اگر ویب سائیٹ وائرس/مال ویئر وغیرہ سے متاثر ہو چکی ہے تو پھر ویب سائیٹ کو وائرس سے پاک یا ٹھیک کرنے سے پہلے بھی فائلوں اور ڈیٹابیس کا بیک اپ ضرور بنائیں تاکہ خرابی در خرابی کی صورت میں زیادہ نقصان نہ اٹھانا پڑے۔ اس کے بعد گوگل ویب ماسٹر ٹول، سوکوری سکیورٹی یا ان جیسی دیگر سروس کے ذریعے مسئلے کی جڑ معلوم کرنے کی کوشش کریں۔ مسئلہ کی نشاندہی کرنے اور حفاظتی اقدامات کے بارے میں تفصیلی جاننے کے لئے ”ویب سائیٹ کی دیکھ بھال اور وائرس سے تحفظ“ والی تحریر دیکھیں۔ چاہے مسئلہ معلوم کرنے کے بعد اسے ٹھیک کر دیں پھر بھی بالترتیب درج ذیل اقدامات ضرور کریں۔ اگر مسئلہ کی نشاندہی نہ بھی کر پائیں تو پھر درج ذیل اقدامات کے ذریعے حفاظتی تدابیر، مسئلہ کی تلاش اور پھر اس کا حل کریں۔

»»»   سب سے پہلے اپنی لوکل مشین کو چیک کریں کہ کہیں اس میں کوئی وائرس یا کی لوگر وغیرہ تو موجود نہیں۔ اگر ہو تو پہلے لوکل مشین کو وائرس سے پاک کریں یا پھر ویب سائیٹ ٹھیک کرنے کے لئے کسی دوسری وائرس سے پاک مشین کا انتخاب کریں۔

»»»   جیسا کہ پہلے لکھا کہ ویب سائیٹ کے ساتھ کچھ بھی کرنے سے پہلے ڈیٹابیس، فائلوں اور سسٹم لاگ کا بیک اپ بنا لیں۔

»»»   ہوسٹنگ اور دیگر ایڈمن لیول کے پاسورڈ اور ای میل فوری تبدیل کریں۔

»»»   اگر آپ کے اکاؤنٹ میں کوئی حساس معلومات محفوظ ہے جیسے کریڈٹ کارڈ وغیرہ کی معلومات تو اسے فوراً ختم یا تبدیل کر دیں۔

»»»   ہوسٹنگ کے کنٹرول پینل کو تفصیل سے چیک کریں اور اگر کوئی غیرضروری یا آپ کی اجازت کے بغیر ایف ٹی پی اکاؤنٹ، ریموٹ ڈیٹابیس ایکسس یا دیگر کوئی اکاؤنٹ بنا ہوا ہے تو اسے ختم کر دیں۔

»»»   ہوسٹنگ کی سسٹم لاگ باریکی سے چیک کریں اور جس جس ایف ٹی پی یا دیگر کسی اکاؤنٹ سے تبدیلی کا ذرا بھی شک پڑے اسے فوراً ختم کر دیں۔

»»»   ہوسٹنگ پر موجود تمام فائلز اور ڈائریکٹریز کی پرمیشن دیکھیں کہ کہیں کسی کی پرمیشن کمزور تو نہیں کر دی گئی، اگر ایسا ہو تو پھر پرمیشن کو واپس اس کی بہتر حالت میں کریں۔

»»»   ہوسٹنگ پر موجود php.ini فائل کو تفصیل سے چیک کریں اور اگر اس میں کوئی تبدیلی ہو چکی ہے تو اسے واپس اصلی حالت میں لے آئیں۔

یہ تمام کام کرنے کے بعد اگر ویب سائیٹ کی بہتر حالت کا بیک اپ موجود ہے تو اسے ری سٹور کر لیں اور دوبارہ ہوسٹنگ اور ایڈمن لیول کے پاسورڈ تبدیل کر دیں۔ اگر بیک اپ موجود نہیں تو پھر درج ذیل اقدام کریں۔

عام طور پر چھوٹی موٹی ویب سائیٹ کو ٹھیک کرنے کا سب سے بہتر طریقہ یہ ہوتا ہے کہ اس کی تمام چیزوں کا بیک اپ بنا کر لوکل مشین پر لوکل سرور بنا کر اس پر سیٹ اپ کر لیں اور سارا کام آف لائن کریں۔ یوں کسی کوڈ کی تلاش اور دیگر کئی کام بہت آسان ہو جاتے ہیں۔ یہ لازمی نہیں کہ ضرور لوکل سرور پر ہی کام کیا جائے، جو جس طرح آسانی محسوس کرے وہ اس طرح کر لے۔ اگر آپ سارا کام آن لائن ہی کر رہے تو پھر ویب سائیٹ کو Maintenance موڈ پر کر دیں تاکہ صفائی کے دوران اگر کوئی صارف ویب سائیٹ کھولے تو وائرس/مال ویئر کا کوڈ دوبارہ چل کر ہر جگہ نہ پہنچ جائے۔ خیر ویب سائیٹ ٹھیک کرنے کے لئے درج ذیل کام کریں۔

ہیکر کی شامل کردہ فائلوں کی تلاش

جب ہیکر اپنی مرضی کی فائلیں شامل کر لیتا ہے تو پھر وہ جو چاہے کر سکتا ہے۔ وائرس زدہ ویب سائیٹ کی صفائی کے دوران سب سے پہلا کام یہی کیا جاتا ہے۔ جس میں دیکھا جاتا ہے کہ کہیں کوئی غیرضروری اور زائد فائل تو شامل نہیں۔ ایسی فائلوں کو فوری ختم کر دیا جاتا ہے۔ عام طور پر ہیکر ایسی فائلیں خفیہ حالت میں شامل کرتے ہیں یعنی فائلیں Hidden رکھتے ہیں۔ یاد رہے لینکس سرور پر Hidden فائلیں ڈاٹ(.) سے شروع ہوتی ہیں۔

htaccess. فائل

اپاچی اور اکثر کئی سرور ڈائریکٹریز کو کنٹرول کرنے کے لئے ایک Hidden فائل htaccess. کو استعمال کرتے ہیں۔ ہوسٹنگ کی روٹ اور دیگر ڈائریکٹریز جہاں جہاں پر بھی htaccess. فائل موجود ہے اس کو چیک کریں۔ کئی دفعہ اس فائل میں تبدیلی کر کے ویب سائیٹ کو کنٹرول کیا جاتا ہے۔ عام طور پر اس فائل کے ذریعے ری ڈائریکٹ کیا جا رہا ہوتا ہے۔ اگر htaccess. فائل میں کسی دوسری ویب سائیٹ کا ایڈریس، کوئی آئی پی یا دیگر کوئی کوڈ وغیرہ آپ کی اجازت کے بغیر شامل ہو چکا ہے تو اسے ختم کر دیں۔

آئی فریم

تیسرے نمبر پر یہ کیا جاتا ہے کہ ویب سائیٹ کی تمام فائلوں میں آئی فریم (iframe) کوڈ کی تلاش کی جاتی ہے۔ عموماً ہیکر اشتہارات یا ری ڈائریکٹ کرنے کے لئے ویب سائیٹ کے کسی کونے کھدرے میں آئی فریم شامل کر دیتے ہیں اور آئی فریم کا کوڈ کچھ اس طرح رکھتے ہیں کہ جس سے یہی لگتا ہے کہ یہ کوئی بہت ضروری کوڈ ہے۔ ویب سائیٹ کی تمام فائلوں میں iframe کی تلاش کیجئے اور جس جگہ غیرضروری کوڈ ملے اسے ختم کر دیجئے۔

ملیشیئس سکرپٹ (Malicious Script)

وائرس زدہ ویب سائیٹ کی صفائی کے دوران سب سے مشکل اور اصل کام یہی ہوتا ہے۔ اصل وائرس/مال ویئر یہی کوڈ ہوتا ہے جو کہ کئی دفعہ ایک وقت میں ویب سائیٹ کئی ایک فائلوں میں پھیلا ہوتا ہے۔ عام طور پر یہ کوڈ جاوا سکرپٹ میں لکھا ہوتا ہے۔ اگر کسی ویب سائیٹ سکینر ٹول کی مدد لی جائے تو وہ اس کوڈ کو آسانی سے پکڑ لیتا ہے لیکن مسئلہ یہ ہوتا ہے کہ براؤزر میں یہ کوڈ اپنے نتائج دکھا رہا ہوتا ہے جبکہ ویب سائیٹ کی فائلوں میں انکرپٹ صورت میں ہوتا ہے۔ خیر گوگل ویب ماسٹر یا اس سے ملتے جلتے دیگر ٹولز کی مدد سے اس کوڈ کی نشاندہی کرنے کے بعد اسے ختم کر دیں۔

ٹِپ:-

عام طور پر ہیکر ویب سائیٹ کی index اور جاوا سکرپٹ والی فائلوں کو نشانہ بناتے ہیں اور اگر کوئی سی ایم ایس ہو تو پھر اس کی تھیم کو۔ تھیم میں بھی ایسی فائلیں خاص طور پر نشانہ بنائی جاتی ہے ہیں جن میں فنکشن وغیرہ ہوتے ہیں۔ جیسے ورڈپریس کے تھیم کی function.php فائل ہے۔ ویب سائیٹ کو وائرس سے پاک کرتے ہوئے کسی چھوٹی سے چھوٹی اور معمولی سے معمولی فائل کو بھی نظر انداز نہ کریں۔ حتی کہ تصاویر والی فائلز کی بھی اچھی طرح جانچ کریں۔

ویب سائیٹ صاف کرنے کے بعد ایک مرتبہ دوبارہ احتیاط کے طور پر ہوسٹنگ اور ایڈمن لیول کے پاسورڈ تبدیل کر دیں۔ اگر کوئی سی ایم ایس استعمال کر رہے ہیں تو اگر اس کی کوئی اپڈیٹ وغیرہ آئی ہوئی ہے تو اسے بھی اپڈیٹ کر لیں۔
ہمیشہ ویب سائیٹ کا بیک اپ ضرور رکھیں کیونکہ کسی مشکل کی صورت میں سب سے آسان حل بیک اپ کو ریسٹور کرنا ہی ہوتا ہے۔

ورڈپریس سی ایم ایس کے حفاظتی اقدامات اور خاص ورڈپریس کو وائرس سے پاک کرنے کا طریقہ آئندہ کی اقساط میں

ملتی جلتی تحاریر:-     • ویب سائیٹ کی دیکھ بھال اور وائرس سے تحفظ     • ویب سائیٹ ہیکر کیا اور کیسے کرتے ہیں     • موجودہ دور میں اردو زبان – جواب     • آپ کو پاک اردو انسٹالر کا کیا فائدہ؟     • پاکستان میں ”انگریزیا“ کی بیماری

ہیکنگ کے حملے عموماً تین طریقوں سے ہوتے ہیں۔

1:- ہوسٹنگ یا ایف ٹی پی کا یوزر نیم، پاسورڈ اور دیگر معلومات حاصل کر لینا۔ جو کہ زیادہ تر ”کی لوگر“ وغیرہ کی مدد سے کریکر لوگ کرتے ہیں۔ پھر ان پر ویب سائیٹ کے تمام دروازے کھل جاتے ہیں اور وہ اپنی مرضی کی تبدیلیاں کر لیتے ہیں۔

2:- لوکل کمپیوٹر اور اس پر موجود فائلوں میں وائرس شامل کر دینا تاکہ جب فائلیں اپلوڈ ہوں تو خودبخود سارے کام ہوتے جائیں۔ عموماً ایسے کام مفت سافٹ ویئر، سافٹ ویئر کے کریکر یا دیگر مفت چیزوں وغیرہ کا جانسہ دے کر کئے جاتے ہیں یا پھر آج کل کافی پرانا طریقہ یعنی خوبصورت لڑکی کی فحش تصویر/ویڈیو دیکھانے والا طریقہ بھی کافی استعمال ہو رہا ہے۔

3:- چور رستے سے ہوسٹنگ/فائلوں تک رسائی حاصل کرنا۔ جو کہ عام طور پر جب لوکل کمپیوٹر سے فائلیں ہوسٹنگ پر منتقل ہو رہی ہوتی ہیں تب کمزور صورتحال یا کھلی پورٹ وغیرہ دیکھ کر گُھس جاتے ہیں۔ یہ اور اس سے ملتے جلتے کام ہی اصل ہیکنگ ہیں۔

مزید اگر گوگل یا کسی دوسرے سرچ انجن میں Header Injection attack, SQL Injection attackیا Cross-Site Scripting attackوغیرہ لکھ کر تلاش کریں تو اس بارے میں بڑی تفصیلی معلومات مل جاتی ہے۔

عام طور پر ویب سائیٹ ہیک کرنے کے بعد ہیکر کیا کرتے ہیں۔

1:- اپنی مرضی کے اشتہارات لگا دیتے ہیں۔

2:- آپ کے وزیٹرز کو کسی دوسری ویب سائیٹ پر ری ڈائریکٹ کر دیتے ہیں۔

3:- ڈیٹا بیس چوری اور خراب کر دیتے ہیں۔

4:- مکمل ویب سائیٹ برباد کر دیتے ہیں۔

اشتہارات

عام طور پر زیادہ تر ہیکنگ کا نتیجہ یہی ہوتا کہ ہیکر آپ کی ویب سائیٹ پر اشہارات لگا دیتے ہیں، کیونکہ ویب سائیٹ خراب کر کے کچھ نہیں ملتا جبکہ اشہارات سے ان کی مشہوری ہوتی ہے۔ اس کام کے لئے زیادہ تر آئی فریم شامل کرتے ہیں جبکہ کئی دفعہ تو ویب سائیٹ کی تمام انڈیکس(index) فائلوں پر ہی اشتہارات لگا دیتے ہیں۔

وزیٹرز کو ری ڈائریکٹ

دوسری صورت یہ ہوتی ہے کہ ویب سائیٹ میں کچھ ایسا کوڈ شامل کر دیا جاتا ہے جس سے آپ کی ویب سائیٹ کے وزیٹر ہیکر کی مرضی کی ویب سائیٹ پر ری ڈائریکٹ ہو جاتے ہیں۔ زیادہ تر ری ڈائریکٹ کا کوڈ ایسا ہوتا ہے کہ جس میں اگر یوزر لاگ ان ہے اور ڈائریکٹ ویب سائیٹ کھولے تو پھر ری ڈائریکٹ نہیں ہو گا جبکہ اگر کوئی سرچ انجن سے آئے اور لاگ ان بھی نہ ہو تو پھر وہ ری ڈائریکٹ ہو جائے گا۔ ایسا اس لئے کرتے ہیں تاکہ ویب سائیٹ کے مالک کو پتہ نہ چل سکے۔

ڈیٹابیس چوری اور خراب

کئی دفعہ ایس کیو ایل انجکشن (SQL Injection) اور دیگر کئی ذرائع سے ڈیٹابیس سے قیمتی اور ذاتی معلومات چرا لی جاتی ہے اس کے علاوہ کئی دفعہ ڈیٹابیس خراب کر دی جاتی ہے۔اگر ڈیٹابیس تھوڑی سی خراب ہوئی ہو تو پھر آپ اسے درست کر سکتے ہیں۔ ڈیٹابیس درست کرتے ہوئے اس کے تمام ٹیبل اور ریکارڈ چیک کریں اور غیر ضروری ٹیبل اور ریکارڈ فوری ختم کر دیں۔ اگر ڈیٹابیس بڑی ہے تو پھر کسی ڈیٹابیس ریپئر ٹول کی مدد لیں۔ سی ایم ایس استعمال کرنے کی صورت میں اس سی ایم ایس سے متعلقہ ڈیٹابیس ریپئر ٹول کا انتخاب کریں۔

مکمل ویب سائیٹ برباد

اور کئی دفعہ تو لوگ اس حد تک کر گزرتے ہیں۔ اگر ایسا ہو چکا ہے تو پھر آپ کے پاس سوائے ری سٹور کرنے کے اور کوئی چارہ نہیں۔ اس لئے ہمیشہ ویب سائیٹ اپڈیٹ کرنے کے بعد بیک اپ ضرور بنائیں تاکہ کسی مشکل کی صورت میں ری سٹور ہو سکے۔ مزید ویب سائیٹ کے متعلق حفاظتی اقدامات ضرور کر کے رکھیں اور احتیاط کا دامن کبھی نہ چھوڑیں۔

یاد رہے! اس تحریر کا مقصد صرف اور صرف ویب سائیٹ مالکان اور طلباء کو ہیکنگ کے متعلق آگاہی فراہم کرنا ہے تاکہ وہ ہیکنگ کے خلاف مؤثر اقدامات کر سکیں۔

جاری ہے۔۔۔

ویب سائیٹ ہیک ہونے کے بعد ٹھیک کرنے کا طریقہ اور دیگر بہت ساری معلومات اگلی اقساط میں۔

ملتی جلتی تحاریر:-     • ویب سائیٹ کی دیکھ بھال اور وائرس سے تحفظ     • اردو بلاگ کی ٹریفک کیسے بڑھائیں؟     • ٹیکسٹ باکس پر اردو ویب پیڈ لگانا     • اردو ویب سائیٹ اور اینکوڈنگ سسٹم     • اردو اور اینڈرائڈ موبائل

کیونکہ اس وقت دنیا میں گوگل سب سے زیادہ مشہور سرچ انجن ہے اس لئے ویب سائیٹ بنانے کے بعد سب سے پہلے ویب سائیٹ کا گوگل سے مضبوط تعلق قائم کریں۔ گوگل سرچ انجن کے ساتھ ساتھ ویب سائیٹ مالکان کو دیگر کئی قسم کی مفت سہولیات فراہم کرتا ہے۔ جیسے گوگل انیلیٹکس(Analytics) اور گوگل ویب ماسٹر ٹول(Webmaster Tool) وغیرہ وغیرہ۔ گوگل انیلیٹکس کے ذریعے ویب سائیٹ پر لوگوں کی آمدورفت کا بہت تفصیل سے جائزہ لیا جا سکتا ہے اور گوگل ویب ماسٹر ٹول کے ذریعے کسی ویب سائیٹ کی گوگل سرچ انجن کے حوالے سے بڑے اچھے انداز میں دیکھ بھال کی جا سکتی ہے۔ یہ نہایت ہی زبردست سہولت ہے۔ اگر ویب سائیٹ پر کسی وائرس وغیرہ کا حملہ ہو یا ویب سائیٹ کی کارکردگی متاثر ہو رہی ہو تو ویب ماسٹر ٹول اس مسئلہ سے تفصیلی آگاہی فراہم کرنے کے ساتھ ساتھ اکثر اوقات مسئلے کا حل بھی پیش کرتا ہے۔ اگر کوئی ویب سائیٹ وائرس سے متاثر ہو چکی ہو اور گوگل نے اسے بلیک لسٹ کر دیا ہو تو ویب سائیٹ وائرس سے پاک کرنے کے بعد ویب ماسٹر ٹول کے ذریعے ہی گوگل کو درخواست دی جاتی ہے کہ ویب سائیٹ کو بلیک سے وائٹ لسٹ میں منتقل کر دو۔

ویب سائیٹ بنانے کے بعد سب سے پہلا کام یہی کریں کہ گوگل کی ان دونوں سہولیات کو اپنی ویب سائیٹ کی ہمہ وقت دیکھ بھال پر لگا دیں۔ یوں ویب سائیٹ کے حالات سے مکمل آگاہی ہوتی رہتی ہے اور مسئلہ کی صورت میں فوری سدِباب ممکن ہو سکتا ہے۔
گو کہ گوگل ویب ماسٹر ٹول وائرس وغیرہ کے حملہ کی نشاندہی کر دیتا ہے لیکن مزید حفاظتی اتنظامات میں موجود خرابیوں سے آگاہ رہنے یعنی ویب سائیٹ میں آخر کیا کیا کمی ہے جس کی وجہ سے وائرس وغیرہ کا حملہ ہو سکتا ہے، اس بارے میں جاننے کے لئے ویب سائیٹ ڈیفنڈر(Website Defender) جیسی مفت سروس سے بھی فائدہ اٹھایا جا سکتا ہے۔ ایسی سہولیات زیادہ تر ممکنہ حملے سے پہلے ہی نشاندہی کر دیتی ہیں کہ فلاں فلاں کوڈ یا فائل میں فلاں فلاں قسم کی خرابی ہے جس کے سہارے وائرس حملہ آور ہو سکتا ہے۔ ”ویب سائیٹ ڈیفنڈر“ کے ذریعے ویب سائیٹ کو چیک کر کے اس میں موجود کمزوریوں کو دور کیا جاسکتا ہے۔ اگر ویب سائیٹ ورڈپریس سی ایم ایس کے ذریعے بنائی گئی ہے تو پھر ویب سائیٹ ڈیفنڈر والوں کا ڈبلیوپی سکیورٹی سکین پلگ ان(WP Security Scan) زبردست ہے۔ اس کے علاوہ وقتاًفوقتاً سوکوری سکیورٹی(Sucuri Security) جیسی سروس کے ذریعے ویب سائیٹ سکین کرتے رہنا بھی بہتر ہوتا ہے تاکہ حالات سے آگاہی ہوتی رہے۔

ویب سائیٹ وائرس سکین کرنے کے چند دیگر لنک

McAfee SiteAdvisor
Norton Safe Web
AVG Online Web Page Scanner
ScanURL.net
Virus Total Scanner

چند ضروری باتیں

»»»   اکثر اوقات وائرس/مال ویئر وغیرہ لوکل مشین سے ہی ویب سائیٹ پر اپلوڈ ہوتے ہیں اس لئے ہمیشہ اپنی مشین کا خاص خیال رکھیں اور بہتر اینٹی وائرس استعمال کریں۔

»»»   ویب سائیٹ کی کوئی نئی فائل بنانے، ایڈیٹ یا اپلوڈ کرنے اور ویب سائیٹ کے کسی بھی قسم کے کنٹرول پینل میں لاگ ان ہونے کے لئے ہمیشہ قابل اعتماد یعنی ہر قسم کے وائرس اور کی لوگر سے پاک مشین کا استعمال کریں۔

»»»   کسی غیر مستند ذرائع سے موصول ہونے والی فائل کو بغیر تصدیق کے ویب سائیٹ پر ہرگز اپلوڈ نہ کریں۔ اسی طرح پلگ ان اور اس جیسی دیگر چیزیں ہمیشہ سی ایم ایس کی آفیشیل ویب سائیٹ سے ڈاؤن لوڈ کر کے استعمال کریں۔

»»»   کچھ عرصے بعد ویب سائیٹ کے ایڈمن سے متعلق پاسورڈ تبدیل کرتے رہیں بلکہ اس کو اپنی عادت بنا لیں۔ اگر ہو سکے تو ای میل ایڈریس بھی تبدیل کریں۔

»»»   پاسورڈ ہمیشہ بے ڈھنگ قسم کا رکھیں یعنی کسی چیز وغیرہ کا نام یا لغت میں موجود کوئی لفظ نہ رکھیں اور پاسورڈ میں حروف کے ساتھ ساتھ نشان اور نمبروں کا استعمال بھی کریں۔

»»»   ویب سائیٹ اور اس کی ہوسٹنگ پر ایڈمن لیول کے بے جا اور غیرضروری اکاؤنٹ نہ بنائیں۔

»»»   ویب ہوسٹنگ پر موجود فائلز اور ڈائریکٹریز(فولڈرز) کی پرمیشن (Permissions) سخت سے سخت رکھیں۔ سی ایم ایس کی صورت میں اس کے ڈویلپر کی فراہم کردہ پرمیشن ہی رکھیں۔

»»»   سی ایم ایس استعمال کرنے کی صورت میں جیسے ہی سی ایم ایس یا اس کے کسی پلگ ان کے اپڈیٹ کی اطلاع موصول ہو تو فوراً اسے اپڈیٹ کریں۔

»»»    کسی بڑی اپڈیٹ کے بعد یا وقتاً فوقتاً ویب سائیٹ کی فائلوں، ڈیٹابیس اور دیگر ضروری سیٹنگز کا بیک اپ ضرور بنا کر محفوظ کریں۔

»»»   اگر آپ ڈویلپر ہیں تو کم از کم کبھی کبھار اپنے لکھے ہوئے کوڈ پر نظر مارتے رہیں کہ کہیں کوئی غیر ضروری کوڈ تو شامل نہیں ہو چکا۔

»»»   انٹرنیٹ کے استعمال کے ٹولز جیسے براؤزر اور ایف ٹی پی کلائنٹ وغیرہ کے ہمیشہ تازہ ترین ورژن استعمال کریں۔

»»»   ٹیکنالوجی کے معاملے میں یوں تو میں خود بھی دوستوں پر خاصہ اعتماد کرتا ہوں اور بہت سارے دوست مجھ پر اعتماد کرتے ہیں مگر سیانے کہتے ہیں کہ ”بوڑھی دادی“ جس کو ٹیکنالوجی کی الف ب کا بھی پتہ نہ ہو، پھر بھی اس پر ٹیکنالوجی کے معاملے میں اعتماد نہیں کرنا چاہئے۔ اگر مجبوری میں اعتماد کرنا پڑ بھی جائے تو فوراً ”توبہ“ (پاسورڈ اور دیگر معلومات تبدیل) کر لینی چاہئے ورنہ کوئی دھوکہ دے نہ دے، اگر خود ٹیکنالوجی دھوکہ دے جائے تو اچھے اچھے حسن ظن رکھنے والوں کا مال اور ایمان دونوں جاتے ہیں۔ اس لئے کل کو بدظن ہونے اور نقصان اٹھانے سے آج کی سیدھی بات اور احتیاط بہتر رہتی ہے۔

 
پِنگ ڈام کے ٹولز کے ذریعے ویب سائیٹ کھلنے کا وقت، صفحات و فائل کا سائز اور سرور کی حالت سے آگاہی حاصل کی جا سکتی ہے۔ یوں تصاویر، پلگ ان، تھیم اور دیگر چیزوں کے اضافے یا تبدیلی کے بعد دیکھ لیا جاتا ہے کہ کہیں ویب سائیٹ کا لوڈ بڑھ تو نہیں گیا اور ویب سائیٹ کھلنے میں زیادہ وقت تو نہیں لے رہی۔
مزید ویب سائیٹ کے الیکزا اور گوگل رینک، سرچ انجن میں پیج انڈیکس اور بیک لنکس وغیرہ دیکھنے کے لئے فائرفاکس کی ویب رینک ٹول بار بہترین ہیں۔

نوٹ:-

چند ضروری باتوں اور سہولیات کا ذکر کیا ہے جبکہ ان جیسی دیگر بے شمار مفت سہولیات دستیاب ہیں۔ تلاش کرنے سے ایسی کئی مل جاتی ہیں۔ اگر آپ کی نظر میں کوئی اچھی سروس یا بہتر معلومات ہو تو امید کرتا ہوں کہ آپ مجھے سیکھانے میں کنجوسی نہیں کریں گے۔

اگلا حصہ:- ویب سائیٹ ہیکر کیا اور کیسے کرتے ہیں۔ملتی جلتی تحاریر:-     • ویب سائیٹ ہیکر کیا اور کیسے کرتے ہیں     • آپ کو پاک اردو انسٹالر کا کیا فائدہ؟     • پاکستان میں ”انگریزیا“ کی بیماری     • اردو بلاگ کی ٹریفک کیسے بڑھائیں؟     • اردو اور اینڈرائڈ موبائل

کافی سارے نکمے دوستوں کا نا ہونا۔
یعنی زیادہ لوگوں کا خیال ہے کہ اردو بلاگوں پر وزیٹر کم ہونے کی وجہ کافی سارے نکمے دوستوں کا نہ ہونا ہے۔ اگر اس جواب کا انتخاب مذاق میں کیا گیا ہے تو پھر سب جائز ہے اور اگر واقعی سنجیدگی سے یہ جواب منتخب کیا گیا ہے تو پھر میرا موڈ مزاحیہ ہو رہا ہے۔ خیر ”نکمے“ دوستوں کی فوج بھی بنا لی جائے تو پھر بھی دنیا میں ایک عام ویب سائیٹ یا بلاگ کو جتنی ٹریفک ملتی ہے اس کے مقابلے میں یہ ”نکمی“ فوج کسی کام کی نہیں، کیونکہ روزانہ کے وزیٹر ہزاروں میں ہوتے ہیں اور یہ فوج صرف چند سو ”نکموں“ تک ہی محدود ہوسکتی ہے۔ آپ زیادہ سے زیادہ کتنے ”نکموں“ کو دوست بنا لو گے؟ پانچ سو؟ ہزار دو ہزار؟ لیکن یہی نکمے روزانہ بلاگ تو نہیں پڑھیں گے، آخر نکمے ہیں تو پھر ”کڑیوں“ کی تلاش بھی تو فرض العین ہے۔ لہذا کم از کم میں اس جواب کو تسلیم نہیں کرتا۔

دوسرے نمبر پر رہنے والا جواب تھا ”دشمنیاں“۔
لے دس۔۔۔ ایک تو اس جواب سے بہت لطف اندوز ہوا اور ساتھ ہی یہاں پر مجھے وہ گانا یاد آ رہا ہے ”حد کر دی آپ نے، حد کر دی آپ نے“۔ یارو! دشمنیاں بلاگ کی ٹریفک کم نہیں کرتیں بلکہ یہ تو ٹریفک بڑھاتی ہیں۔ گو کہ اردو بلاگستان میں کوئی خاص دشمنی نظر نہیں آتی مگر پھر بھی اکادکا چھوٹی چھوٹی جھڑپوں نے تو لوگوں کے بلاگوں پر میلے لگا دیئے اور ایک آپ ہو جو کہہ رہے ہو کہ دشمنیاں ٹریفک کم کرتی ہیں۔ کبھی غور کرو تو پتہ چلے گا کہ آپ کے بلاگ پر سب سے زیادہ نظر آپ کے دشمن ہی رکھتے ہیں، البتہ اکثر اوقات دشمن تبصرہ کرنے سے گریز کرتے ہیں۔ خیر مذاق کے علاوہ بات یہ ہے کہ نظریات اور سوچ کا اختلاف ہونا کوئی بڑی بات نہیں بلکہ کسی نہ کسی جگہ ہر انسان کو دوسرے سے اختلاف ہو جاتا ہے، تو اس کا مطلب دشمنی تھوڑی ہوتا ہے۔ اگر ہم اختلاف کو دشمنی سمجھنے لگیں تو پھر ساری دنیا ہی ہماری دشمن ہے بلکہ ہم خود اپنے دشمن ہے کیونکہ کبھی کبھار ہمارے نفس اور ضمیر میں بھی تو اختلاف ہو جاتا ہے۔ نظریات اور سوچوں کے اختلاف کو دشمنیاں نہ سمجھو، تلواریں میانوں میں ہی رکھو اور بحث برائے تعمیر کو فروغ دیتے ہوئے ایک دوسرے کو اچھے طریقے سے سمجھو اور اپنی بات سمجھاؤ۔

تیسرے نمبر والا جواب تھا ”سرچ انجن میں خاص اردو میں تلاش نہ کرنا“۔
یہ جواب میں نے شامل کیا تھا اور میری نظر میں یہی سب سے بڑی وجہ ہے۔ اس وجہ پر تفصیلی بات ”اردو بلاگ کی ٹریفک کیسے بڑھائیں؟“ والی تحریر میں کر چکا ہوں۔ ویسے اس جواب کے شامل کرنے سے پہلے بھی ایک جواب موجود تھا جو کہ یوں تھا ” is tarah search karnay walay loag “۔ اس سے مراد یہ ہے کہ رومن اردو میں تلاش کرنے والے لوگ۔ مسئلہ صرف رومن اردو میں تلاش کا ہی نہیں بلکہ اردو مواد کے لئے انگریزی میں تلاش کا زیادہ ہے تو اس لئے میں نے ”سرچ انجن میں خاص اردو میں تلاش نہ کرنا“ شامل کیا تھا۔

دو جواب یہ تھے کہ ”کم مواد“ اور ” اردو بلاگنگ دنیا سے باہر نہ دیکھنا“۔
میرے خیال میں یہ دونوں وجوہات بھی ہیں اور ان پر تفصیلی بات ”اردو بلاگوں پر تھوڑے قارئین کی وجوہات“ والی تحریر میں کر چکا ہوں۔

ایک جواب تھا ”عام لوگوں کو پتہ ہی نہ ہونا کہ بلاگ کیا ہے“۔
انٹرنیٹ صارفین کو اس سے کوئی لینا دینا نہیں ہوتا کہ آپ کی ویب سائیٹ، بلاگ ہے یا دیگر کسی قسم کی ہے۔ صارفین کو بس اپنی مطلوبہ چیز چاہئے، وہ بلاگ سے ملے یا کہیں اور سے۔ اس لئے صارف کو پتہ ہو یا نہ ہو کہ وہ جس جگہ موجود ہے وہ بلاگ ہے یا کچھ اور ہے، اس سے کوئی فرق نہیں پڑتا۔ البتہ اردو بلاگران کی تعداد میں سست اضافے کو اس تناظر میں دیکھا جا سکتا ہے جبکہ میری نظر میں کم وزیٹر کی یہ وجہ نہیں ہو سکتی۔

”یکسانیت“ اور ”محدود سوچ“ بھی جوابات میں شامل تھے۔
ویسے مجھے تو کوئی خاص یکسانیت نظر نہیں آتی۔ ہر بلاگر اپنا ایک الگ انداز رکھتا ہے۔ اگر آپ ایک بلاگر کے ایک ہی طرزِ تحاریر کو یکسانیت کہہ رہے ہیں تو پھر میں کچھ نہیں کہہ سکتا کیونکہ میرے خیال میں ایسی یکسانیت ہر جگہ ہوتی ہے۔ ہر انسان کا اپنا ایک انداز اور کسی خاص طرف زیادہ لگاؤ ہونے کی وجہ سے یکسانیت آ ہی جاتی ہے۔ رہی بات محدود سوچ کی تو اس پر صرف اتنا کہوں گا کہ اگر پاکستانی اردو بلاگران کی سوچ محدود ہے تو پھر پاکستانی انگریزی بلاگران کی سوچ بھی محدود ہی ہے کیونکہ ہمارے بلاگ اور ہماری تحاریر ہماری سوچ کی عکاس ہیں اور ان پر ہمارے معاشرتی حالات و واقعات کا اثر تو ضرور ہونا ہے۔ لہذا محدود سوچ ہونے کی وجہ سے انگریزی بلاگوں کو وزیٹر مل رہے ہیں تو پھر اردو کو کیوں نہیں؟

آخری جواب تھا ”غیر معیاری مواد“۔
یہ ایسا جواب ہے جسے کسی نے منتخب نہیں کیا تھا اور اسے منتخب ہونا بھی نہیں چاہئے تھا، کیونکہ میرے خیال میں زیادہ تر اردو بلاگوں کا مواد معیاری ہے۔ عام طور پر میں نے جو دیکھا ہے اس کے مطابق میرا خیال ہے، جو کہ غلط بھی ہو سکتا ہے کہ اگر آپ اردو بلاگوں کے مواد کا اپنے پاکستانی انگریزی بلاگران کی yap, yup قسم کی انگریزی میں لکھی ہوئی تحریر سے موازنہ کریں تو خود اندازہ ہو جاتا ہے کہ کونسا مواد معیاری ہے اور ساتھ ساتھ یہ بھی پتہ چل جاتا ہے کہ کون اپنی بات بہتر اور آسان انداز میں دوسروں تک پہنچا رہا ہے۔ میں اکثر دوستوں کو کہتا ہوں کہ یہ سب ترقی، پیٹ بھرے اور بڑی سرکار ہونے کی باتیں ہیں، جو ”ہیری پوٹر“ اتنی کامیاب ہو گئی ورنہ ہمارے عمروعیار کی زنبیل میں ایسی ہزاروں کہانیاں موجود ہیں۔

یاد رہے یہ تجزیہ بین الاقوامی بلاگران سے موازنہ کر کے نہیں کیا گیا بلکہ یہ اپنے پاکستانی انگریزی بلاگران کو دیکھتے ہوئے کیا گیا ہے کیونکہ وہ بھی اسی معاشرہ کا حصہ ہیں اور انہیں تو ٹریفک مل رہی ہے مگر اردو بلاگ ہی عدم تخفظ کا شکار معلوم ہوتے ہیں۔ موازنہ کریں تو اردو بلاگر کسی سے کم نہیں بلکہ دو قدم آگے ہی ہیں۔ آپ خود اندازہ کریں کہ ہر چیز کی کمی کے باوجود اردو بلاگنگ کا سفر رواں دواں ہے اور دن بدن ترقی کر رہا ہے۔ ویسے پاکستانی انگریزی بلاگر اور اردو بلاگر کا تفصیلی موازنہ پھر کبھی سہی۔ چلتے چلتے یہ بات بھی ذہن میں رکھیں کہ پاکستانی انگریزی بلاگران سے ہمیں کوئی دشمنی نہیں بلکہ وہ بھی ہمارے اپنے ہیں۔ملتی جلتی تحاریر:-     • اردو بلاگ کی ٹریفک کیسے بڑھائیں؟     • اردو بلاگوں کے تھوڑے قارئین کی وجوہات     • بلاگ کیا ہے؟     • اردو فارمیٹر – شامل پلگ ان – اردو انگریزی بلاگنگ ایک ساتھ     • ویب ہوسٹنگ پر بذریعہ ایف ٹی پی کلائنٹ فائل اپلوڈ کرنا

میری نظر میں اردو بلاگوں پر ٹریفک کم ہونے کی دوسری بڑی وجہ کم مواد ہے۔ گو کہ اب انٹرنیٹ پر اچھی بھلی اردو نظر آنا شروع ہو گئی ہے لیکن ابھی تک اردو بلاگوں/ویب سائیٹوں پر اتنا مواد نہیں ہو سکا کہ تمام ضروری چیزوں کے بارے میں معلومات مل سکے۔ یار لوگ کہتے ہیں کہ فلاں بندہ بلاگنگ نہیں بلکہ کاپی پیسٹ کرتا ہے تو اس پر میرا خیال ہے کہ اس وقت ہمیں یہ چیز نہیں دیکھنی چاہئے کہ فلاں بلاگنگ کر رہا ہے یا نہیں فی الحال یہ دیکھنا چاہئے کہ کیا فلاں کا مواد انٹرنیٹ پر اردو کے حوالے سے بہتر اضافہ ہے یا نہیں۔ ویسے بھی بلاگنگ کی تعریف کرنے چلیں تو دو صورتیں سامنے آئیں گی۔ ایک صورت میں اپنی دیگر قسم کی ویب سائیٹوں کو بلاگ کہنے والے باہر نکل جائیں گے اور پیچھے دو چار لوگ رہ جائیں گے۔ ایسی صورت میں شاید آپ میرا بھی خروج لگا دیں، اور دوسری صورت میں زیادہ تر ویب سائیٹوں کا شمار بلاگوں میں ہونے لگے گا۔ خیر یہ ایک علیحدہ اور تفصیل و بحث طلب موضوع ہے۔ فی الحال ہمیں بھیڑ چال کی بجائے نئے سے نیا اور بہتر سے بہتر اردو مواد انٹرنیٹ پر ڈالنا چاہئے تاکہ جب لوگ اردو مواد تلاش کریں تو انہیں معقول مواد مل سکے۔ کافی عرصہ پہلے ”ایک بلاگر ایک کتاب“ کے نام سے مہم شروع ہوئی تھی اور چند ایک بلاگر ہی اس پر عمل کر سکے تھے۔ کاش پھر کوئی ایسی یا اس سے ملتی جلتی مہم شروع ہو اور ہم مل کر بہتر اردو مواد انٹرنیٹ پر لا سکیں۔

اردو بلاگوں پر ٹریفک کم ہونے کی تیسری وجہ گوکہ اتنی بڑی نہیں لیکن آج کل جس انداز میں ہم لوگ چل رہے ہیں، اس نے عجیب سی صورت حال بنا دی ہے۔ اردو بلاگران اور اردو پڑھنے کے خواہش مند چند افراد کا ایک گروہ وجود میں آچکا ہے۔ اردو کے حوالے سے تقریباً یہی لوگ آپ کو مختلف اردو فورمز پر ملیں گے، یہی لوگ اردو بلاگنگ میں نظر آئیں گے اور فیس بک پر بھی یہی لوگ ہوں گے جو اردو لکھ رہے ہوں گے یعنی اردو کے حوالے سے جہاں دیکھو یہی چند مٹھی بھر لوگ۔ ایک مسئلہ یہ بھی ہے کہ اس گروہ میں اضافہ بہت آہستہ سے ہو رہا ہے۔ چھوٹی سی بات یہ کہ مجھے لگتا ہے، جو کہ غلط بھی ہو سکتا ہے کہ اردو والے علیحدہ گروہ (Isolated Group) بنائے بیٹھے ہیں اور بہت ہی کم لوگ اس گروہ سے باہر دیکھتے ہیں اور جنہوں نے دیکھا ان کی اکثریت دنیا کی ”احساسِ کمتریوں“ سے متاثر ہو کر اردو سے دور ہو گئی۔ جبکہ ہونا تو ایسا چاہئے تھا کہ وہ باہر دیکھتے اور مزید لوگوں کو اپنی طرف قائل کرتے، مگر افسوس! وہ خود قائل ہو گئے۔

فیس بک پر اردو کے حوالے سے کئی مختلف گروپ بنا دیئے گئے ہیں لیکن جس گروپ میں دیکھو یہی مٹھی بھر لوگ ہیں اور تمام گروپ ایک ہی طرز پر چل رہے ہیں۔ وہی لوگ گروپ ”الف“ میں ہیں، وہی ”ب“ میں اور وہی ”ج“ میں۔ سونے پر سہاگہ یہ کہ ہم اپنی تحریر شیئر تو مختلف گروہوں میں کرتے ہیں مگر ان گروہوں میں موجود وہی مٹھی بھر لوگ ہیں۔ دیکھا جائے تو ان گروہوں کے لوگ تو ویسے ہی اردو سیارہ اور اردو کے سب رنگ وغیرہ دیکھتے ہیں اور تحریر تک پہنچ آتے ہیں۔ بے شک انہیں مخصوص گروہوں میں ایک ہی تحریر بار بار ایک دوسرے کے سامنے پیش کریں مگر ساتھ ساتھ ہمیں نئی تحاریر ادھر ادھر ایسے گروہوں میں اور ایسے لوگوں سے بھی شیئر کرنی چاہئے جو اردو مواد پڑھنا تو چاہتے ہیں لیکن آج تک اردو بلاگستان تک رسائی نہیں حاصل کر پائے۔ اگر آپ سوشل نیٹ ورکنگ ویب سائیٹوں پر کسی سیاسی، مذہبی یا ٹیکنالوجی وغیرہ کے متعلق پاکستانی گروپوں سے تعلق رکھتے ہیں تو وہاں پر موضوع سے متعلقہ اردو تحاریر بھی شیئر کیا کریں۔ یہ نہ سوچیں کہ باقی سب انگریزی تحریر شیئر کر رہے اور آپ اردو، بس یہ دیکھیں کہ جہاں آپ تحریر شیئر کر رہے ہیں وہاں پر موجود لوگ اردو پڑھنا جانتے ہیں یا نہیں اور شیئر کی جانی والی تحریر موضوع سے تعلق رکھتی ہے یا نہیں۔ مزید ہمیں ادھر ادھر ہر جگہ اردو لکھنی چاہئے، دیگر گروہوں کے ساتھ شامل ہو کر اردو میں بات چیت کرنی چاہئے اور زیادہ سے زیادہ لوگوں کو اس طرف لانا چاہئے۔ جیسا کہ پچھلی تحریر میں لکھا تھا کہ انٹرنیٹ پر اردو لکھنے اور پڑھنے کے خواہش مند افراد خاصی بڑی تعداد میں موجود ہیں مگر غلط انداز میں تلاش کرنے کی وجہ سے ان کی اردو مواد تک رسائی نہیں ہو پاتی۔

اردو کے چند مخصوص گروہوں سے باہر نکلیں اور زیادہ سے زیادہ لوگوں تک اردو بلاگستان، اردو لکھنے اور گوگل میں اردو میں تلاش کرنے کی آواز پہنچائیں۔ یوں خودبخود اردو بلاگوں کی ٹریفک بڑھ جائے گی۔

چلتے چلتے بونگی نما خوش فہمی:- آپس کی بات ہے کشتی کنارے کے قریب ہے اور آخری منجدھار کشتی ڈبونے کی پوری کوشش کر رہی ہے۔ اب دیکھتے ہیں کہ کامیابی سے کنارے لگتی ہے یا ڈوب جاتی ہے۔ ویسے مزہ تو اسی میں ہے کہ جس کے سنگ چلے تھے اگر وہ ڈوبے تو اس کے ساتھ ہی ڈوب جائیں۔ بھیچ منجدھار میں ساتھ چھوڑنا تو بے وفائی عظیم ہے۔ پیوستہ رہ شجر سے امید بہار رکھ۔

ضروری نوٹ:-

اگلی تحریر اس سلسلہ کی تیسری اور آخری تحریر ہو گی۔ اس میں شعیب صفدر صاحب کے اردو بلاگر گروپ میں شروع کردہ سوالنامہ کے ایک ایک جواب کو دیکھتے ہیں، لیکن اس سے پہلے ٹیگ کا ایک سلسلہ شروع کرتے ہیں۔ جس میں لکھنا صرف یہ ہے کہ آپ کی نظر میں اردو بلاگوں کے قارئین/وزیٹر کم ہونے کی وجوہات کیا ہیں اور ان کا سدِباب کیسے کیا جا سکتا ہے؟ بہتر تو یہ ہے کہ آپ تھوڑی تفصیلی وضاحت کریں لیکن یہ نہ ہو کہ تفصیل میں جاتے جاتے کوئی بھی کچھ بھی نہ لکھے، اس لئے لازمی نہیں کہ آپ کوئی لمبی چوڑی تحاریر میں تجزیہ پیش کریں بلکہ بے شک چند سطور ہی لکھ دیں تو ہمیں ایک دوسرے سے کافی کچھ سیکھنے کو مل جائے گا۔

ہاں تو میں اس سلسلہ میں ٹیگ کرتا ہوں پورے ”اردو بلاگستان“ کو۔۔۔ مزاح لکھنے والے مزاحیہ انداز میں اس مسئلہ کو بیان کریں، فلاسفر فلسفہ جھاڑیں، جن کو ہم جیسے نکمے دوستوں کی کمی ہے وہ اس مسئلہ کی وضاحت کرتے ہوئے نکمے لوگوں کی طرف دوستی کا ہاتھ بڑھائیں، جو اپنے دشمنوں سے تنگ ہے وہ حفاظتی تدابیر لکھیں اور جو یکسانیت و محدود سوچ سے بیزار ہیں وہ نئے ”آئیڈیاز“ دیں تاکہ بہتری کی طرف سفر کیا جا سکے۔

اس تحریر کا اگلا حصہ ”سوال: اردو بلاگ پر کم وزیٹر کی وجوہات – جواب: حد کر دی ہم نے“ ملاحظہ فرمائیں۔ملتی جلتی تحاریر:-     • سوال: اردو بلاگ پر کم وزیٹر کی وجوہات – جواب: حد کر دی ہم نے     • اردو بلاگ کی ٹریفک کیسے بڑھائیں؟     • آپ کو پاک اردو انسٹالر کا کیا فائدہ؟     • بلاگ کیا ہے؟

اکثر سننے میں آیا ہے کہ اردو بلاگوں پر ٹریفک بہت کم بلکہ نہ ہونے کے برابر ہے۔ میرے خیال میں یہ بات سو فیصد درست ہے۔ اگر ایسا ہی ہے تو پھر اس کی وجہ کیا ہے؟ شاید یہی وجہ معلوم کرنے یا اندازہ لگانے کے لئے کچھ دن پہلے شعیب صفدر صاحب نے فیس بک پر ایک سوالنامہ شروع کیا۔ میں نے اس سوالنامہ میں تین جواب منتخب کئے۔ اس سوالنامہ پر تفصیلی بات کرنے سے پہلے ہم دیکھتے ہیں کہ کسی بلاگ کے قارئین کتنی اقسام کے ہوتے ہیں۔ میں عام طور پر قارئین کو دو اقسام میں تقسیم کرتا ہوں۔

دوست/مستقل قارئین

اجنبی/غیر مستقل قارئین

گو کہ ان دو قسموں کو میں مزید کئی اقسام میں تقسیم کرتا ہوں لیکن یہاں صرف سرسری جائزہ لیتے ہیں۔

کسی بلاگ کے دوست یا مستقل قارئین ایسے لوگ ہوتے ہیں جو ہر نئی تحریر کو مکمل پڑھیں یا نہ پڑھیں لیکن اس پر نظر ضرور رکھتے ہیں یا پھر کم از کم ان کو یہ علم ضرور ہوتا ہے کہ بلاگ پر کیا چل رہا ہے۔ ایسے قارئین زیادہ تر بلاگ ایگریگیٹر اور فیڈ ریڈر وغیرہ کے ذریعے بلاگ تک پہنچتے ہیں یا پھر ان قارئین میں ایسے لوگ بھی شامل ہوتے ہیں جو سوشل نیٹ ورکنگ ویب سائیٹ پر بلاگر کے دوست ہوتے ہیں۔ میرے خیال میں کسی بھی بلاگ کے دوست یا مستقل قارئین کی تعداد، بلاگ کے دیگر قارئین کے مقابلے میں آٹے میں نمک کے برابر ہونی چاہئے لیکن اردو بلاگوں کا حال یہ ہے کہ انہیں صرف یہی ”نمک“ ہی دستیاب ہے۔

قارئین کی دوسری قسم ہے اجنبی یا غیر مستقل۔ ایسے قارئین کی زیادہ تعداد سرچ انجن وغیرہ سے تلاش کرتے ہوئے بلاگ تک پہنچتی ہے۔ ایسے قارئین کو بلاگ کی شکل و صورت سے کوئی لینا دینا نہیں ہوتا اور نہ ہی وہ بلاگر کی شہرت سے کوئی لگاؤ رکھتے ہیں۔ ان کا مقصد صرف اپنی درکار معلومات کا حصول ہوتا ہے۔ بلاگ پر موجود معلومات ہی اصل سرمایہ ہے کیونکہ جب زیادہ اور معیاری معلومات بلاگ پر ہو گی تو پھر ہی لوگ سرچ انجن سے بلاگ پر پہنچ کر رکیں گے اور اسی نسبت سے ”مستقل قارئین“ کی تعداد میں بھی اضافہ ہوتا جائے گا یعنی جب کسی کو بلاگ کی معلومات اچھی لگے گی تو وہ اسے بک مارک وغیرہ کرے گا یا کسی دوسرے ذریعہ سے بلاگ کا مستقل قاری بن جائے گا۔

خیر اب آتے ہیں اردو بلاگوں کی ٹریفک کی طرف۔

اردو بلاگوں کے قارئین میں سب سے پہلے تو خود اردو ”بلاگران“ ہی ہیں اور فی الحال یہی سب سے بڑی تعداد ہے۔ اس کے بعد دوسری بڑی تعداد مختلف اردو فورمز کے ممبران کی ہے۔اس کے بعد اردو بلاگران کا اپنا حلقہ احباب اور پھر چند ایک ایسے فیس بکی لوگ ہیں جن تک غلطی سے کسی اردو بلاگ کا لنک پہنچ جاتا ہے۔ ان سب کے بعد نہایت ہی کم تعداد سرچ انجن سے آتی ہے۔

میری نظر میں اردو بلاگوں کی ٹریفک /وزیٹر/قارئین کم ہونے کی بڑی تین وجوہات ہیں اور یہی تین میں نے شعیب صفدر صاحب کے سوالنامہ میں منتخب کی تھیں بلکہ میری نظر میں جو سب سے بڑی وجہ ہے وہ سوالنامہ میں موجود ہی نہیں تھی اور پھر میں نے شامل کی۔

تین بڑی وجوہات یہ ہیں۔

1: سرچ انجن میں خاص اردو میں تلاش نہ کرنا۔

2: اردو بلاگوں پر کم مواد۔

3: اردو بلاگران کا اردو بلاگنگ کی دنیا سے باہر نہ دیکھنا۔

پہلی بات تو یہ ہے کہ ہمارے ہاں انٹرنیٹ صارفین کی بہت کم تعداد اس بات کا علم رکھتی ہے کہ کمپیوٹر پر انگریزی کی طرح براہ راست اردو بھی لکھی جا سکتی ہے۔ بلکہ کئی لوگ تو ابھی بھی اسے ”راکٹ سائنس“ سمجھتے ہیں، گو کہ راکٹ سائنس بھی اب کوئی راکٹ سائنس نہیں رہی (بقول غلام عباس)۔ اور تو اور پچھلے دنوں فیس بک کے ایک گروپ پاکستانی پروبلاگرز میں ایک صاحب اردو لکھنے والوں کو مخاطب کر کے فرمانے لگے کہ آپ لوگ دھونس جمانے کے لئے اردو لکھتے ہو۔ ان کا خیال تھا چونکہ اردو لکھنا مشکل ہے اس لئے یہ لوگ اردو لکھ کر یہ ثابت کرتے ہیں کہ ہم بڑی چیز ہیں جبکہ ان صاحب کو اصل علم ہی نہیں تھا۔ خیر یہی علم نہ ہونے کی وجہ سے اکثریت گوگل اور دیگر سرچ انجن میں خاص اردو میں تلاش نہیں کرتی۔ مزید جن کو اردو لکھنے کا علم ہے ان کی بھی بہت کم تعداد خاص اردو میں تلاش کرتی ہے۔ اگر آپ سمجھتے ہیں کہ لوگ اردو پڑھنا نہیں چاہتے تو میری نظر میں یہ غلط ہے کیونکہ گوگل کے اعدادوشمار دیکھیں تو پتہ چلتا ہے کہ پاکستانی انٹرنیٹ صارفین کی بہت بڑی تعداد اردو مواد پڑھنے کو ترجیح دیتی ہے لیکن وہ غلط انداز میں تلاش کرنے کی وجہ سے اصل اردو مواد تک نہیں پہنچ پاتی۔ اب جیسے لوگ مواد تو اردو میں چاہتے ہیں لیکن تلاش انگریزی میں کرتے ہیں اور کسی بھی کیوری کے ساتھ in Urdu جیسے الفاظ کا اضافہ کر دیتے ہیں یا پھر رومن اردو میں تلاش کرتے ہیں۔ پاکستان سے ایک مہینے میں گوگل پر تلاش ہونے والے چند کی ورڈز(Key Words) کو ایک گوشوارے کی صورت میں پیش کر رہا ہوں۔ اس پر غور کریں تو اندازہ ہوتا ہے کہ اصل مسئلہ کہاں ہے اور اردو بلاگوں کو سرچ انجن سے ٹریفک کیوں نہیں مل رہی۔

یاد رہے یہ چند الفاظ پاکستان سے ایک مہینے میں تقریباً جتنی مرتبہ تلاش کئے گئے وہ مثال کے طور پر پیش کئے ہیں۔ اعدادوشمار کو دیکھتے ہوئے اب آپ خود اندازہ کر لیں کہ خاص اردو الفاظ کے ساتھ تلاش اگر زمین پر ہے تو اس کے متبادل انگریزی الفاظ کے ساتھ تلاش آسمان پر ہے۔ خاص اردو میں تلاش کئے گئے الفاظ والی ٹریفک ہی اردو ویب سائیٹوں اور بلاگوں کو ملے گی جبکہ دوسرے لوگ جو چاہتے تو اردو مواد ہیں لیکن ان کی غلط تلاش کی وجہ سے وہ ادھر ادھر بھٹک جاتے ہیں اور بہتر اردو مواد تک نہیں پہنچ پاتے۔ یوں لوگوں کو مواد نہیں ملتا اور اردو بلاگوں کو ٹریفک نہیں ملتی۔ موجودہ صورت حال میں اگر اردو بلاگوں کی ٹریفک دیکھی جائے اور اردو مواد پڑھنے کے خواہش مند افراد کی تعداد دیکھی جائے تو اس میں بہت فرق ہے۔ اس کی سیدھی سی وجہ یہ ہے کہ لوگ خاص اردو میں تلاش نہیں کرتے کیونکہ انہیں اردو لکھنی نہیں آتی یا اس کا علم ہی نہیں۔

کسی بھی ویب سائیٹ کی ٹریفک کا اصل دارومدار سرچ انجن پر ہی ہوتا ہے اور اردو بلاگوں کو یہی اصل ٹریفک نہ ہونے کے برابر مل رہی ہے۔ اگر آپ چاہتے ہیں کہ اردو بلاگوں پر ٹریفک بڑھے تو لوگوں کو صرف اردو فانٹ ہی نہیں بلکہ ساتھ ساتھ اردو لکھنے کی ترغیب بھی دیں۔ سرچ انجن میں خاص اردو میں تلاش کرنے کا کہیں اور اس کے متعلق تفصیلی فوائد سمجھائیں۔

ہو سکتا ہے آپ یہاں اس لئے آئے ہوں کہ چلو سرچ انجن کے ذریعے ٹریفک بڑھانے کی جدید تکنیک سیکھتے ہیں، لیکن یہاں ایسا کچھ نہ پا کر یقیناً آپ کو مایوسی ہوئی ہو گی، جس کے لئے میں معذرت چاہتا ہوں۔ باقی آپ خود غور کریں تو پتہ چلے گا کہ اس وقت اردو بلاگران کی یہ پریشانی نہیں کہ سرچ انجن میں ایک دوسرے سے زیادہ نمایا جگہ کیسے حاصل کی جائے بلکہ پریشانی تو یہ ہے کہ تمام اردو بلاگران پہلے سے سرچ انجن میں نمایا جگہوں پر بیٹھے ہیں لیکن کوئی تلاش کرنے والا ہی نہیں۔ کبھی خاص اردو الفاظ میں تلاش کر کے دیکھئے گا تو پتہ چل جائے گا کہ اردو بلاگران کتنی نمایا جگہ پر ہیں لیکن۔۔۔
ارے! ایک دفعہ لوگوں کو اردو میں تلاش تو کرنے دو پھر اگر زندگی نے وفا کی تو سرچ انجن میں نمایا جگہ حاصل کرنے پر بھی اپنے محدود علم کے مطابق لکھ دیں گے، بلکہ تب ہم خود آپ سے ضد لگا کر نئی سے نئی تکنیک استعمال کریں گے اور جگہ جگہ یہ کہتے پھریں گے کہ دیکھو ہمارا ”رینک“ کتنا بلند ہے۔ فی الحال ہمیں ”رینک“ وغیرہ سے کوئی لینا دینا نہیں اور جس سے لینا دینا ہے اس کی کافی وضاحت کر دی ہے۔

اس تحریر کا اگلا حصہ ”اردو بلاگوں کے تھوڑے قارئین کی وجوہات“ ملاحظہ فرمائیں۔ملتی جلتی تحاریر:-     • آپ کو پاک اردو انسٹالر کا کیا فائدہ؟     • سوال: اردو بلاگ پر کم وزیٹر کی وجوہات – جواب: حد کر دی ہم نے     • موجودہ دور میں اردو زبان – جواب     • اردو بلاگوں کے تھوڑے قارئین کی وجوہات     • اردو فارمیٹر – شامل پلگ ان – اردو انگریزی بلاگنگ ایک ساتھ

آج میں نے انگلی کے ہلکے سے دباؤ سے پوری زمین گھما دی۔ لگتا ہے آپ کو پتہ نہیں چلا۔ پتہ چلتا بھی کیسے؟ زمین تو پہلے ہی گھوم رہی ہے اور زمین کے ساتھ ساتھ اس کا پورا کرہ گھوم رہا ہے تو پھر آپ کو کیسے پتہ لگتا کہ آج میں نے پوری دنیا گھمائی؟ صرف چند ایک چیزوں سے پتہ چل سکتا تھا، جیسے جلد ہی دن یا رات ہو جاتی، مگر میں بھی بڑا سیانا ہوں۔ کچھ اس طرح گھمائی کہ دن اور رات میں کوئی فرق نہیں پڑا یعنی سورج کے حساب سے ہی گھمائی۔ البتہ اس وقت کوئی آسمان کی طرف دیکھ رہا ہوتا تو شاید بادلوں وغیرہ سے پتہ چل جاتا مگر آسمان پر غور کرنا تو ویسے ہی بڑے عرصے سے ہم پر ”حرام“ کر دیا گیا ہے۔ باقی جہاں رات تھی وہاں یقیناً تاروں کی وجہ سے پتہ چل جاتا لیکن آج کل تارے کون دیکھتا ہے؟ وہ زمانے گئے جب عاشق چاند کو دیکھتے ہوئے اور تارے گنتے ہوئے راتیں گزار دیتے تھے۔ اجی! آج کل زمانہ بدل گیا ہے۔ کوئی کسی کے ہجر میں نہیں روتا۔ اِدھر رات ہوتی ہے اُدھر ایک نئی دنیا آباد ہوتی ہے۔ جب سارا جگ سوتا ہے تبھی موبائل آن ہوتا ہے۔ وہ جو سارا دن سوتی ہیں وہ رات کو سڑکوں پر ہوتی ہیں۔

او ہو بات کہاں نکل گئی۔ ہاں تو میں کہہ رہا تھا کہ میں نے زمین کچھ اس طرح گھمائی کہ اوپر والے گھوم کر نیچے گئے اور نیچے والے اوپر آ گئے۔ کیسی عجیب بات ہے کوئی الٹا ہونے کی وجہ سے گرا کیوں نہیں۔ اجی گرتا کیسے کشش ثقل (Gravity) نے ہر چیز کو اپنی طرف جو کھینچ رکھا ہے۔ کبھی کبھی میں سوچتا ہوں کہ قطب شمالی سوچتا ہو گا کہ میں اوپر ہوں اور قطب جنوبی نیچے ہے مگر قطب جنوبی پر جا کر دیکھا جائے تو قطب شمالی نیچے ہو جاتا ہے۔ یہ زمین بھی عجب شے ہے۔ جہاں جاؤ وہاں اوپر آسمان اور نیچے زمین ہوتی ہے۔ آپس کی بات ہے زمین پر تو سمتیں ہوتی ہیں کیا زمین کے مدار سے باہر بھی سمتیں ہوتی ہیں؟ وہاں یقیناً سیانے لوگ یہ کہتے ہوں گے کہ ہمارے دائیں طرف زمین ہے اور بائیں طرف فلاں سیارہ۔ اس کا مطلب ہے انسان ہر چیز کی پہچان دوسری چیز کی وجہ سے کرتا ہے۔ جیسے برائی نہ ہوتی تو کیسے پتہ چلتا کہ اچھائی کیا ہے۔ گرمی نہ ہوتی تو ٹھنڈک کا کیسے پتہ چلتا۔ اندھیرہ نہ ہو تو پھر روشنی کی قدر کون کرتا۔ یا پھر کہیں ایسا تو نہیں کہ ایک چیز کی غیر موجودگی ہی دوسری چیز ہوتی ہے۔ جیسے اچھائی کی غیرموجودگی برائی، گرمی کی غیرموجودگی ٹھنڈک اور روشنی کی غیر موجودگی اندھیرہ۔

معافی چاہتا ہوں جناب! ایک تو بات بات پر دماغ کھسک جاتا ہے اور بات کہاں کی کہاں نکل جاتی ہے۔ ہاں تو میں کہہ رہا تھا کہ زمین پر سمتیں ہوتی ہیں۔ دائیں بائیں اوپر نیچے۔ اوپر نیچے سے یاد آیا کہ اگر ہم اوپر کی طرف سفر کریں تو سب سے پہلے زمین کے مدار سے نکل کر خلاء میں داخل ہو جائیں گے، پھر سفر کرتے ہوئے کئی سیاروں کو دیکھیں گے۔ فرض کریں اگر ہم زمین سے مخالف کسی ایک سمت میں مسلسل سفر کرتے رہیں تو آخری منزل کیا ہو گی؟ کیا سائنس کے پاس اس کا کوئی جواب ہے؟ کیا مذاہب عالم کے پاس اس کا کوئی جواب ہے؟ فرض کریں سائنس کہتی ہے کہ کہکشاں در کہکشاں سفر کرتے رہیں تو اتنے کروڑ نوری سال کے بعد آخر پر ایک بہت بڑی پرت آ جائے گی۔ تو پھر میں یہ جاننا چاہتا ہوں کہ اس پرت کی دوسری طرف کیا ہو گا اور اس دوسری طرف کے بعد کیا ہو گا؟ فرض کریں کوئی مذہب یہ کہتا ہے کہ آخر پر جنت یا دوزخ آ جائے گی تو میں جاننا چاہتا ہوں کہ اس جنت یا دوزخ سے پار کیا ہوگا؟ یہاں پر مولبی صاحب سے کچھ کہتا چلوں کہ مولبی جی آپ سے گذارش ہے کہ ہاتھ تھوڑا ”ہولا“ ہی رکھنا۔ وہ کیا ہے کہ میں (م بلال م) اللہ پر مکمل یقین رکھتا ہوں اور محمدﷺ کو آخری نبی مانتا ہوں۔ آپ سوچ رہے ہوں کہ مولبی یہاں کہاں سے آ گیا؟ تو جناب وہ کیا ہے کہ ہم نے انگلی ہلائی اور اتنی بڑی زمین گھمائی مگر پھر بھی کوئی تیر نہیں مارا لیکن ہمارے مولبی صاحب کی بس زبان ہلتی ہے، زمین تو کیا ساری خدائی گھومتی ہے۔ بس اس لئے مولبی صاحب کا تھوڑا سا ”ترلا“ کر لیا ہے۔

ہاں تو میں کہہ رہا تھا کہ اگر آسمان کی طرف سفر کریں تو آخری حد کیا ہو گی؟ فلاسفربہت مغز ماری کرے گا۔ سائنسدان حساب کتاب میں کھو جائے گا اور آخر کار کہے گا کہ یہ لامحدود (Infinite) ہے۔ حساب کتاب سے یاد آیا کہ اگر ہم گنتی گننا شروع کریں تو اس گنتی کی حد کیا ہو گی؟ اس کا جواب بھی یہی ہے کہ اس کی کوئی حد نہیں اور یہ لامحدود ہے۔ اس لفظ ”لامحدود“ کو ذہن میں رکھئے گا۔

سائنس کہتی ہے کہ اتنے کروڑ سال پہلے دنیا وجود میں آئی۔ میں سوچتا ہوں کہ ان کروڑوں سالوں سے پہلے کیا تھا؟ جب یہ دنیا ختم ہو جائے گی یا فرض کریں کہ کچھ لوگ کہتے ہیں کہ دنیا کبھی ختم نہیں ہو گی تو پھر کیا کوئی بتا سکتا ہے کہ آخر یہ کب تک چلے گی؟ تو اس کا جواب بھی لامحدود ہی ملتا ہے۔ قیامت آئے گی، حساب کتاب ہو گا، جنت یا دوزخ ملے گی تو پھر اس کے بعد کی زندگی کب تک ہو گی، تو اس کا جواب بھی لامحدود۔ ہم تو آج تک یہی معلوم نہیں کر سکے کہ گنتی میں 1 کے بعد یہ جو 2 آتا ہے ان دونوں کے درمیان اور کتنے ہندسے آتے ہیں؟ یہاں بھی لامحدود کہہ کر جان چھڑائی جاتی ہے۔ یہ وقت کب شروع ہوا اور وقت سے پہلے کیا تھا؟ جب وقت ختم ہو گا تو اس کے بعد کیا ہو گا؟ ایٹم کے چھوٹے سے چھوٹے ذرے کے اندر کیا ہے اور پھر اس کے اندر کیا؟ بڑی بڑی چیزوں کی طرف عقل دوڑانے کی بجائے اتنا سوچتے ہیں کہ کسی چیز کو چھوٹے سے چھوٹا کریں تو وہ مائیکرو بن جائے گی مزید چھوٹا کریں اور مزید چھوٹا کریں، بے شک آنکھ کو نظر نہ آئے لیکن اس کو چھوٹا کرنے کی حد کیا ہے؟ کیا ”لا محدود“؟؟؟

کچھ لوگ کہتے ہیں کہ انتظار کرو اور دیکھو۔ مگر میں کیوں انتظار کروں؟ کل کیا ہو گا مجھے کیا معلوم، میں آج میں زندہ ہوں اور میں نے جو کرنا ہے آج ہی کرنا ہے۔ کیا مجھے کوئی بتائیے گا کہ یہ لامحدود ہے کیا؟ کیا یہ لامحدود کوئی روشنی ہے؟ کیا یہ لامحدود کوئی چیز ہے؟ کیا یہ لامحدود کوئی طاقت ہے؟ یا پھر کہیں ایسا تو نہیں کہ جو خود لامحدود ہے اس کی حدیں ، صورت یا وجود کا عقل کیسے احاطہ کر سکتی ہے کیونکہ عقل چاہے زمین کو ہلا دے لیکن اس کی ایک حد ہے اور جب اس کے گھوڑے دوڑائیں تو ہر چیز کی حدیں مقرر ہوتی ہیں اور جو عقل سے باہر ہو اسے لامحدود کہہ کر چلتے بنتے ہیں۔ آپس کی بات ہے آخر عقل کی حد کیا ہے؟؟؟

کبھی وقت ملے تو میری طرح اپنی عقل کی زمین گھمائیے گا، دماغ کا دہی بنائیے گا اور سوچئے گا کہ آخر یہ لامحدود ہے کیا۔ بہر حال ہمیں تو اس معاملے میں سکون ہے کیونکہ تھوڑا بہت دوڑنے کے بعد ہمیں تو صرف یہی ملا ہے کہ ”جب تھا نہ کچھ یہاں، تھا مگر تو ہی تو“ بلکہ تو بھی لامحدود ہے، جس کا عقل احاطہ کر ہی نہیں سکتی۔ تو لاشریک ہے۔ اس لامحدود کی اصل سمجھ صرف تجھے ہی ہے۔ تو تو کیا تیری بنائی ہوئی کسی ایک چیز کا عقل احاطہ کرنے چلے تو صدیاں بیت جائیں مگر پھر بھی عقل کے لئے وہ لامحدود ہی رہے گی۔ بس مجھے لگتا ہے کہ جو جتنے عقل کے گھوڑے دوڑائے گا، وہ اتنا فاصلہ طے کرے گا اور اتنا ہی اس لامحدود کے قریب پہنچے گا، گو کہ لامحدود پھر بھی لامحدود ہی رہے گا کیونکہ لامحدود سفر میں سے کچھ نکال بھی دیں تو وہ لامحدود ہی رہتا ہے، اعداد کے جادوگر اس بات کو اچھی طرح جانتے ہیں۔ خیر میں کہہ رہا تھا کہ جو جتنے عقل کے گھوڑے دوڑائے گا، وہ اتنا فاصلہ طے کرے گا اور اتنا ہی اس لامحدود کے قریب پہنچے گا، شرط صرف اتنی ہے کہ وہ انسانیت سے مخلص ہو اور انسانیت میں اس کا اپنا آپ سب سے پہلے آتا ہے۔ کئی دفعہ عقل کے گھوڑے دوڑانے کے بعد یہ بھی ہوتا ہے، جسے حکیم الامت علامہ محمد اقبال رحمۃ اللہ علیہ کچھ یوں بیان فرماتے ہیں۔
عطا اسلاف کا جذب دروں کر
شريک زمرۂ لا يحزنوں ، کر
خرد کی گتھیاں سلجھا چکا ميں
مرے مولا مجھے صاحب جنوں کر

چلتے چلتے آپ کو بتاتا چلوں کہ میں نے انگلی کا ہلکا سا دباؤ کمپیوٹر کے ماؤس پر ڈالا اور گوگل ارتھ میں زمین گھوم گئی۔ آپس کی بات ہے آپ اصلی زمین بھی ہلا سکتے ہیں۔ یہ میں نہیں کہہ رہا بلکہ سنا ہے ارشمیدس نے کہا تھا کہ اگر مجھے کھڑے ہونے کی جگہ دے دو تو میں زمین کو لیور کی مدد ہلا سکتا ہوں۔ اب آپ کے لئے شرط یہ ہے کہ خلاء میں کھڑے ہونے کی جگہ خود تلاش کریں۔ مگر ”ہنوز خلاء دور است“ وہ کیا ہے کہ مولبی صاحب کہتے ہیں کہ آسمان کی طرف غور کرنا ٹھیک نہیں۔ بس چند عبادات ہی اصل چیز ہے جبکہ آسمان پر غور کرنا اور اس جیسے دیگر کام۔۔۔ خیر چھڈو جی۔۔۔

اے میرے اللہ میں تیرا ایک بہت ہی کمزور بندہ ہو۔ اب پتہ نہیں میرا شمار کہاں اور کس کھاتے میں ہوتا ہے، مگر میں نے اپنی طرف سے چھوٹی سی کوشش کی ہے اور مجھے تو ہر چیز ہی لامحدود نظر آئی۔ مجھے تو ہر سمت میں ایک لامحدود ہستی نظر آئی۔ میں مزید کوشش کروں گا کہ غور کر سکوں باقی اب مجھے ”مولبی“ اور سائنس کے غلاموں سے بچانا تیرا کام ہے۔
اے میرے اللہ مجھے سیدھا رستہ دکھا، رستہ ان لوگوں کا جن پر تو نے انعام کیا، نہ کہ گمراہوں کا۔۔۔آمین

نوٹ:- ”نظریاتی اختلاف“ اور ”نظریہ کی توہین“ کے درمیان فرق سمجھتے ہوئے آپ اختلاف کرنے اور مجھے درست بات سمجھانے کا پورا پورا حق رکھتے ہیں۔ملتی جلتی تحاریر:-     • ضرورت ”بچے“ کی ماں ہے     • پاکستان بلاگ ایوارڈ – شام سویرے ہون ووٹاں ای ووٹاں     • تبلیغ کا طریقہ بہتر کرو اور احتیاط سے کام لو     • اردو فارمیٹر – شامل پلگ ان – اردو انگریزی بلاگنگ ایک ساتھ     • میرا یار کمپیوٹر بولا ”اردو صرف اردو ہے“

آج شہباز شریف صاحب جامعہ گجرات (یونیورسٹی آف گجرات) لیپ ٹاپ کی تقسیم کرنے آئے ہوئے تھے اور ساری بجلی ہی پی گئے کیونکہ آج سارا دن بجلی نے ایک منٹ بھی دیدار نہیں کروایا، پہلے پھر بھی سارے دن میں دو گھنٹے مل جاتی تھی۔ خیر اس کے علاوہ شاہراؤں پر یہ بڑے بڑے بینر لگے ہوئے تھے۔ تمام جعلی ڈگری والوں کی طرف سے وزیراعلیٰ کو خوش آمدید کہا جا رہا تھا۔ اخبارات میں آدھے آدھے صفحے کے اشتہارات۔ ویسے ایک بات ہے، جامعہ کو جانے والی سڑک جو کافی عرصہ سے ٹوٹی ہوئی تھی وہ بن گئی ہے۔ یوں تو جامعہ گجرات نئی نویلی دلہن ہونے کی وجہ سے پہلے ہی بڑی اجلی اجلی رہتی ہے مگر آج خصوصی طور پر صفائی کا انتظام تھا۔ آپس کے بات ہے چوہدریوں نے گجرات کے لئے ایک ہی تو انسانوں والا کام کیا ہے اور وہ یہی جامعہ گجرات ہے۔ گو کہ جامعہ کا نام رکھتے ہوئے بابا جی سے زیادتی ہوئی ہے لیکن یہ کہانی پھر سہی۔

جن طلباء کو آج لیپ ٹاپ ملے ہیں انہوں نے خدا کا شکر ادا کیا ہے کہ ایک لمبی کھجل خرابی کے بعد کچھ ہاتھ تو لگا۔ خاص طور پر ملتان کا وہ طالب علم جو بیچارہ چھٹیوں میں گھر پہنچا تو اطلاع ملی کہ لیپ ٹاپ والا فارم کل جمع کروانا ہے تو انہیں قدموں واپس مڑا اور ساری رات کا سفر کرتے ہوئے صبح جامعہ گجرات پہنچا اور فارم جمع کروا کر رات کو پھر گھر روانہ ہوا۔ ابھی گھر پہنچا ہی تھا کہ پتہ چلا کہ وہ فارم منسوخ ہو گئے ہیں لہذا کل نئے جمع کروانے ہیں بیچارہ پھر واپس جامعہ فارم جمع کروانے پہنچا۔ باقی جن طلباء کو آج بھی لمبے انتظار کے بعد نہیں ملے وہ اپنا سا منہ لے کر اور شہباز شریف صاحب کی تقریر سن کر گھروں یا ہاسٹل کو لوٹ گئے ہیں۔ مزید جنہیں لیپ ٹاپ کے ساتھ ملنے والی سی ڈیز نہیں ملیں انہیں اب کئی دن تک دفاتر کے چکر لگانے ہوں گے۔ ویسے آئی ٹی کے طلباء کا اچھا کاروبار چمکا ہوا تھا وہ دو سو روپے میں ونڈوز انسٹال کر کے دے رہے تھے کیونکہ لیپ ٹاپ کا آپریٹنگ سسٹم اوبنٹو ہے اور ہمارے ہاں ”محنتی“ طلباء کے سامنے اوبنٹو کا لفظ ”بنٹے“ کی طرح گول گول گھومتا ہے، باقی اوبنٹو چلانا تو دور کی بات۔

مجھے پتہ ہے ایسی باتیں کرنے والوں کے لئے انگلی ہلتی ہے اور وہ معزول ہو جاتے ہیں۔ اجی ہمیں کسی نے کیا معزول کرنا ہے کیونکہ ہم اس جگہ پہنچے ہی نہیں جہاں سے ہمیں کوئی معزول کر سکے۔ ویسے بھی ”چھتر“ کھا کھا کر اتنے بے حس ہو گئے ہیں کہ اب چھوٹی چھوٹی باتوں سے کوئی فرق نہیں پڑتا۔ خیر لیپ ٹاپ دینے کی تفصیل میں ایک بات یہ بھی تھی کہ گورنمنٹ ادارے کا پرائیویٹ طالب علم بھی اگر شرائط پر پورا اترے تو وہ بھی لیپ ٹاپ کا حقدار ہے۔ جب ہم نے یہ بات پڑھی تھی تو اپنے ایک جاننے والے کو کہا کہ بھائی جان آپ نے تو اپنے مضمون اور سال اول میں پوری جامعہ گجرات میں دوسری پوزیشن لی ہے پھر آپ اپلائی کیوں نہیں کرتے۔ انہوں نے کہا کہ پرائیویٹ طلباء کو نہیں مل رہے۔ ہم نے تحقیق کر کے بتایا کہ حضرت وہ دوسری قسم کے پرائیویٹ ہیں جنہیں نہیں مل رہے بلکہ آپ جیسے پرائیویٹ کو بھی مل رہے ہیں اور شہباز شریف کی اپنی ویب سائیٹ پر یہ بات لکھی ہوئی ہے۔ خیر ہمارے جاننے والے نے دوڑیں تیز کر دیں۔ غریب بندہ ہے، گھر کا واحد کفیل ہے اور ٹیویشن پڑھا پڑھا کر گزارہ کرتا ہے۔ نہایت ہی مشکل حالات میں اپنی تعلیم جاری رکھے ہوئے ہے۔ جب اسے لیپ ٹاپ کی امید لگی تو سرکاری دفاتر اور جامعہ گجرات کے چکر شروع ہوگئے۔

پہلے کنٹرولر امتحانات کو ملا۔ کنٹرولر نے کہا تم واقعی حقدار ہو اور تمام شرائط پر پورے اترتے ہو۔ تمہارا کیس آگے بھیجنا چاہئے۔ اس کام کے لئے رجسٹرار کو ملو۔ حضرت کئی دن رجسٹرار کے دفتر کے چکر کاٹتے رہے اور رجسٹرار نے اس کی ایک نہ سنی۔ اوپر سے جہاں ایسی صورت حال کی شکایت درج کروانی ہے ، ان افسران سے ملنا بھی بیچارے غریب کے بس کا روگ نہیں۔ خیر وہ بیچارہ تھک ہار کر چپ کر گیا۔ دوسری طرف حالات یہ ہیں کہ خود جامعہ گجرات کے استاد (ملازم) جو ساتھ ساتھ تعلیم بھی حاصل کر رہے ہیں انہیں لیپ ٹاپ ملے ہیں۔ طلباء سے ایک حلف نامہ بھی لیا گیا جس میں یہ ذکر تھا کہ وہ کہیں ملازمت نہیں کرتے اور واقعی حقدار ہیں اور خود سے لیپ ٹاپ نہیں خرید سکتے، لیکن میں کئی ایک ایسے طلباء کا بتا سکتا ہوں جو امیر گھرانوں سے تعلق رکھتے ہیں، مگر انہیں لیپ ٹاپ ملے۔ ان کی امیری غریبی یا ملازمت کی کسی نے تصدیق نہیں کی مگر نہیں سنی گئی تو غریب کی۔

اجی ہمیں کسی امیر یا ملازم کو لیپ ٹاپ ملنے پر ذرہ بھی کوئی شکایت نہیں۔ بس رونا یہ رو رہے ہیں کہ وہ غریب جو جامعہ کے ”ریگولر“ طلباء کو بھی پیچھے چھوڑتے ہوئے دوسری پوزیشن لیتا ہے، جس کو لیپ ٹاپ کی ضرورت بھی ہے اور وہ حقدار بھی ہے، آخر ایسے محنتی طالب علم کو صرف اس بات کی سزا دی گئی کہ وہ غریب ہے اور جامعہ کی فیس جمع نہ کروا سکنے کی وجہ سے پرائیویٹ پڑھ رہا ہے۔ گو کہ میری آواز نقار خانے میں طوطی کے مصداق سہی، چاہے میری آواز جامعہ گجرات کے رجسٹرار اور باقی انتظامیہ تک پہنچے نہ پہنچے لیکن حقیقت یہی ہے کہ رجسٹرار نے بہت ہٹ دھرمی کا مظاہرہ کیا ہے۔

ہمارے لئے یہ عام سی بات ہے کہ چلو یار جہاں اتنوں کو مل گیا وہاں چند ایک کو نہیں ملا تو کوئی بات نہیں۔ مگر آج وہ بندہ دیکھنے سے تعلق سے رکھتا تھا۔ ایک طرف ہر کوئی لیپ ٹاپ لئے جا رہا ہے اور دوسری طرف غریب کا بچہ اتنا پڑھنے کے باوجود بھی خالی ہاتھ ہے۔ ٹھیک ہے بھاڑ میں جائے لیپ ٹاپ، ہمت والے ہمت سے چلتے رہتے ہیں، مگر ہر کوئی آپ جیسا ہمت والا نہیں ہوتا۔

ہم نہیں کہتے کہ شہباز شریف صاحب ہمارے خادمِ اعلیٰ بنیں بلکہ وہ وزیرِ اعلیٰ ہی رہیں۔ ہم ایک دفعہ بھی یہ نہیں کہتے کہ آپ لیپ ٹاپ کی صورت میں ووٹوں کی دوڑ لگا رہے ہو، بلکہ ہم آپ کے اس قدم کو بہت اچھا جانتے ہیں اور اس میں کوئی شک نہیں کہ یہ ایک اچھا قدم ہے مگر سرکار اندھا دھن لیپ ٹاپ تقسیم کرتے ہوئے اتنا خیال تو کرو کہ واقعی غریب کو اس کا حق مل بھی رہا ہے یا پھر آپ ہی کے چاہنے والوں کی جیب میں جا رہا ہے۔

آج جامعہ گجرات میں تقریباً دو اڑھائی ہزار طلباء کو لیپ ٹاپ ملے۔مزید تقریباً دو ہزار کو بعد میں ملنے ہیں۔ ویسے آج جامعہ گجرات ڈیل و ڈل ہوئی تھی کیونکہ ہر بندے کے ہاتھ میں اور ہر طرف ڈیل کے لیپ ٹاپ ہی لیپ ٹاپ تھے۔ چلیں جی جب جلد ہی ایک لاکھ بیس ہزار کو لیپ ٹاپ مل جائیں گے تو پھر دیکھیں گے کہ گوگل سرچ کی رپورٹ کیا کہتی ہے۔ بات تو یہ بھی سوچنے والی ہے کہ طلباء بند رستے توڑ کر ویب سائیٹوں تک پہنچیں گے یا پھر واقعی بہتری کی طرف جائیں گے۔ ہماری تو دل کی اتھاہ گہرائیوں سے دعا ہے کہ اللہ کرے طلباء ان لیپ ٹاپ کا مثبت استعمال کریں اور ملک و قوم کو فائدہ پہنچائیں۔ملتی جلتی تحاریر:-     • واہ رے حکومت پنجاب     • جعلی لائسنس یا سرکاری ملازمین کا فراڈ

اردو فارمیٹر – شامل پلگ ان بنانے کا بنیادی مقصد ایسے پیارے لوگوں کو آسانی فراہم کرنا ہے جو انگریزی کے ساتھ ساتھ اردو بلاگنگ بھی کرنا چاہتے ہیں۔ مزید ان کے ساتھ ساتھ ایسے لوگ بھی شامل ہیں جن کے بلاگ پر اردو اور انگریزی دونوں زبانوں میں تبصرے (Comments) ہوتے ہیں تاکہ اردو تبصروں پر بغیر کسی محنت کےاردو کی مناسبت سے فانٹ اور سائز وغیرہ خودبخود لاگو ہو جائے۔ یوں ایک ہی جگہ پر اردو اور انگریزی تحریر اپنے اپنے انداز میں بہتر پڑھی جائے گی اور پڑھنے والوں کو آسانی ہو گی۔ مزید اگر یہ پلگ ان انگلش تھیم کے ساتھ استعمال ہو تو اردو تحریر پر اردو کی مناسب فارمیٹنگ لاگو کرے گا اور اگر اردو تھیم کے ساتھ استعمال ہو تو انگریزی تحریر پر انگریزی کی مناسب فارمیٹنگ لاگو کرے گا کیونکہ شامل پلگ ان ایک وقت میں دونوں زبانوں میں بلاگنگ کی سہولت فراہم کرتا ہے۔

شامل پلگ ان کن کے لئے ہے؟

•    سب سے پہلے ایسے انگریزی بلاگر جو انگریزی کے ساتھ ساتھ اردو میں بھی پوسٹ کرنا چاہتے یا کرتے ہیں۔ اس کے علاوہ چاہے کوئی بلاگر اردو میں پوسٹ کرتا ہے یا نہیں لیکن یہ پلگ ان ہر اس بلاگر کو فائدہ دے گا جس کے بلاگ پر دیگر کمنٹس کے ساتھ اردو میں بھی کمنٹ ہوتے ہیں۔ یہ پلگ ان اردو میں کئے گئے کمنٹ کو خودبخود اردو کے مطابق فانٹ، سائز اور سمت دے دے گا۔
•    ایسے اردو بلاگر جن کے بلاگ پر اردو کے ساتھ ساتھ انگریزی میں بھی کمنٹ ہوتے ہیں۔
 
•    خاص طور پر ایسے نئے اردو بلاگر جو اردو تھیم کے لئے بہت زیادہ وقت ضائع کر دیتے ہیں۔ وہ کوئی بھی انگریزی تھیم لگائیں اور پھر اس پلگ ان سے تحریر اور تبصرے وغیرہ کی فارمیٹنگ خودکار طریقے سے اردو کے مطابق ہو جائے گی۔
 
•    ایسے پرانے اردو بلاگر جن کے بلاگ پر ابھی تک اردو کی مناسبت سے فانٹ، سائز اور سمت وغیرہ نہیں کی گئی۔

شامل پلگ ان کرتا کیا ہے؟

•    اگر اس پلگ ان کو ”انگریزی تھیم“ کے ساتھ استعمال کیا جائے تو یہ پلگ ان اردو میں لکھی گئی پوسٹ اور کمنٹ وغیرہ میں اردو کو خودبخود دیکھ کر اردو تحریر پر اردو کی مناسبت سے فانٹ، سائز اور سمت لاگو کر دے گا اور انگریزی میں لکھے ہوئے مواد پر اثر انداز نہیں ہو گا یعنی انگریزی مواد تھیم کے مطابق جیسے پہلے تھا ویسا ہی رہے گا۔
•    اگر اس پلگ ان کو ”اردو تھیم“ کے ساتھ استعمال کیا جاتا ہے تو تب یہ انگریزی میں لکھی ہوئی پوسٹ اور کمنٹ وغیرہ پر انگریزی کی مناسبت سے فانٹ، سائز اور سمت لاگو کر دے گا اور اردو مواد تھیم کے مطابق ہی رہے گا۔
•    اس پلگ ان کی مدد سے کسی بھی تحریر میں اردو اور انگریزی ٹیگ استعمال کئے جا سکتے ہیں جن سے ایک وقت میں دونوں زبانیں لکھتے ہوئے تحریر کی خوبصورتی برقرار رہے گی۔
•    یاد رہے یہ پلگ ان کسی تحریر کی زبان کی پہچان کے لئے اس تحریر کے پہلے حرف کو دیکھے گا۔ جیسے اگر پہلا حرف اردو میں ہوا تو اردو کی مناسبت سے فارمیٹنگ لاگو ہو گی۔

پلگ ان استعمال کرنے کا طریقہ

جیسے دیگر ورڈپریس پلگ ان انسٹال کیے جاتے ہیں بالکل ویسے ہی یہ پلگ ان بھی انسٹال کیا جاتا ہے۔ انسٹال کرنے اور چلانے (Activate) کے بعد یہ پلگ ان خودکار طریقے سے اپنا کام شروع کر دیتا ہے۔ کیونکہ بنیادی طور پر اردو کی ترویج کو مدِ نظر رکھتے ہوئے یہ پلگ ان انگریزی تھیم کے لئے بنایا گیا ہے اس لئے اس کی ڈیفالٹ سیٹنگز انگریزی تھیم کے مطابق ہیں۔ اگر اسے اردو تھیم کے ساتھ استعمال کرنا ہو تو پھر انسٹال کرنے اور چلانے کے بعد ایڈمن پینل میں Settings کی ذیلی فہرست میں Urdu Formatter والے صفحہ سے تھیم والی آپشن کو تبدیل کر لیں۔ مزید یہ پوسٹ، کمنٹ اور پوسٹ کے خلاصے (Excerpt) کے ساتھ خودکار طریقے سے کام کرنا شروع کر دیتا ہے۔ اگر کوئی خود کار نظام بند کرنا ہو تو وہ بھی Urdu Formatter والے صفحہ سے بند کیا جا سکتا ہے۔
یہ تو تھیں تھیم کے مطابق خودکار طریقے سے زبان کی پہچان کر کے اسے زبان کے مطابق فارمیٹنگ دینا۔ اس کے علاوہ کسی بھی تھیم کے ساتھ استعمال کرتے ہوئے آپ خود سے فارمیٹنگ کے لئے ٹیگ بھی کسی تحریر میں دے سکتے ہیں۔ جیسے انگریزی پوسٹ کے درمیان اگر کوئی اردو لفظ آئے تو اس کے ساتھ [urdu] کا ٹیگ استعمال کر سکتے ہیں۔ جس لفظ پر یہ ٹیگ لگایا جائے گا، یہ پلگ ان اس لفظ پر خود بخود اردو کے مطابق فارمیٹنگ لاگو کر دے گا۔ اگر تحریر کے درمیان میں ایک دو اردو الفاظ کی بجائے کوئی پہرہ آئے تو پھر [urdu_text] کے ٹیگ کا استعمال کر سکتے ہیں۔ جس طرح انگریزی پوسٹ میں [urdu] ٹیگ کا استعمال کر سکتے ہیں بالکل ویسے ہی اردو پوسٹ میں [english] اور [english_text] کا استعمال کر سکتے ہیں۔ جس طرح دیگر ٹیگ لگاتے ہوئے ٹیگ شروع اور پھر بند کیا جاتا ہے بالکل ویسے ہی ان ٹیگ کو ”/“ لگا کر بند کیا جاتا ہے۔ مزید یہ ٹیگ خودبخود مناسب سائز وغیرہ استعمال کرتے ہیں لیکن اگر چاہیں تو ان ٹیگ کے ساتھ اپنی مرضی کا سائز اور سمت بھی دے سکتے ہیں۔ جس کی وضاحت مثالوں سے کی گئی ہے۔

اردو ٹیگ کا استعمال۔

Urdu is the national language [urdu]قومی زبان[/urdu] of Pakistan.

اردو ٹیگ کے ساتھ سائز کا استعمال

Urdu is the national language [urdu size="16"]قومی زبان[/urdu] of Pakistan.

اگر [urdu_text] ٹیگ کا استعمال کرنا ہو تو یہ بھی ویسے ہی کام کرے گا لیکن اگر چاہیں تو اس ٹیگ میں سائز کے ساتھ ساتھ سمت بھی دے سکتے ہیں یا کوئی ایک بھی دے سکتے ہیں۔ جیسے

Urdu is the national language [urdu_text size="19" align="right"]قومی زبان[/urdu] of Pakistan.

سائز پکسل میں شمار ہو گا اور align میں left, right یا justify دے سکتے ہیں۔ اگر سائز یا سمت خود سے نہیں دیتے تو پھر اردو یا انگریزی کی مناسبت سے خود ہی بہتر سائز اور سمت لاگو ہو جائے گا۔ جس طرح [urdu]اور [urdu_text] کا استعمال کیا ہے بالکل اسی طرح [english] اور [English_text] کا استعمال کر سکتے ہیں۔

یہ پلگ ان ورڈپریس کے سٹینڈرڈ فنکشن کے ساتھ کام کرے گا۔ اگر کسی تھیم میں کسی کام کے لئے خود سے فنکشن بنائے گئے ہوں جیسے عام طور پر Excerpt کے لئے بنائے جاتے ہیں تو ایسی صورت میں یہ اس فنکشن کے ساتھ کام نہیں کرے گا۔ اس کا حل یہ ہے کہ آپ تھیم میں جہاں پر ایسا کوئی فنکشن استعمال ہوا ہو وہاں اس فنکشن کے شروع اور آخر پر درج ذیل کوڈ شامل کر دیں مثلاً اگر Excerpt کے لئے ایسا کوئی فنکشن بنایا گیا ہے تو Excerpt کو خودکار طریقہ سے زبان کے مطابق فارمیٹنگ دینے کے لئے تھیم میں جہاں پر Excerpt ظاہر کرنے کا کوڈ ہو اس کے شروع اور آخر پر پی ایچ پی کے درج ذیل کوڈ کا اضافہ کر دیں۔ اگر آپ ایچ ٹی ایم ایل اور پی ایچ پی کے بارے میں تھوڑا بہت جانتے ہیں تو تب ہی یہ کوڈ شامل کیجئے گا نہیں تو آپ تھیم میں خرابی بھی کر سکتے ہیں۔

شروع کا کوڈ

do_action('urdu_start');

آخر کا کوڈ

do_action('urdu_end');

مثال

<?php do_action('urdu_start'); my_function(); do_action('urdu_end'); ?>

مزید اس کوڈ کے ساتھ سائز، سمت، رنگ اور لائن کا وقفہ یہ تمام کے تمام یا ان میں سے چند ایک کا کوڈ اور ان کی اپنی مرضی کی ویلیوز شامل کر سکتے ہیں۔ جس کی مثال درج ذیل ہے۔

<?php
do_action('urdu_start',array('font_size'=>'19', 'line_height'=>'31', 'text_color'=>'blue', 'text_align'=>'right'));
my_function();
do_action('urdu_end');
?>

یاد رہے یہ کوڈ لکھنے سے بھی فارمیٹنگ لاگو کرنے سے پہلے تحریر کی زبان دیکھی جائے گی اور اگر زبان اردو ہوئی تو تب ہی اردو فارمیٹنگ لاگو ہو گی ورنہ تحریر پر کچھ بھی اثر انداز نہیں ہو گا اور تحریر تھیم کے مطابق ہی ظاہر ہو گی۔ملتی جلتی تحاریر:-     • رسم الخط(Font) کیا ہے؟     • اینڈرائڈ کے لئے فونیٹک اردو کیبورڈ لے آؤٹ     • پاک اردو انسٹالر     • آپ کو پاک اردو انسٹالر کا کیا فائدہ؟     • ورڈپریس پلگ ان انسٹال کرنا اور چلانا

ہوا یوں کہ کل میں کمپیوٹر کو یہ پوچھ بیٹھا کہ ”یارا! یہ یونیکوڈ اردو کیا ہوتی ہے؟“ کمپیوٹر سر نیچے کیے ہوئے کاغذات کی دیکھ بھال کرنے میں خوب مگن تھا، اس لئے کمپیوٹر نے میرے سوال پر ذرا بھی توجہ نہ دی۔ جب میں نے دوبارہ بڑے پیار سے اپنا سوال دہرایا تو، ناک پر رکھی ہوئی عینک کے اوپر سے آنکھیں تھوڑی زیادہ کھول کر کمپیوٹر میری طرف دیکھتے ہوئے کہنے لگا کہ ”اردو صرف اردو ہے اس لئے کسی یونیکوڈ اردو کا سوال ہی پیدا نہیں ہوتا“۔

مجھے سمجھ نہ آئی تو میں نے مزید سوال کیا کہ کچھ لوگ کہتے ہیں کہ ”کمپیوٹر کی ایک یونیکوڈ اردو اور دوسری تصویری اردو ہوتی ہے“۔
بس میرا یہی کہنا تھا کہ کمپیوٹر کا دماغ گھوم گیا۔ غصے میں عینک اتار کر زور سے میز پر مارتے ہوا بولا ”تم پتہ نہیں کہاں کہاں سے الٹی سیدھی باتیں سن آتے ہو اور آ کر میرا دماغ کھانے لگ پڑتے ہو۔ جب میں نے کہا کہ اردو صرف اردو ہے، تو پھر مزید کسی سوال کی گنجائش باقی نہیں رہتی“۔
اس دوران مجھے صاف پتہ چل رہا تھا کہ کمپیوٹر کو بہت غصہ آیا ہوا ہے۔ کمپیوٹر کے تاثرات سے لگ رہا تھا کہ اسے اپنے اوپر کوئی تہمت لگتی ہوئی محسوس ہو رہی ہے۔
ابھی میں اندازے ہی لگا رہا تھا کہ کمپیوٹر خود بول پڑا ”یار بلال! یہ کچھ اردو والوں نے مجھ پر ”تہمت“ لگا رکھی ہے کہ میری دو قسم کی اردو ہے جبکہ ایسا نہیں۔ جب میں دیگر زبانوں کی ایک ہی قسم رکھتا ہوں تو پھر مجھے اردو کی دو قسمیں رکھنے کی کیا ضرورت ہے؟ بلکہ لوگوں نے ہی میری اردو کے ساتھ ساتھ ایک تصویری اردو لا کھڑی کی ہے۔ ایک تو مجھ سے میری اردومیں بات نہیں کرتے اور اوپر سے مجھ پر دو قسم کی اردو رکھنے کی تہمت لگاتے ہیں۔ اب میں فضل الحق سری پائے اور کوزی حلیم والوں کی طرح جگہ جگہ اصلی اردو اور نقالوں سے ہوشیار رہنے کے بورڈ لگانے سے تو رہا۔ کچھ تم لوگ ہی اپنی کھوپڑی سے کام لے لو۔“
بات کرتے ہوئے کمپیوٹر کے لہجے میں تھوڑی نرمی آئی ہوئی تھی لیکن ساتھ ہی چیخ کر بولا ”تم لوگ ہو ہی ناشکرے۔ میں نے اپنے اندر ایک نظام یونیکوڈ بنایا تاکہ جہاں میں دیگر زبانوں کے لئے اچھے طریقے سے کام آتا ہوں وہاں پر اردو کے لئے بھی بہتر کام آ سکوں۔ میں نے اس جدت کی خاطر کئی پاپڑ بیلے، کئی سالوں تک محنت کی، لیکن تم ناشکرے لوگوں نے میری اس جدت سے فائدہ اٹھانے کی بجائے میری اردو کے مقابلے میں تصویری اردو کو سوتن بنا دیا۔“
کمپیوٹر نے یہاں پر تھوڑا سا سانس لیا۔ میں سمجھا مجھے بات کرنے کا موقع مل گیا ہے، آخر میں بھی اس معاشرے کا حصہ ہوں جہاں پر صرف تنقید برائے تنقید اور پوری بات سنے، سمجھے بغیر لیکن لیکن کہا جاتا ہے، اس لئے میں نے موقع سمجھتے ہوئے سوال کرنا چاہا مگر کمپیوٹر نے مجھے سوال کرنے کا موقع ہی نہ دیا اور بول پڑا۔
”بھائی صاحب! یہ اکیسویں صدی ہے، 2011ء ختم ہو چکا ہے اور 2012ء چل رہا ہے، لیکن تم اردو والے آج بھی 1999ء کی سوچ رکھے ہوئے ہو۔ دنیا نے پچھلے دس گیارہ سالوں میں ٹیکنالوجی کے میدان میں بہت ترقی کی ہے۔ خدا کے لئے تم بھی کوئی ہوش کے ناخن لو۔“
اب کی بار کمپیوٹر تھوڑا چپ ہوا لیکن اس کا غصہ عروج پر تھا۔ میں نے کمپیوٹر کا غصہ کم کرنے اور اس کی مدد کرنے کے لئے کہا ”یار مجھے ٹھیک ٹھیک اور تفصیلی معلومات دے۔ میں چاہے ایک گیا گزرا بلاگر ہی سہی لیکن اگر تو مجھے ٹھیک معلومات دے گا تو میں اس معلومات کو لوگوں تک پہنچاؤں گا اور پھر ہو سکتا ہے لوگوں کو کچھ خیال آ جائے۔“
میرا اتنا کہنا تھا کہ کمپیوٹر نے بڑی نرمی سے کہا ”بتا تو دیا ہے لیکن پھر بھی تیرا کوئی سوال ہے تو پوچھ“۔
میں نے کہا ”یار! ٹھیک ہے مجھے سمجھ آ گئی ہے کہ تیری اردو ایک ہی ہے، لیکن انگریزی صرف انگریزی ہے اور دیگر زبانیں بھی بالکل ایسے ہی ہیں لیکن یہ اردو کے ساتھ ہی ”یونیکوڈ“ کیوں لگا ہے؟“
کمپیوٹر بولا ”بات صرف اتنی سمجھنے والی ہے کہ میرا پہلے کوئی اور نظام تھا جس میں اردو لکھنے کی گنجائش نہیں تھی۔ تب تم لوگ تصویروں کی صورت میں اردو لکھتے تھے۔ ایسی تصویری اردو نہ کل میری تھی اور نہ آج میری ہے۔ ایسی تصویری حالت میں اردو کو میں نہیں سمجھ سکتا بلکہ میں تو اسے اردو سمجھتا ہی نہیں۔ میرے لئے جیسے دیگر تصاویر ہوتی ہیں بالکل ایسے ہی یہ بھی تصاویر ہی ہیں اور ان تصاویر میں لکھی ہوئی اردو سے تم لوگ عارضی فائدہ تو اٹھا سکتے ہو لیکن اگر مجھ سے کہو کہ میں ایسی تصویری حالت میں موجود اردو کی سائبر لائیبریریوں سے مواد تلاش کر کے دوں تو یہ میرے لئے فی الحال ممکن نہیں۔ جب پرانا وقت تھا تب تو تصویری حالت میں اردو رکھنا تمہاری مجبوری تھی اور مجھے بھی بہت شرمندگی ہوتی تھی کہ میں باقی کئی زبانوں کے لئے تلاش اور دیگر کئی کاموں میں مدد دیتا ہوں لیکن اردو کے لئے سوائے ڈیسکٹاپ پبلشنگ کے اور کسی کام نہیں آ رہا تو پھر مجھے خیال آیا کہ ایسا کوئی نظام ہو جس سے میں زیادہ سے زیادہ زبانوں کو سمجھ سکوں اور انسانوں کو فائدہ پہنچاؤ۔ یوں میں نے ایک نظام بنایا جس کو یونیکوڈ کا نام دیا۔ میں نے اس یونیکوڈ نظام میں اردو کو بھی جگہ دی۔ اب میری زیادہ تر زبانیں اسی نظام میں موجود ہیں۔ میں صرف اسے زبان مانتا ہوں جو میرے زبانوں کے نظاموں کے تحت لکھی جاتی ہیں۔“

ابھی اتنی گفتگو ہوئی تھی کہ بجلی چلی گئی اور بات چیت کا سلسلہ رک گیا۔ میں باہر صحن میں چلا گیا۔ دھوپ میں بیٹھ کر مالٹے کھائے۔ مالٹے کھانا مجبوری تھی کیونکہ ایک بہت پیارے دوست نے سرگودھا سے کافی سارے مالٹے بھیج دیئے ہیں۔ مالٹے کھانے کے ساتھ میں سوچتا رہا کہ آخر کمپیوٹر آج اتنے عجیب و غریب لہجے میں بات چیت کیوں کر رہا تھا۔ خیر اللہ اللہ کر کے پانچ گھنٹے بعد شام کے وقت بجلی نے دیدار کروایا اور میں بھاگتا ہوا کمپیوٹر کے پاس پہنچا تاکہ گفتگو کا سلسلہ دوبارہ شروع کیا جائے اور یوں کمپیوٹر سے دوبارہ بات چیت شروع ہوئی۔

کمپیوٹر سے سلام دعا کے بعد میں نے کہا”تم نے مجھے اتنی لمبی چوڑی تقریر سنا دی ہے لیکن میرا سوال تو وہیں کا وہیں ہے کہ آخر اردو کے ساتھ یونیکوڈ کیوں بولا جاتا ہے؟“
سوال کرنے کی دیر تھی کہ کمپیوٹر بڑے طنزیہ انداز میں بولا ”میں نے تو تم لوگوں کو کب کہا کہ میری اردو کے ساتھ یونیکوڈ لفظ کا اضافہ کرو؟ ٹھیک ہے یونیکوڈ میرے ایک نظام، ایک ٹیکنالوجی کا نام ہے لیکن اس کا مطلب یہ تو نہیں کہ تم اس نظام کے نام کو زبان کے نام کے ساتھ ملا دو۔ بھائی صاحب! میں تو اردو کی طرح کئی دیگر زبانیں بھی یونیکوڈ نظام کے تحت ہی سمجھتا ہوں لیکن کبھی تم نے ان زبانوں کے ساتھ یونیکوڈ کا لفظ لگا دیکھا یا سنا؟ اصل میں تم لوگ پہلے تصویروں کی صورت میں اردو لکھتے تھے۔ جس کا مجھے کچھ پتہ نہیں ہوتا تھا۔ میں ان اردو لکھی تصویروں کو تصویریں سمجھ کر ادھر سے ادھر کرتا اور پرنٹر کو بھیجتا تھا لیکن جب میں نے اردو کو سمجھنا شروع کیا اور جس نظام کے تحت سمجھا تم لوگوں نے اردو کے ساتھ اس نظام کا نام لگا دیا۔ ٹھیک ہے ڈویلپر اور دیگر ماہرین تکنیکی لحاظ سے بات چیت کرتے ہوئے میرے نظام کو زیر بحث لائیں اور بات سمجھنے کے لئے یونیکوڈ اردو کہہ لیں، لیکن لوگوں کو بتا دو کہ میری اردو صرف ”اردو“ ہے کوئی ”یونیکوڈ اردو“ نہیں، اس لئے جب تم لوگ میرے حوالے سے اردو کا ذکر کرو تو زیادہ سے زیادہ یہ کہہ سکتے ہو کہ کمپیوٹر کی اردو۔“
آخر کار میں نے کمپیوٹر سے کہا ”چھوڑ ساری باتوں کو مجھے صرف دو ٹوک بتا کہ اردو کے معاملے میں آخر تو چاہتا کیا ہے؟“
کمپیوٹر نے نہایت ہی نرمی سے کہا ”دیکھو بھائی بلال! پہلی بات تو یہ کہ میری صرف ایک ہی اردو ہے جس کو میں یونیکوڈ نظام کے تحت سمجھتا ہوں۔ دوسری بات اگر چاہتے ہو کہ میں انٹرنیٹ اور ہر جگہ پر اردو کے حوالے سے تم لوگوں کی مدد کر سکوں تو پھر مجھ سے میری اردو میں ہی بات کرو۔ ٹھیک ہے ابھی میں اردو کو بہتر سے بہتر انداز میں دکھانے اور دیگر کئی کاموں کے لئے نظام تیار کر رہا ہوں اور وقت کے ساتھ ساتھ میں تم لوگوں کو مزید اچھے رسم الخط (فانٹ) میں اردو دکھاؤں گا اور کئی قسم کی زیب و آرائش کر کے دوں گا لیکن یہ سارے نظام میں تب ہی بناؤں گا جب تم میری اردو میں مجھ سے مخاطب ہونا پسند کرو گے۔ اگر آج بھی تم زیب و آرائش کے چکر میں تصویروں میں ہی اردو لکھتے رہے تو پھر سوچ لو میں قیامت تک تم لوگوں کو اردو کے متعلق اچھے نظام نہیں دوں گا۔ تجھے آخری اور خاص بات بتا دوں کہ یونیکوڈ نظام کے تحت لکھی جانے والی اردو کا ہی مستقبل ہے اور یہ بات اردو کے مامے چاچے سافٹ ویئروں کو بھی سمجھ آ چکی ہے جبھی تو وہ بھی خود کو اسی نظام کے تحت لے آئے ہیں۔ باقی اب اٹھو اور جاؤ میرا زیادہ دماغ نہ کھاؤ۔ مجھے اور بھی بہت سے کام کرنے ہیں۔ یہ نہ ہو بجلی دوبارہ چلی جائے اور کام وہیں کے وہیں رکے رہ جائیں۔“
خیر میں نے بھی سوچا کمپیوٹر ٹھیک ہی کہہ رہا ہے باقی کام کاج کر لینے چاہئیں۔ یوں میں کمپیوٹر سے گفتگو کرنے کے بعد اٹھ کر جانے لگا تو کمپیوٹر نے پیچھے سے آواز دی ”اس گفتگو پر تحریر ضرور لکھنا۔ زیادہ نہیں تو لوگوں کو میرا صرف اتنا پیغام دے دینا کہ کمپیوٹر نے کہا ہے کہ میری صرف ایک ہی اردو ہے جسے میں یونیکوڈ نظام کے تحت سمجھتا ہوں، باقی رنگ برنگی تصویروں کو میں اردو نہیں سمجھتا اور میرا ان تصویروں سے اردو کے حوالے سے کوئی لینا دینا نہیں بلکہ فی الحال میرے سامنے چاہے اردو لکھی تصویریں رکھو یا وینا ملک کی تصویریں رکھو، میں دونوں کو ایک ہی کھاتے میں ڈال دوں گا۔“

نوٹ (16 جنوری 2012ء) :- شاید کچھ دوستوں کو اس تحریر پر ہونے والے تبصروں سے اندازہ نہ ہو تو سوچا وضاحت کر دوں۔ دراصل انٹرنیٹ پر ایک صاحب اردو سافٹ ویئر بیچنے کی خاطر زرد مارکیٹنگ کرتے ہوئے لوگوں میں گمراہی پھیلا رہے ہیں تو سوچا تکنیکی لحاظ سے تھوڑی وضاحت کر دوں تاکہ لوگ گمراہ نہ ہوں اور حقیقت کو پہچانیں۔ملتی جلتی تحاریر:-     • کمپیوٹر کی ”اردو“ اور ”تصویری اردو“ میں فرق     • یونیکوڈ کیا ہے؟     • موجودہ دور میں اردو زبان – جواب     • رسم الخط(Font) کیا ہے؟     • پاکستان میں ”انگریزیا“ کی بیماری