمارے اکثر نوجوانوں نے صرف جنسی تسکین کو ہی ضرورت سمجھا ہوا ہے اور اس ضرورت کے تحت دن بدن ”محبت“ کے نئے سے نئے ماڈل ایجاد کر رہے ہیں، جیسے موبائلی محبت، انٹرنیٹی محبت اور فیس بکی محبت وغیرہ۔ کئی نوجوان تو اس سے بھی ایک قدم آگے نکل چکے ہیں۔ ان نوجوانوں نے ”ضرورت“ کسی جنسِ مخالف کا نام سمجھ رکھا ہے اور اس ”ضرورت“ کے لئے دن رات ایک کرتے پھر رہے ہیں تاکہ ”کچھ“ ایجاد کر سکیں۔

المیہ تو یہ ہے کہ یہاں آپ کو موجد نہیں بلکہ جگہ جگہ عاشق ملیں گے۔ یہاں آپ کو سائنسی تحقیق تو نہیں البتہ لڑکی لڑکے کی دوستی کو جائز و ناجائز ثابت کرنے والی تقاریر ضرور ملیں گی۔ سب سے بڑھ کر یہاں آپ کو رہبر نہیں بلکہ نظام پر گفتگو کرتے نقاد ملیں گے۔ جو دو چار اپنے ہی جیسوں کے ”ٹاک شوز“ دیکھ کر تنقید پر تنقید کرتے پھر رہے ہیں۔ تنقید بھی ایسی کہ جس کا نتیجہ صرف اور صرف بحث برائے بحث ہے، کوئی تعمیر نہیں۔ جس تنقید کا نتیجہ حوصلہ شکنی کر رہا ہے نہ کہ کچھ کرنے کا جذبہ پیدا کرے۔ دوسری طرف ذہانت نے اپنا ایک شور مچایا ہوا کہ ”جی ہمیں کوئی رہبر نہیں مل رہا“۔ ذرہ ان کی ذہانت تو دیکھو، یہ چاہتے ہیں کہ ساری رات یہ موبائل پر گپیں لگاتے رہیں اور جب دن کو سکون سے سوئے ہوں تو آئن سٹائن آئے اور ان کے سرہانے لکھی لکھائی تیار شدہ تھیوری رکھ جائے۔ ارے خدا کے بندو! محنت کرو اور خود آئن سٹائن بنو نہ کہ شارٹ کٹ کے چکر میں سوتے رہو۔ حالات خود رہبر بنے تو ہوئے ہیں اور تمہیں بتا بھی رہے ہیں کہ اگر اپنی بقا چاہتے ہو تو ترقی کی طرف جاؤ۔

اب فیصلہ ہمیں کرنا ہے کہ ہم نے حالات کو رہبر بنا کر، ان سے سبق سیکھتے ہوئے، اپنی اصل ضرورت کے مطابق ایجادات کرنی ہیں یا پھر یونہی ہاتھ پر ہاتھ دھرے خواب غفلت میں رہنا ہے اور فضول کاموں کو اپنی ضرورتیں بنا کر اندھیروں میں سفر کرنا ہے۔ فیصلہ ہمارے ہاتھ میں ہے کہ ہم نے اپنا لیڈر آپ بننا ہے یا پھر مسیحا کا انتظار کرتے کرتے اپنی موت آپ مر جانا ہے۔

ایجادات سے مراد صرف سائنسی ایجادات ہی نہیں بلکہ یہ ایک اصطلاح استعمال کی ہے جس میں سائنسی ایجادات سے لے کر معاشی، معاشرتی اور ہر لحاظ سے ہونے والی بہتر تبدیلیاں ہیں۔ آپ جو جواور جتنا جتنا کر سکتے ہیں، خدا کے لئے وہ تو کریں۔ ہمارے اندر اخلاقیات بہت کم ہو چکی ہیں، اس وقت یہ بھی ہماری ایک ضرورت ہے۔ بہتر نظام لانے، بہتر لیڈر پیدا کرنے، بہتر ٹیکنالوجی بنانے اور بہترین معاشرہ تشکیل دینے جیسی ضرورتوں کی طرف بھی توجہ کرنی ہے۔ نوجوانوں! ”ضرورت ایجاد کی ماں ہے“ کا اصل فلسفہ سمجھو اور ”ضرورت کو بچے کی ماں“ نہ بناؤ۔ ٹھیک ہے ضرورت کے تحت بچے ”ایجاد“ کرنے پر توجہ بھی دیں اور یہ بھی ایک ”اہم“ ضرورت ہے لیکن ساتھ ساتھ یہ بھی تو دیکھیں کہ ہماری اور بھی بہت سی ضرورتیں ہیں اور ان ضرورتوں کے تحت اور بھی بہت کچھ ایجاد کرنا ہے۔

یہ تحریر کسی ایک صنف کے لئے نہیں بلکہ اس میں دونوں (لڑکے اور لڑکیوں ) کو مخاطب کیا ہے۔ بس کئی جگہ پر محاورے کے مطابق چلتے ہوئے صنف واضح ہو رہی ہے تو اس مراد ہرگز لڑکے یا لڑکیاں نہ لیا جائے بلکہ یہ سوچئے کہ دونوں اطراف میں یہ سب چل رہا ہے اور تالی دونوں ہاتھوں سے بجتی ہے۔

پاک اردو انسٹالر بنانے سے پہلے مجھے یہ اندازہ تو تھا کہ لوگوں کو اس کی ضرورت ہے مگر یہ اندازہ نہیں تھا کہ اتنی زیادہ ضرورت ہے۔ یہ سب میرے اللہ کا کرم ہے اور اس کے بعد آپ جیسے دوستوں کی حوصلہ افزائی کا نتیجہ ہے کہ میں پاک اردو انسٹالر بنانے میں کامیاب ہوا۔

خیر میرا اصل موضوع یہ ہے کہ ایک عام کمپیوٹر صارف اور اردو ویب سائیٹوں کے مالکان کو آخر پاک اردو انسٹالر کا کیا فائدہ ہے یا ہو سکتا ہے؟ جیسا کہ آپ جانتے ہوں گے کہ پاک اردو انسٹالرکمپیوٹر اور انٹرنیٹ پر اردو لکھنے کی سہولت تو فراہم کرتا ہی ہے لیکن اس کے ساتھ ساتھ اردو بہتر انداز میں پڑھنے کے لئے اردو کے چند ضروری فانٹس بھی انسٹال کر دیتا ہے۔ یہ ایسے فانٹس ہیں جو عام طور پر اردو ویب سائیٹوں (Websites) اور بلاگوں (Blogs) پر استعمال ہوتے ہیں۔ کسی کمپیوٹر پر پاک اردو انسٹالر انسٹال ہونے کا مطلب ہے ”اس کمپیوٹر میں اردو کے حوالے سے مکمل سپورٹ شامل ہو جانا“۔ اس کے علاوہ پاک اردو انسٹالر انسٹال ہونے کے بعد ڈیسکٹاپ پر ایک آئی کان بنتا ہے جس میں اردو لکھنے کے متعلق تمام امدادی مواد موجود ہوتا ہے تاکہ جو لوگ اردو لکھنے کی طرف نئے آئے ہیں ان کی مکمل رہنمائی ہو سکے اور انہیں کوئی مشکل نہ ہو۔ اس امدادی مواد میں زبان کی تبدیلی سے لے کر اردو کی بورڈ کا خاکہ اور اردو لکھنے کے اصول تک شامل ہیں۔ خلاصہ یہ کہ کمپیوٹر اور انٹرنیٹ پر اردو پڑھنے، لکھنے اور اس بارے میں مکمل رہنمائی کے لئے صرف ایک ہی چیز چاہئے اور وہ ہے ”پاک اردو انسٹالر“۔

پاک اردو انسٹالر کے ذریعے اردو کی مکمل سپورٹ شامل ہونے کی وجہ سے ایک عام کمپیوٹر صارف تمام اردو ویب سائیٹوں کو بالکل ٹھیک پڑھ سکتا ہے اور اس کے علاوہ فیس بک، ٹویٹر اور انٹرنیٹ پر ہر جگہ اردو لکھ سکتا ہے۔ ای میل اور چیٹ بھی اردو میں کر سکتا ہے۔ انٹرنیٹ پر اردو لکھنے کا ایک بہت بڑا فائدہ تب ہوتا ہے جب کچھ تلاش کرنا ہو۔ مثال کے طور پر کسی نے شاعری یا کوئی خبر وغیرہ اردو میں تلاش کرنی ہو تو پھر گوگل یا کسی بھی سرچ انجن میں خاص اردو الفاظ لکھ کر تلاش کرے۔ اس سے تلاش کے بہتر نتائج ظاہر ہوتے ہیں۔ پاکستان میں زیادہ تر لوگ مواد چاہتے تو اردو میں ہیں لیکن وہ صرف اسی وجہ سے اردو مواد تک رسائی حاصل نہیں کر پاتے کیونکہ وہ گوگل وغیرہ میں تلاش کے لئے ”اردو“ کی بجائے ”Roman Urdu“ یا انگلش میں لکھتے ہیں۔ عام طور پر اردو خبریں وغیرہ تلاش کرنے والا سرچ انجن میں News in Urdu یا Urdu Khabrain وغیرہ لکھتا ہے جبکہ اگر وہ ”اردو خبریں“ جیسے الفاظ لکھ کر تلاش کرے تو اسے بہتر نتائج ملیں گے۔ اس کے علاوہ کوئی پرانی خبر، شعر وغیرہ یا کوئی بھی معلومات اگر Roman Urdu کی بجائے خاص ”اردو“ میں تلاش کی جائے تو بہتر نتائج برآمد ہوتے ہیں۔

انٹرنیٹ کے علاوہ کسی فائل یا فولڈر کا نام اور کسی سافٹ ویئر میں بھی آسانی سے اردو لکھ سکتے ہیں۔ جیسے میں نے یہ تحریر پہلے مائیکروسافٹ ورڈ میں لکھی اور پھر یہاں پیسٹ کی ہے۔ اردو لکھنے کے لئے کسی دوسرے سافٹ ویئر کو ہر وقت ساتھ ساتھ چلانے کی ضرورت نہیں بلکہ پاک اردو انسٹالر کے ذریعے اپنے کمپیوٹر کو اردو لکھنے کے قابل بنائیں اور پھر ہر جگہ بالکل انگلش کی طرح آسانی سے اردو لکھیں۔

عام طور پر لوگ اپنی اردو ویب سائیٹ اور بلاگ وغیرہ پر استعمال ہونے والے فانٹ کا لنک دیتے ہیں تاکہ ان کے قارئین فانٹ ڈاؤن لوڈ کر کے انسٹال کر لیں اور پھر ان کی ویب سائیٹ/بلاگ بہتر انداز میں پڑھا جا سکے۔ کئی لوگ سوچتے ہیں کہ ایک عام صارف بس اردو فانٹ ہی انسٹال کر لے تو ہمارے لئے کافی ہے جبکہ میں ایسا نہیں سوچتا۔ پاک اردو انسٹالر ایسی چیز ہے جو ویب سائیٹ اور بلاگ وغیرہ کے مالکان کی پہلی ضرورت یعنی ان کا فانٹ تو صارفین کے کمپیوٹر میں انسٹال کرتا ہی ہے لیکن ساتھ ساتھ اردو لکھنے کی سہولت بھی فراہم کر دیتا ہے۔ اگر عام صارفین اردو لکھنے کی طرف آئیں گے تو اس کا سب سے زیادہ فائدہ بھی اردو ویب سائیٹ اور بلاگ وغیرہ کو ہو گا۔ جب انٹرنیٹ پر زیادہ لوگ اردو لکھیں گے تب ویب سائیٹ/بلاگ پر اتنی زیادہ رائے آئے گی۔ ویب سائیٹ اور بلاگ وغیرہ کے مالکان کو عام صارفین کے اردو لکھنے کا سب سے بڑا فائدہ یہ ہو گا کہ ان کی ”ویب سائیٹ کی ٹریفک زیادہ“ ہو گی۔ سیدھی سی بات ہے جب عام صارفین گوگل وغیرہ میں خاص اردو الفاظ میں تلاش کریں گے تو تلاش کے نتائج میں انہیں کی اردو ویب سائیٹ نظر آئیں گی۔ ابھی تک عام صارفین کی بہت بڑی تعداد رومن اردو میں لکھ کر تلاش کرتی ہے یوں تلاش کے نتائج میں بھی رومن اردو، تصویری اردو اور انگلش کی ویب سائیٹ نظر آتی ہیں۔ جب لوگ اردو میں تلاش کریں گے تو سرچ انجن بھی اردو کی ہی ویب سائیٹ دکھائیں گے تو ظاہر ہے اردو ویب سائیٹوں کی ٹریفک بڑھے گی۔ ٹریفک بڑھنے سے اشتہارات ملیں گے اورپھر اردو کی ترویج کے ساتھ ساتھ اردو والوں کو کچھ مالی فائدہ بھی ہو گا۔ اس وقت ہمارا مسئلہ یہ نہیں کہ اردو قارئین کم ہیں بلکہ مسئلہ یہ ہے کہ اردو قارئین کو پتہ ہی نہیں کہ اردو بہتر انداز میں پڑھنے کے ساتھ ساتھ ہر جگہ اردو لکھی بھی جا سکتی ہے اور تلاش بھی اردو میں کی جا سکتی ہے۔ اردو قارئین رومن اردو میں تلاش کرتے ہیں اور اردو کی اصل ویب سائیٹوں/بلاگوں کی بجائے کہیں اور نکل جاتے ہیں۔ یوں قارئین بہتر اردو مواد تک نہیں پہنچ پاتے اور اصل اردو کی ویب سائیٹوں کو زیادہ قارئین نہیں مل پاتے۔

عام صارفین اور ویب سائیٹ/بلاگ کے مالکان سے گذارش ہے کہ پاک اردو انسٹالر کو زیادہ سے زیادہ پھیلائیں، لوگوں کو اردو کی اہمیت بتائیں اور زیادہ سے زیادہ لوگوں کو اردو لکھنے کی طرف قائل کریں۔ یوں اردو کی ترویج میں حصہ تو لیں گے ہی لیکن ساتھ ساتھ اپنی ویب سائیٹ/بلاگ پر رائے اور ٹریفک بھی بڑھا سکیں گے۔ اپنی ویب سائیٹوں اور بلاگوں پر پاک اردو انسٹالر کا بینر لگائیں تاکہ لوگوں کو پتہ چلے کہ نہایت آسانی اور صرف چند کلکس سے اردو ویب سائیٹ/بلاگ بالکل ٹھیک انداز میں پڑھے جا سکتے ہیں اور ساتھ ساتھ آسانی سے اردو لکھی بھی جا سکتی ہے۔ لوگوں کو بتائیں کہ اگر ابھی بھی اردو پڑھنے اور لکھنے میں کہیں معمولی سی مشکل ہے تو اس کا حل بھی صرف اسی لئے نہیں ہو رہا کہ اردو والے خود ”اردو“ کی طرف نہیں آ رہے۔ ظاہر ہے جب اردو لکھنے والے زیادہ ہوں گے تو پھر بڑی بڑی ویب سائیٹیں بھی اردو فانٹ شامل کر لیں گی۔

”پاک اردو انسٹالر“ کا سب کو جو فائدہ ہو رہا ہے، وہ اپنی جگہ، لیکن اب پاک اردو انسٹالر جہاں تک پہنچے گا ، یہ اپنی ترویج کرنے والوں کی بھی اتنی مشہوری کرے گا۔ پاک اردو انسٹالر انسٹال کرنے کے بعد ڈیسکٹاپ پر جو آئی کان بنتا ہے اس میں ”اردو بلاگر“ اور ”اردو ویب سائیٹ“ کے نام سے لنک شامل کیے ہیں۔ یہ ایسے لنک ہیں جن پر پاک اردو انسٹالر کی ترویج کرنے والوں کی فہرست موجود ہے۔ آپ بھی یہ فہرست دیکھیں اور اگر آپ نے پاک اردوانسٹالر کا بینر لگایا ہوا ہے یا کسی اور ذریعے سے پاک اردو انسٹالر کی ترویج میں حصہ لے رہیں اور آپ کا نام اس فہرست میں موجود نہیں تو اس تحریر پر تبصرہ یا مجھ سے رابطہ کر کےآگاہ کریں تاکہ آپ کا نام بھی شامل کیا جائے۔ یہ ابھی بہت بنیادی قسم کی فہرست ہے لیکن وقت کے ساتھ ساتھ اس میں بلاگران اور ویب سائیٹوں کی تفصیل، پروفائل اور دیگر کافی کچھ شامل کیا جائے گا۔

آپ بھی اردو کی ترویج میں حصہ لیں۔ پاک اردو انسٹالر کا بینر اپنے بلاگ/ویب سائیٹ پر لگائیں۔ شکریہ

آپ کو بتاتا چلوں کہ ایک اندازے کے مطابق پاک اردو انسٹالر اپنی شروعات 15جون2011ء سے اب تک یعنی 28نومبر2011ء تک تقریباً 9000 مرتبہ ڈاؤن لوڈ کیا جا چکا ہے اور آج کل روزانہ80 سے 100 کے قریب ڈاؤن لوڈ ہوتا ہے اور یہ تعداد دن بدن زیادہ ہو رہی ہے۔ یہ اعدادوشمار میری ویب سائیٹ کے ہیں، باقی جن دوستوں نے ادھر ادھر اپلوڈ کر دیا ہے اس کا کوئی اندازہ نہیں۔ بعض دوست تو ابھی بھی سب سے پہلے ورژن کو ادھر ادھر پھیلا رہے ہیں، جبکہ شروع سے ابھی تک کئی چھوٹی اور کئی بڑی تبدیلیوں کے بعد پاک اردو انسٹالر کے کل 6ورژن جاری کیے جا چکے ہیں۔ اللہ کے فضل سے ابھی تک پاک اردو انسٹالر میں کسی خرابی کی اطلاع موصول نہیں ہوئی۔ ورژن صرف اسے بہتر سے بہتر کرنے کے لئے جاری کیے گئے۔ تازہ ورژن 3.2 میں جمیل نوری نستعلیق فانٹ کے کچھ غلط الفاظ بھی درست کر دیئے گئے ہیں، جیسا کہ ”ب-ی-ت-ے“ جڑ کر لفظ ”بیٹے“ بن جاتا تھا۔ ایک اور گذارش تھی جو کہ میں اکثر کرتا ہوں لیکن کئی دوست ادھر توجہ ہی نہیں دیتے، اگر ہو سکے تو ادھر ادھر کے لنک دینے کی بجائے پاک اردو انسٹالر کی ڈاؤن لوڈنگ کے لئے میرے بنائے ہوئے صفحہ کا لنک دیں یعنی یہ لنک(http://www.mbilalm.com/download/pak-urdu-installer.php)۔ ایک تو یہاں پر آٹھ کے قریب مختلف ڈاؤن لوڈ لنک دیئے ہیں تاکہ اگر ایک لنک میں مسئلہ ہو تو کسی دوسرے سے ڈاؤن لوڈ کیا جا سکے۔ دوسرا جو بھی اس ڈاؤن لوڈ والے صفحہ پر آئے گا اسے تازہ ورژن ہی ملے گا۔ تیسرا اگر کوئی ڈاؤن لوڈ لنک تبدیل ہو جائے تو وہ یہاں پر فوراً تبدیل کر دیا جاتا ہے۔ یہ ایک سدا بہار اور مستقل لنک ہے۔ اس صفحہ کو کھولتے ہی ڈاؤن لوڈنگ خودبخود شروع ہو جاتی ہے۔ اگر کسی مسئلہ کی وجہ سے نہ بھی ہو تو صارفین کے لئے دیگر کئی سہولیات دی گئی ہیں تاکہ جو پاک اردو انسٹالر حاصل کرنا چاہتا ہے وہ اس صفحہ سے خالی ہاتھ نہ لوٹے اور پاک اردو انسٹالر حاصل کر کے ہی جائے۔ پاک اردو انسٹالر کے آٹھ ڈاؤن لوڈ لنک میں انٹرنیٹ کی بہترین ڈاؤن لوڈنگ ویب سائیٹ سی نیٹ اور سافٹ پیڈیا کے لنک بھی شامل ہیں یعنی ان ویب سائیٹ نے پاک اردو انسٹالر کو مکمل ٹھیک پایا اور اپنی ویب سائیٹ پر اپلوڈ کیا۔

اس کے علاوہ پاک اردو انسٹالر کا صفحہ انگریزی اور تصویری اردو میں بنانے کے ساتھ ساتھ کافی سارے بینر اور بٹن بھی بنا دیئے ہیں تاکہ اردو اور پاک اردو انسٹالر کی ترویج میں کسی چیز کی کوئی کمی نہ رہے۔ دوستوں اس حوالے سے میں جو کر سکتا تھا وہ کر دیا ہے اور ان شاء اللہ مزید بھی کرتا رہوں گا، لیکن ساتھ ساتھ آپ بھی جہاں تک ہو سکے اس میں حصہ لیں۔

تمام تعریفیں اللہ کے لئے ہیں۔ وہی بہتر مدد اور صلہ دینے والا ہے۔

گزشتہ سے پیوستہ

ساری باتوں کا خلاصہ یہ کہ سب سے پہلے معاشرے کی ترقی کے لئے مناسب زبان کا انتخاب کرنا ہے۔ جب ہم پاکستان کے لئے مناسب زبان کا انتخاب کرنے نکلتے ہیں تو ہم پر صاف واضح ہو جاتا ہے کہ ہماری ترقی کا سب سے پہلا راز ہماری قومی زبان اردو میں پوشیدہ ہے۔؟ ٹھیک ہے دنیا گلوبل ویلیج بن چکی ہے لیکن ساری ترقی یافتہ دنیا اس گلوبل ویلیج میں شامل ہوتے ہوئے عام طور پر اپنی ہی زبان اپناتی ہے۔ اس کے بعد جس بندے نے جس سطح تک جانا ہوتا ہے پھر اس کے مطابق وہ دیگر کوئی زبان یا انگریزی سیکھتا ہے۔ ساری ترقی یافتہ دنیا کے عام لوگ انٹرنیٹ پر بھی اپنی ہی زبان اپنائے ہوئے ہیں۔ انٹرنیٹ استعمال کرتے ہوئے اگر ابھی بھی ہمیں زیادہ تر انگریزی کا سہارا لینا پڑتا ہے تو اس میں قصور بھی ہمارا ہی ہے کیونکہ جتنا ہم اردو کو اپنائیں گے اتنی ہی انگریزی کی ضرورت دن بدن کم ہوتی جائے گی۔ جب ہم اردو اپنائیں گے تو ساری مشکلات آسان ہونا شروع ہو جائیں گی۔ ہمیں کسی بیگانی زبان کی وجہ عام لوگوں پر تعلیم کے راستے بند نہیں کرنے ہوں گے اور ایک انگریزی کی وجہ سے عام لوگوں کو آگے آنے سے نہیں روکنا ہو گا۔ جو جس بھی زبان میں لکھ کر، بول کر یا سوچ کر اپنا مدعا بیان کر سکتا ہے اسے اس کی اجازت دینی ہو گی۔ ہمیں اچھے لوگ سامنے لانے ہیں نہ کہ انگریزی بولنے والے لوگوں کو بڑے عہدوں پر بیٹھانا ہے۔ اس کے بعد عام بندے کو اگر مواد کسی دوسری زبان کا چاہئے تو مترجم کا استعمال کرے اور اگر زیادہ ضرورت ہو تو پھر جس کی جو زبان ضرورت ہو وہ سیکھے۔ ایک دفعہ پھر کہوں گا کہ کسی بھی معاشرے میں اپنی زبان کے علاوہ کوئی دوسری زبان سیکھنے کی ضرورت بہت کم لوگوں کو ہوتی ہے اس لئے ان تھوڑے لوگوں کو کوئی دوسری زبان سیکھانی چاہئے نہ کہ پوری کی پوری قوم پر بیگانی زبان ٹھونس کر ذہانت کا کباڑہ کر دیا جائے۔ ہمیں اس الٹی بہتی ہوئی گنگا کو سیدھا کرنا ہو گا اور ”انگریزیا“ کی بیماری سے بچنا ہو گا۔ ہم جغرافیائی لحاظ سے آزاد ہیں تو ہمیں اس ذہنی غلامی سے بھی آزادی حاصل کرنی ہو گی، تب کہیں جا کر اقوام عالم میں ہم بھی اپنی کوئی شناخت بنا پائیں گے۔ وقت کے ساتھ ساتھ بین الاقوامی سطح پر آنے والی زبانیں تو تبدیل ہوتی آئیں ہیں۔ پہلے عربی اور فارسی تھیں، اب انگریزی ہے تو کل کو کوئی اور ہو گی، اور وہ ”اردو“ بھی ہو سکتی ہے۔ ہو سکتا ہے آپ کو یہ ”دیوانے کا خواب لگے“ لیکن خواب دیکھنے کی آزادی تو دیجئے حضور؟ خیر ہر غالب قوم کی زبان خودبخود بین الاقوامی سطح پر آ جاتی ہے، لیکن دیگر قوموں کی اپنی محنت و تاریخ تو صدیوں پر محیط ہوتی ہے تو کیا کل کو کوئی دوسری زبان بین الاقوامی سطح پر آئے گی تو ہم اس کی طرف دوڑ لگا دیں گے؟ اور تب تک کی ہوئی ساری محنت، سارا ادب، ساری تاریخ چھوڑ کر نئی زبان سیکھنے چل پڑیں گے؟ خدارا ہوش کے ناخن لو اور دیکھو کہ زبانوں کی سطح تبدیل ہونے پر قومیں اپنی زبانیں نہیں بدلتیں بلکہ اپنی زبان کو اپنائے رکھتی ہیں، اپنا قیمتی ورثہ سنبھالے ترقی کرتی رہتیں ہیں۔
یاد دہانی کے لئے بتا دوں کہ مجھے انگریزی سے یا کسی بھی دوسری زبان سے کوئی دشمنی نہیں بلکہ میں نے وہ منطق آپ تک پہنچانے کی کوشش کی ہے جو میں سمجھتا ہوں کہ ہمارے لئے ترقی کا آسان ترین ذریعہ ثابت ہو سکتا ہے۔ ایک دفعہ اردو کو وہ مقام دے کر تو دیکھو، جس کی یہ مستحق ہے، پھر دیکھنا یہ زبان آپ کو کیسے دنوں میں عروج دیتی ہے۔ ہمارے نوجوانوں بہت ذہین ہیں، ایک دفعہ بیگانی زبان کی پابندی اٹھاؤ تو سہی پھر دیکھنا یہ کیسے ملک و قوم کے دن بدلتے ہیں۔

اردو ہماری قومی زبان ہے۔ گھر، بازار، دفتر اور ہر جگہ پر اس کا استعمال کرو۔ اپنی زبان کو اپناؤ اور خوشحال ہو جاؤ۔

گذشتہ سے پیوستہ

انگریزی ہم پر ٹھونسنے کے حق میں یار لوگوں کے پاس سب سے بڑے دلائل یہ ہیں کہ دنیا گلوبل ویلیج بن چکی ہے اور اس گلوبل ویلیج کی زبان انگریزی ہے۔ انگریزی ایک بین الاقوامی اور علم کی زبان ہے۔ دنیا کا زیادہ تر جدید علم انگریزی میں ہے۔ جدید تحقیق انگریزی میں ہی مل سکتی ہے۔ چلیں یار لوگوں کے یہ دلائل ہم خود مان لیتے ہیں لیکن سوال تو یہ ہے کہ یہ دلائل ہم پر یا کسی بھی قوم پر لاگو کیسے ہو سکتے ہیں؟ سب سے پہلے تو یہ بات دیکھیں کہ کسی قوم (ترقی یافتہ+ترقی پذیر) کی کتنی تعداد اس سطح تک پہنچتی ہے جہاں وہ اس گلوبل ویلیج کا حصہ بنتے ہوئے گلوبل ویلیج کی زبان اپناتی ہے؟ ٹھیک ہے دنیا گلوبل ویلیج میں شامل ہوتی ہے لیکن ساری ترقی یافتہ دنیا شامل ہوتے ہوئے عام طور پر اپنی زبان اپناتی ہے۔ اس کے بعد جس بندے نے جس سطح تک جانا ہوتا ہے پھر اس کے مطابق وہ دیگر کوئی زبان یا انگریزی سیکھتا ہے۔ ساری ترقی یافتہ دنیا کے عام لوگ انٹرنیٹ پر بھی اپنی ہی زبان اپنائے ہوئے ہیں۔ انٹرنیٹ استعمال کرتے ہوئے اگر ابھی بھی ہمیں زیادہ تر انگریزی کا سہارا لینا پڑتا ہے تو اس میں قصور بھی ہمارا ہی ہے کیونکہ جتنا ہم اردو کو اپنائیں گے اتنی ہی انگریزی کی ضرورت دن بدن کم ہوتی جائے گی۔ ویسے اس گلوبل ویلیج کی زبان کا فارمولا ہم پر ہی کیوں لاگو ہوتا ہے؟ یہ گلوبل ویلیج کے بالکل مرکز میں رہنے والے، جرمنی، فرانس، سپین اور پورے یورپ وغیرہ پر کیوں نہیں ہوتا؟ یہ انگریزی ہمارے لئے ہی اتنی کیوں ضروری ہے، یہ چین اور جاپان کے لئے اتنی ضروری کیوں نہیں؟

دوسری بات یہ کہ پاکستانیوں کی کتنی تعداد ہے جسےبین الاقوامی سطح تک جا کر علم کے حصول کے لئے انگریزی اپنانی پڑتی ہے؟ آخر پاکستان میں کتنے لوگ ہیں جنہیں جدید تحقیق جاننے کی ضرورت ہوتی ہے؟ ٹھیک ہے ابھی ہمارے درمیان ایسی تعداد بہت ہی کم ہے لیکن ہم ترقی کر بھی جائیں تو تب بھی ساری قوم نے اس بین الاقوامی سطح تک نہیں پہنچنا ہوتا بلکہ آپ دیکھ لیں ترقی یافتہ ممالک میں بھی ایسی بین الاقوامی سطح پر چند گنے چنے لوگ ہی ہوتے ہیں، جنہیں بین الاقومی یا دیگر کوئی زبان سیکھنا ضروری ہوتی ہے۔ آخر کسی قوم میں ایسے کتنے محقق ہوتے ہیں جنہوں نے بین الاقوامی سطح پر پہنچنا ہوتا ہے؟ چلیں اگر آپ کو اعتراض ہے تو مان لیتے ہیں کہ یہ تعداد گنی چنی نہیں ہوتی بلکہ زیادہ ہوتی ہے، تو پھر آپ خود اندازہ لگا لیں کہ ایک لاکھ، ایک کروڑ اور ایک قوم میں یہ تعداد کتنی ہوتی ہے؟ اس اندازے کے بعد بھی آپ دیکھیں گے کہ یہ تعداد آٹے میں نمک کے برابر ہی ہوتی ہے۔ وہ لوگ جنہوں نے بین الاقوامی سطح تک جا کر کام کرنا ہے وہ سیکھیں یا انہیں سیکھاؤ بین الاقوامی زبان۔ اب چند لوگوں کو بین الاقوامی سطح پر لانے کے لئے پوری عوام کو انگریزی سیکھانا بہتر ہے یا پھر جو اس سطح تک پہنچے صرف وہ سیکھ لے۔ صرف بیمار کو دوائی دی جاتی ہے۔ باقی جنہوں نے اپنی زندگی پاکستان سے شروع کرنی ہے اور یہیں پر کام کاج کرتے گزار دینی ہے ان تندرستوں کو صبح شام انگریزی کی خوراک دے کر الٹا بیمار کیا جا رہا ہے۔ آخر ہم انگریزی کو بنیاد بناکر کئی لوگوں پر بنیادی علم کے دروازے کیوں بند کر دیتے ہیں؟ ہم بین الاقوامی جدید تحقیق کی زبان کا کہہ کر بے شمار پاکستانیوں پر علم کے راستے بند کر دیتے ہیں۔ ہم کسی دوسری زبان کو معیار بناتے ہوئے کئی لائق لوگوں کو آگے آنے سے روک دیتے ہیں۔ تھوڑی سی تحقیق کریں تو خود جان جائیں گے کہ اس انگریزی کی وجہ سے ہمارے کتنے ہی لوگ انٹرمیڈیٹ اور بی۔اے نہیں کر پاتے۔ کبھی کسی یونیورسٹی کے نتائج دیکھیئے گا اور پھر انگریزی میں فیل ہونے والے آرٹس کے طلبہ کو شمار کریں اور ساتھ ساتھ دیکھیں کہ ایسے طلبہ نے دیگر مضامین میں جو اردو میں ہیں ان میں کیا کارکردگی دیکھائی ہے؟ پھر خود ہی جان جائیں گے کہ ایسے بے شمار طلبہ ہیں جو دیگر مضامین میں بڑے اچھے ہوتے ہیں، وہ اچھے اور دیانت دار سکالر، منتظم، سیاست دان، استاد، جرنیل،صحافی وغیرہ بن سکتے ہیں، خدا نے ان کو کسی نہ کسی خاص شعبے کی اعلیٰ خصوصیات پیدائشی طور پر دی ہوتی ہیں لیکن یہ ایک انگریزی ان کا کباڑہ کر دیتی ہے۔ پھر وہی اعلیٰ خصوصیات رکھنے والے ہمیں دکانوں پر کام کرتے اور ریڑھیاں چلاتے نظر آتے ہیں۔ اس ایک بیگانی زبان کی وجہ سے ہم ذہانت کا کباڑہ کر کے رکھ دیتے ہیں۔ ساری دنیا اس چھوٹی اور آسان بات کو سمجھ چکی ہے اور اپنی اپنی زبان اپناتے ہوئے دن بدن ترقی کر رہی ہے لیکن ہماری غلامانہ سوچ سے بھری کھوپڑی کو اتنی چھوٹی سی بات سمجھ نہیں آ رہی کہ کسی قوم کی ترقی اس کی اپنی زبان میں پوشیدہ ہوتی ہے۔

ایک دفعہ پھر کہوں گا کہ جس کو انگریزی کی ضرورت ہے اسے سیکھاؤ اور جو اپنا لوہا اپنی زبان اردو میں منوا سکتا ہے اس پر علم کے دروازے بند نہ کرو۔ جو بندہ ایک اچھا بیوروکریٹ بن کر ملک و قوم کی خدمت کر سکتا ہے، جو بندہ اچھا جرنیل بن کر اچھا دفاع کر سکتا ہے، جو ایک اچھا استاد بن کر قوم کی تربیت کر سکتا ہے انہیں اس ایک انگریزی کی وجہ سے نہ روکو بلکہ ان کی قدرتی صلاحیت کو بروئے کار لاؤ اور ترقی کی راہ پر چلو۔ جس نے بین الاقوامی سطح تک پہنچنا ہے یا جنہیں انگریزی کی ضرورت ہے صرف وہ سیکھیں یا سیکھاؤں۔ ویسے بھی جو بین الاقوامی سطح تک پہنچنے کے قابل ہوتا ہے اسے انگریزی یا دیگر کوئی بھی زبان سیکھنے میں مسئلہ بھی نہیں ہوتا کیونکہ وہ ہے ہی قابل۔ فرض کریں کہ وہ قابل تو ہے لیکن زبان سیکھنے کے معاملے میں تھوڑا کند ذہن ہے تو پھر بھی اسے کوئی مسئلہ نہیں ہو گا کیونکہ وہ ایسی سطح پر ہوتا ہے جہاں مترجم ملنے کوئی بڑی بات نہیں ہوتی۔ خدارا ہوش کرو اور اس ایک انگریزی کی وجہ سے ایک عام آدمی کو دیوار سے مت لگاؤ۔

اگلا حصہ :- قوموں نے ترقی کس زبان میں کی؟

کچھ دوستوں کا خیال تھا کہ اردو ایکٹیو کرنے کا یہ طریقہ واقعی تھوڑا مشکل ہے تو اس کے حل کے لئے کوئی انسٹالر بنانا چاہئے۔ اس کام کو آسان کرتے ہوئے اللہ کے فضل سے ”پاک اردو انسٹالر“ بنا دیا۔ حیرانی تب ہوئی جب ایک ای میل ملی کہ کیا اس سے بھی کوئی آسان طریقہ نہیں؟ میں نے جوابی ای میل میں صرف اتنا لکھا کہ جتنی آسانی آپ کو یہ ای میل کرنے میں ہوئی ہے اس سے کہیں زیادہ آسان اردو ایکٹیو کرنا ہے۔ سلام ہے اردو محفل کی انتظامیہ اور شروع کے بلاگران کو جنہوں نے تب اردو کمپیوٹنگ کی ترویج اور انٹرنیٹ پر اصل اردو (یونیکوڈ اردو) میں لکھنا شروع کیا جب ہر طرف مشکلات ہی مشکلات تھیں۔ جبکہ عام صارف کے لئے اب تو کوئی خاص مشکل باقی نہیں۔

جو تھوڑا بہت لوگوں کو اردو اور خاص طور پر اردو کمپیوٹنگ کا کہتا ہوں تو اس میں بڑے عجیب عجیب تجربات کا سامنا اور باتیں سننے کو ملتی ہیں۔ سب سے عام بہانہ یہ ہے کہ ”اردو لکھنے کو دل تو بہت کرتا ہے لیکن اردو لکھنا مشکل ہے۔“ اجی ایسی کیا مشکل ہے؟ مشکل یہ ہے کہ پتہ نہیں چلتا کہ کونسا حرف کس Key سے لکھا جائے گا۔ چلیں ابھی دیکھ لیتے ہیں کہ یہ مشکل ہے یا نہیں۔ اچھا آپ بتائیں کہ آپ کے خیال سے ”الف“ اپنی آواز کے مطابق کس Key پر ہو گا۔ فوراً جواب ملتا ہے جی A سے۔ اسی طرح اکثر کیز کا معاملہ صاف ہو جاتا ہے تو جب معمولی پچیدہ حروف مثلا ”ض“ اور ”ء“ وغیرہ کا ذکر آتا ہے تو جواب ملتا ہے کہ ”میں نہ کہتا تھا کہ اردو لکھنا مشکل ہے۔“ ایسے حالات میں اندازہ ہو جاتا ہے کہ جناب کا ”اردو لکھنے کو واقعی بہت دل کرتا ہے۔“

مجھے سمجھ نہیں آتی کہ ہمارے لوگ آخر چاہتے کیا ہیں؟ کمپیوٹر مشین کو بنیادی طور پر چلانے سے لے کر میڈیا پلیئر، براؤزر اور دیگر سافٹ ویئر/ٹولز تک سب کچھ استعمال کرنا سیکھنا پڑتا ہے اور ان سب کے استعمال سے کہیں آسان اردو لکھنا ہے لیکن پھر بھی عجیب عجیب بہانے۔۔۔ مانا کہ اردو لکھنے میں کہیں تھوڑی بہت مشکل آ سکتی ہے اور ایسی مشکل تقریباً کمپیوٹر پر کام کرتے ہوئے ہر جگہ آتی ہے لیکن دیگر مشکلات کے حل کے لئے پتہ نہیں کیا کیا جتن کیے جاتے ہیں۔ اینٹی وائرس سے سکین اور تو اور ونڈوز تک نئی انسٹال کرلیتے ہیں لیکن جب اردو کا معاملہ آتا ہے تو اتنا آسان کام بھی انہیں مشکل لگنے لگتا ہے۔ ارے جس طرح باقی سب کچھ سیکھا ہے اسی طرح ایک دو دن میں اردو لکھنا بھی سیکھ جاؤ گے۔ ایک دفعہ قدم تو اٹھاؤ۔ شاید ہم پکی پکائی کھیر کھانا چاہتے ہیں بلکہ اس سے بھی ایک قدم آگے ہیں اور چاہتے ہیں کہ کھیر ہمارے منہ میں بھی کوئی اور ڈالے۔ کل کو کہیں گے کہ کھیر کا مزہ ہمیں آئے لیکن اس کو ہضم اور دیگر کام بھی کوئی دوسرا کرے۔۔۔

میرے خیال میں سارا مسئلہ ہماری ترجیحات کا ہے۔ یوں تو اردو لکھنا بہت ہی آسان ہے لیکن اگر کوئی مشکل ہو بھی تو جس کی ترجیح اردو لکھنا ہو وہ ہاتھ پاؤں مار کر اِدھر اُدھر سے پوچھ کر آخر کار لکھنا سیکھ جاتا ہے اور جس نے نہیں لکھنی وہ اس بندے کی طرح جس نے کہا تھا ”دل تو بہت کرتا ہے“ جیسے بہانے بناتا ہے۔

اردو ہماری قومی زبان ہے اور اردو ہی وہ واحد زبان ہے جو کئی ایک زبانیں بولنے والے پاکستانیوں میں ایک اٹوٹ رشتہ قائم کرتی ہے۔

”پاک اردو انسٹالر“ بغیر ونڈوز کی سی ڈی کے تینوں کام خودبخود کر دیتا ہے یعنی اردو ایکٹیو، اردو کی بورڈ لے آؤٹ اور اردو کے چند ضروری فونٹس انسٹال کر دیتا ہے۔ عام طور پر اردو ویب سائیٹس اور دیگر جگہوں پر استعمال ہونے والے اردو کے تین فونٹس ”پاک اردو انسٹالر“ میں شامل کیے گئے ہیں۔ جن میں خوبصورت فونٹ ”جمیل نوری نستعلیق“، کرلپ کا فونٹ ”اردو ویب نسخ“ اور بی بی سی اردو کا فونٹ”اردو نسخ ایشیاء ٹائیپ“ شامل ہیں۔

”پاک اردو انسٹالر“ انسٹال کرنے کے بعد آپ کے کمپیوٹر میں اردو کی مکمل سپورٹ شامل ہو جائے گی۔ جس سے کسی بھی جگہ اردو بہتر انداز میں پڑھنے کے ساتھ ساتھ بالکل آسانی سے اردو لکھی بھی جا سکتی ہے۔ کمپیوٹر پر کسی بھی جگہ جہاں دوسری کوئی زبان لکھی جاتی ہے وہاں پر اردو بھی لکھی جا سکتی ہے۔ حتیٰ کہ ای میل، چیٹ اور کسی فائل یا فولڈر کا نام وغیرہ بھی اردو میں لکھ سکتے ہیں۔ ”پاک اردو انسٹالر“ انسٹال ہونے اور کمپیوٹر ری سٹارٹ کرنے کے بعد Taskbar پر Language bar نظر آنا شروع ہو جاتی ہے۔ جیسا کہ نیچے والی تصاویر میں نظر آرہی ہے۔

ونڈوز ایکس پی

ونڈوز وسٹا

ونڈوز سیون

 
”پاک اردو انسٹالر“ یہاں سے ڈاؤن لوڈ کریں
فائل سائز MB 14.51

جس سافٹ ویئر میں اردو لکھنی ہو وہاں پر بائیں طرف کا Alt+Shift دبائیں تو آپ کا کمپیوٹر اس سافٹ ویئر میں اردو موڈ میں ہو جائے گا یعنی جب بھی کوئی Key دبائیں گے تو اردو لکھی جائے گی۔ اسی طرح کسی سافٹ ویئر کا موڈ انگلش میں تبدیل کرنے کے لئے دوبارہ بائیں طرف کا Alt+Shift دبائیں۔ جس سے دوبارہ انگلش موڈ ہو جائے گا۔ اس کے علاوہ لینگوئج بار پر کلک کر کے بھی موڈ تبدیل کیا جا سکتا ہے۔ اگر کسی سافٹ ویئر میں دیکھنا ہو کہ کمپیوٹر اس سافٹ ویئر میں کس موڈ پر ہے تو ٹاسک بار پر موجود لینگوئج بار دیکھیں۔ اگر لینگوئج بار میں ”UR“ لکھا ہو تو اس کا مطلب ہے کہ اردو موڈ پر ہے اور اسی طرح اگر ”EN“ لکھا ہو تو انگلش موڈ پر ہے۔

 
یاد رہے ایک وقت میں دو یا زیادہ زبانیں بھی شامل کی جا سکتی ہیں۔ دو سے زیادہ زبانیں ہونے کی صورت میں جب بائیں طرف کا Alt+Shift دبائیں گے تو موڈ ایک زبان سے دوسری اور پھر دبانے سے دوسری سے تیسری اور اسی طرح موڈ آخری زبان تک جائے گا اور پھر دبانے سے واپس پہلی پر آجائے گا۔

 
اپڈیٹ نمبر 1 (18 جون 2011ء) :- اب ونڈوز کے تینوں ورژن یعنی ایکس پی، وسٹا اور سیون کے لئے ایک ہی ”پاک اردو انسٹالر“ کام کرے گا۔ یعنی اب ہر ونڈوز کے لئے علیحدہ علیحدہ انسٹالر کی بجائے ایک ہی انسٹالر ڈاؤن لوڈ کریں اور پھر جس ونڈوز پر چاہیں انسٹال کریں۔ مزید تفصیل یہاں دیکھ سکتے ہیں۔

 
اپڈیٹ نمبر 2 (29 جون 2011ء) :- 64Bit ونڈوز پر اردو انسٹال کرنے کی سہولت بھی ”پاک اردو انسٹالر“ میں شامل کر دی گئی ہے۔ یعنی اب چاہے ونڈوز ایکس پی، وسٹا یا سیون 32Bit ہو یا 64Bit سب کے لئے ایک ہی ”پاک اردو انسٹالر“ کام کرے گا۔

کمپیوٹر پر اردو لکھنے اور بہتر انداز میں دیکھنے کے لئے آپ کو تین کام کرنے پڑتے ہیں۔

• اردو کی انسٹالیشن یعنی کمپیوٹر پر اردو کو ایکٹیو کرنا۔
• اردو کی بورڈ لے آؤٹ کی انسٹالیشن۔
• اردو فونٹس کی انسٹالیشن۔

پاک اردو انسٹالر یہی تینوں کام خودبخود کر دیتا ہے۔

اردو کی انسٹالیشن
اردو کی انسٹالیشن یعنی اردو کو کمپیوٹر پر ایکٹیو کریں۔ اس کی سپورٹ ونڈوز میں پہلے سے ہی شامل ہوتی ہے۔ ونڈوز ایکس پی میں یہ عمل آپ کو خود کرنا پڑتا ہے اور اس کے لئے آپ کو ونڈوز ایکس پی کی سی ڈی کی ضرورت پڑتی ہے۔ یہ ایک بہت ہی آسان اور چھوٹا سا مرحلہ ہے۔ اس کی تفصیل کے لئے ”ونڈوز ایکس پی میں اردو کی انسٹالیشن“ والا صفحہ دیکھیں۔ اس کے برعکس ونڈوز سیون اور وسٹا میں اردو پہلے سے ہی ایکٹیو ہوتی ہے اس لئے ونڈوز سیون یا وسٹا میں اس عمل کی ضرورت نہیں پڑتی۔

اردو کی بورڈ لے آؤٹ
اردو کی انسٹالیشن یعنی اردو ایکٹیو کرنے کے بعد کمپیوٹر پر اردو لکھنے کے لئے آپ کو اپنی مرضی کا کی بورڈ لے آؤٹ انسٹال کرنا ہوتا ہے تاکہ آپ اپنی مرضی کے مطابق جس کی Key سے جو لکھنا چاہتے/چاہتی ہیں وہ لکھ سکیں۔ مثال کے طور پر آپ A کی Key سے کیا لکھنا چاہتے/چاہتی ہیں اور B کی Key سے کیا لکھنا چاہتے/چاہتی ہیں۔ اردو کی بورڈ لے آؤٹ کی انسٹالیشن ایک بہت ہی آسان اور چھوٹا سا مرحلہ ہے جس کو انسٹال کرنے کی تفصیل آپ کو ” ونڈوز سیون، ونڈوز وسٹا یا ونڈوز ایکس پی میں اردو کی انسٹالیشن“ والے صفحہ پر ہی پتہ چل جائے گی۔پھر بھی مزید تفصیل درکار ہو تو ”اردو کی بورڈ لے آؤٹ (Urdu Keyboard Layout)“ والا صفحہ دیکھیں۔

اردو فونٹس
جس طرح کمپیوٹر پر باقی لکھائی کے خاص انداز(سٹائل) ہوتے ہیں جنہیں رسم الخط یعنی فونٹس کہتے ہیں جیسے Times New Roman، Arial اور Tahoma وغیرہ وغیرہ اسی طرح اردو لکھائی کو بھی ظاہر کرنے کے مختلف فونٹس ہوتے ہیں جیسے جمیل نوری نستعلیق، نفیس ویب نسخ، علوی لاہوری نستعلیقاور اردو نسخ ایشیا ٹائپ وغیرہ وغیرہ۔ اب آپ اردو لکھائی کو جس انداز میں دیکھنا چاہتے/چاہتی ہیں آپ وہ والے فونٹس اپنے کمپیوٹر پر انسٹال کر لیں۔ یہ بھی ایک بہت آسان اور چھوٹا سا مرحلہ ہے۔ اردو فونٹس کے بارے میں مزید معلومات کے لئے ”رسم الخط یعنی فونٹ(Font) کیا ہے؟“ والا صفحہ دیکھیں۔ اگر آپ کوئی بھی اردو فونٹ انسٹال نہیں کرتے پھر بھی اردو تحریر آپ کو ٹھیک نظر آئے گی لیکن یہ تحریر Times New Roman یا Tahoma وغیرہ فونٹ میں ہو گی جو کہ اردو کے فونٹ نہیں اس لئے بہتر یہی ہوتا ہے کہ آپ اردو تحریر کو بہتر انداز میں دیکھنے کے لئے چند ضروری فونٹس ضرور انسٹال کر لیں۔

عمومی سوالات

• کیا ان تینوں مراحل میں سے ایک بھی کر لیا جائے تو اردو لکھی جا سکتی ہے؟
جواب:- نہیں، یاد رہے یہ تینوں مراحل اپنی جداگانہ حیثیت رکھتے ہیں۔ آپ یوں بھی سمجھ سکتے ہیں کہ پہلے والے دو مراحل یعنی اردو کی انسٹالیشن اور اردو کی بورڈ لے آؤٹ کی انسٹالیشن کے بعد آپ کمپیوٹر پر کسی بھی سافٹ ویئر میں اور انٹرنیٹ پر بآسانی اردو لکھ سکیں گے اور پھر اردو کو بہتر انداز میں دیکھنے کے لئے آپ کو اردو فونٹس کی ضرورت پڑ سکتی ہے۔
عام طور پر کئی دفعہ دیکھا گیا ہے کہ لوگ ان تینوں مراحل میں سے کوئی ایک کر لیتے ہیں خاص طور پر اردو فونٹس انسٹال کر لیتے ہیں اور پھر شکایت کرتے ہیں کہ جناب اردو تو پھر بھی نہیں لکھی جا رہی۔ شاید ان کو سمجھ نہیں آتی یا پھر کوئی انہیں ٹھیک طرح سمجھا نہیں سکتا کہ اردو لکھنے کے لئے یہ تینوں مراحل یا کم از کم پہلے دو مراحل پورے کرنے بہت ضروری ہیں۔ یاد رہے ونڈوز سیون اور ونڈوز وسٹا میں یہ خصوصیت ہے کہ اس میں اردو پہلے سے ہی ایکٹیو ہوئی ہوتی ہے۔ اس لئے ونڈوز سیون اور ونڈوز وسٹا میں آپ کو اردو لکھنے کے لئے صرف دوسرا مرحلہ یعنی ”اردو کی بورڈ لے آؤٹ“ کی ہی انسٹالیشن کرنی پڑتی ہے۔

• میں نے کمپیوٹر پر نہ تو اردو ایکٹیو کی ہے اور نہ ہی کوئی اردو کی بورڈ لے آؤٹ انسٹال کیا ہے لیکن پھر بھی کئی ویب سائیٹ پر میں اردو لکھ سکتا/سکتی ہوں؟
جواب:- جن ویب سائیٹس پر بغیر اردو ایکٹیو کیے اور بغیر اردو کی بورڈ لے آؤٹ انسٹال کئے اردو لکھی جاتی ہے ان ویب سائیٹس پر جس جگہ آپ اردو لکھ سکتے/سکتی ہیں اس ٹیکسٹ ایریا کے پیچھے جاوا سکرپٹ یا کسی بھی طرح کچھ ایسے پروگرامنگ کی جاتی ہے کہ جب آپ کوئی Key دباتے/دباتی ہیں تو انگلش کے حرف کی بجائے اردو کا حرف ظاہر ہو جاتا ہے۔ یہ سب اس پروگرامنگ کا کمال ہوتا ہے جبکہ آپ کے کمپیوٹر پر نہ تو اردو ایکٹیو ہوتی ہے اور نہ ہی کوئی اردو کی بورڈ لے آؤٹ انسٹال ہوا ہوتا ہے۔

• اکثر اردو ویب سائیٹس پر جہاں اردو میں لکھنا ہوتا ہے وہاں اردو ویسے ہی لکھی جاتی ہے تو پھر اپنے کمپیوٹر پر اردو ایکٹیو کرنے کا کیا فائدہ؟
جواب:- انٹرنیٹ پر اردو ویب سائیٹس کے علاوو بھی کئی جگہ پر آپ کو اردو لکھنا پڑ سکتی ہے مثلاً گوگل میں کچھ اردو میں تلاش کرنا پڑ سکتا، فیس بک پر کچھ اردو میں لکھنا پڑ سکتا ہے اس کے علاوہ بھی کئی ایک ویب سائیٹس پر اردو میں لکھنا پڑ سکتا ہے تو پھر آپ کیا کریں گے/گی؟ اس کا سب سے بہتر اور سٹینڈرڈ حل یہی ہے کہ آپ اپنے کمپیوٹر پر اردو کو ایکٹیو کریں اور اپنی مرضی کا اردو کی بورڈ لے آؤٹ انسٹال کریں جو کہ بہت ہی آسان ہے اور پھر آپ جہاں چاہیں جس سافٹ ویئر میں چاہیں آسانی سے اردو لکھیں اور تو اور آپ ای میل اور چیٹ بھی اردو میں کر سکتے/سکتی ہیں۔

• میرے پاس ”اردو کی بورڈ“ نہیں ہے یعنی میرے ”کی بورڈ“ پر اردو کے حروف نہیں لکھے ہوئے تو پھر میں کیسے اردو لکھ سکتا/سکتی ہوں؟
جواب:- پہلی بات یہ کہ آپ کے پاس اگر انگلش یا کسی دوسری زبان کا ”کی بورڈ“ ہے تو پھر بھی آپ اردو لکھ سکتے/سکتی ہیں۔ دوسری اور اہم بات یہ کہ ”کی بورڈ“ ایک ہارڈ ویئر ہے جبکہ ”کی بورڈ لے آؤٹ“ ایک سافٹ ویئر ہوتا ہے جوکہ اردو یا کوئی بھی زبان لکھنے کے لئے استعمال ہوتا ہے۔آپ ونڈوز کا جس زبان کا ورژن انسٹال کرتے ہیں اس کا ”کی بورڈ لے آؤٹ“ ونڈوز کی انسٹالیشن کے دوران ہی خود بخود انسٹال ہو جاتا ہے اور پھر ایکٹیو بھی ہو جاتا ہے۔ لیکن ہمیں ونڈوز کا انگلش یا کسی بھی دوسری زبان کا ورژن استعمال کرتے ہوئے اردو لکھنے کے لئے اردو کا ”کی بورڈ لے آؤٹ“ انسٹال یا کم از کم ایکٹیو کرنا پڑتا ہے۔ اس بارے میں مزید تفصیل دیکھنے کے لئے ”اردو کی بورڈ لے آؤٹ(Urdu Keyboard Layout)“ والا صفحہ دیکھیں۔ یہاں ایک بار پھر بتاتے چلیں کہ ”کی بورڈ“ ایک ہارڈ ویئر ہوتا ہے جبکہ کمپیوٹر پر کوئی بھی زبان لکھنے کے لئے ”کی بورڈ لے آؤٹ“ کی ضرورت ہوتی ہے جو کہ کسی بھی ”کی بورڈ“ ہارڈویئر کے ساتھ کام کر سکتا ہے چاہے اس ”کی بورڈ“ پر انگلش لکھی ہو یا کوئی بھی دوسری زبان۔

• میں نے اپنے کمپیوٹر پر اردو کی انسٹالیشن، کی بورڈ لے آؤٹ کی انسٹالیشن اور اردو فونٹ کی انسٹالیشن یعنی ان تینوں مراحل میں سے کچھ بھی نہیں کیا لیکن پھر بھی میرے کمپیوٹر پر اردو پڑھی جاتی ہے؟
جواب:- اردو تحریر پڑھنے کے لئے آپ کو کچھ کرنے کی ضرورت نہیں ہوتی۔ ونڈوز ایکس پی، ونڈوز وسٹا اور ونڈوز سیون میں یہ خصوصیت شامل ہے کہ اردو تحریر بغیر کچھ کیے ٹھیک پڑھی جا سکتی ہے۔ صرف لکھائی کا انداز بہتر دیکھنے کے لئے آپ کو اردو فونٹس کی ضرورت پڑ سکتی ہے۔ جبکہ اردو لکھنے کے لئے آپ کو پہلے دو مراحل پورے کرنے پڑتے ہیں۔

• میں نے کمپیوٹر پر کوئی اردو فونٹ انسٹال نہیں کیا پھر بھی اردو تحریر مجھے نستعلیق فونٹ میں ہی نظر آتی ہے؟
جواب:- آپ جس اردو تحریر کی بات کر رہے/رہی ہیں وہ کمپیوٹر کی اصل اردو نہیں بلکہ وہ اردو تصویری شکل میں موجود ہے جو کہ ایک بہت پرانا طریقہ ہے اور اب وہ دور نہیں رہا کہ اس پرانے طریقہ پر چلا جائے۔ اس بارے میں مزید تفصیل آپ ”کمپیوٹر کی “اردو” اور “تصویری اردو” میں فرق“ والے صفحہ پر دیکھ سکتے/سکتی ہیں۔

• چند ایک ویب سائیٹ پر کمپیوٹر کی اصل اردو میں ہی تحریر موجود ہے اور وہ نستعلیق میں ہی نظر آتی ہے جبکہ میں نے کوئی نستعلیق فونٹ انسٹال نہیں کیا؟
جواب:- اس کی وجہ یہ ہے بعض ویب سائیٹس پر نستعلیق یا کسی بھی فونٹ کو اس طرح رکھا گیا ہوتا ہے کہ جب آپ اس ویب سائیٹ کو کھولتے/کھولتی ہیں تو وہ فونٹ اس ویب سائیٹ کو کھولنے پر آپ کے کمپیوٹر پر عارضی طور پر انسٹال ہو جاتا ہے اور اردو تحریر آپ کو اسی فونٹ میں نظر آتی ہے اور جب آپ وہ ویب سائیٹ بند کرتے ہیں تو وہ فونٹ بھی آپ کے کمپیوٹر سے ختم ہو جاتا ہے۔

• اگر میرے ذہن میں ”اردو اور کمپیوٹر“ کے متعلق کوئی سوال ہو تو مجھے اس کا جواب کہاں سے ملےگا؟
جواب:- اپنے سوال کے جواب کے لئے آپ urduhelpline[at]gmail[dot]com پر رابطہ کریں۔ اردو ہیلپ لائن والے حتی المقدور آپ کی مدد کریں گے۔ اس کے علاوہ ایک بہترین جگہ اردو محفل ہے جہاں آپ کو اردو کے متعلق بے شمار ذخیرہ ملے گا۔ اردو محفل کا لنک درج ذیل ہے۔
http://www.urduweb.org/mehfil/forum.php

• اردو کی بورڈ لے آؤٹ میں کہاں سے حاصل کر سکتا/سکتی ہوں؟
جواب:- آپ یہاں سے اردو کی بورڈ لے آؤٹ حاصل کر سکتے/سکتی ہیں۔

• اردو فونٹس کہاں سے مل سکتے ہیں؟
جواب:- عام طور پر کمپیوٹر پر استعمال ہونے والے اردو فونٹس آپ کو یہاں سے مل جائیں گے۔

اس کے علاوہ جہانِ قلم ایک ایسی ویب سائیٹ جہاں اردو فونٹس کا بہت بڑا ذخیرہ موجود ہے۔ جہانِ قلم کے لئے درج ذیل لنک دیکھیں۔
http://fonts.alqlm.org

نوٹ:- یہ تحریر 7 فروری 2010 کو شائع کی گئی تھی لیکن اس تحریر کو ”اردو کمپیوٹنگ“ زمرہ میں مناسب جگہ پر رکھنے کے لئے تاریخ تبدیل کی گئی ہے۔

رسم الخط کو اپنے کمپیوٹر پر نصب کرنا
اس کا سب سے بہتر طریقہ یہ ہے کہ پاک اردو انسٹالر ڈاؤن لوڈ کر کے انسٹال کر لیں، جس سے اردو کے تمام ضروری فانٹس آپ کے کمپیوٹر میں انسٹال ہو جائیں گے اور ساتھ ساتھ اردو لکھنے کی سہولت بھی دستیاب ہو جائے گی۔ مزید اگر آپ خود سے فانٹس انسٹال کرنے کا طریقہ جاننا چاہتے ہیں تو وہ درج ذیل ہے۔
عام طور پر انٹرنیٹ پر جو رسم الخط موجود ہیں وہ Zip ہوئے ہوتے ہیں۔ انٹرنیٹ سے رسم الخط کو اتارنے کے اُسے کسی سافٹ ویئر کے ساتھ UnZip کر لیں۔ اس کے بعد خاص رسم الخط کی فائل کو کاپی کریں پھرStartپھر Run پر کلک کریں اور وہاں fonts لکھ کر Ok کر دیں۔ نئی ظاہر ہونے والی ونڈو میں رسم الخط کو Ctrl+v سے پیسٹ کر دیں۔ یوں آپ کا رسم الخط کمپیوٹر میں نصب ہو جائے گا۔