خیر جتنا کچھ میرے علم میں ہے اس کے مطابق جواب اور وضاحت کر دیتا ہوں۔ ”موجودہ دور میں اردو زبان“ والی تحریر کی باتیں نیلے رنگ میں درج ہیں اور ساتھ میری طرف سے کچھ وضاحت پیش خدمت ہے۔

ابھی تک ونڈوز اردو زبان میں دستیاب نہیں ہے۔
کوئی بھی کمپنی، کوئی بھی چیز منافع کمانے کے لئے بناتی ہے۔ اگر ونڈوز اردو زبان میں موجود نہیں تو اس میں مائیکروسافٹ کا کوئی قصور نہیں کیونکہ وہ تب ہی ونڈوز اردو میں بنائیں گے، جب اردو والے خود ایسی چیز خریدنا پسند فرمائیں گے۔ یہاں حال ایسا ہے کہ چوری کی ونڈوز تیس چالیس روپے میں حاصل کی جاتی ہے اور پھر اس چوری شدہ ونڈوز کو استعمال کرتے ہوئے مذہب کی تبلیغ کی جاتی ہے۔ آج پاکستانی جو ونڈوز استعمال کر رہے ہیں وہ اصلی ونڈوز پر منتقل ہونے کی مائیکروسافٹ کو گارنٹی دیں اور اردو ونڈوز کا کہیں تو پھر دیکھیں مائیکروسافٹ ونڈوز اردو میں بناتی ہے یا نہیں۔ اور تو اور مائیکروسافٹ خود کسی اچھے پاکستانی ادارے کو پیسے دے کر انگریزی کا اردو میں بہتر سے بہتر ترجمہ کروا لے گی۔

ٹوٹی پھوٹی سی اردو آپ آفس یا ایکسپلورر میں دیکھ سکتے ہیں جو کہ ایسے لکھی گئی ہوتی ہے کہ پڑھتے ہوئے سر میں درد ہوتا ہے۔
پتہ نہیں یہ کس ”اردو“ کی بات کر رہے ہیں۔ ہماری اردو نہ تو ٹوٹی پھوٹی ہوتی ہے اور نہ ہی ہمیں پڑھتے ہوئے سر میں درد ہوتا ہے، بلکہ ہماری اردو مکمل نستعلیق رسم الخط میں ہے اور ہمیں پڑھتے ہوئے خوشی ہوتی ہے۔

پہلے مرحلے میں فاسٹ فاؤنڈیشن کے CRULP کو بھی کچھ گرانٹ دی گئی جس نے اردو فونٹس اور کی بورڈ وغیرہ پر کچھ کام کیا ہے۔ (فاسٹ کے لیے پاکستانی قوم ہمیشہ آغا حسن عابدی اور بی سی سی آئی کی مشکور رہے گی کہ اکیلے اس ادارے نے پاکستان میں کمپیوٹر کی ترقی کے لیے جتنا کام کیا ہے، باقی سب نے مل کر بھی نہیں کیا ہو گا۔)
اس میں کوئی شک نہیں کرلپ نے اردو کے لئے کام کیا ہے اور میں ذاتی طور پر خود اس ادارے کا مشکور ہوں۔ لیکن شاید آپ بھول رہے ہیں کہ کرلپ کے فانٹس سے پہلے بھی یونیکوڈ فانٹس بن چکے تھے اور کرلپ کا اردو کیبورڈ لے آؤٹ، مائیکروسافٹ کیبورڈ لے آؤٹ کریئٹر ریلیز ہونے کے بعد بنا۔ مائیکروسافٹ کیبورڈ لے آؤٹ کریئٹر سے لے آؤٹ بنانا کوئی ”راکٹ سائنس“ نہیں بلکہ یہ بچوں کا کھیل ہے۔ آپ بات کرتے ہیں کہ کرلپ نے پاکستان میں کمپیوٹر (اردو) کی ترقی کے لئے جتنا کام کیا ہے، باقی سب نے مل کر بھی نہیں کیا ہوگا، تو حضرت عرض ہے کہ ہم کرلپ کے مشکور ہیں لیکن یہاں آپ غلطی کر گئے ہیں۔ شاید آپ نے اردو محفل، القلم، شاکرالقادری، نبیل نقوی، زکریا اجمل اور امجد علوی وغیرہ وغیرہ کا نام نہیں سنا۔ کرلپ نے تو پھر بھی گرانٹ لے کر دو چار فانٹ بنائے لیکن یہاں تو لوگ گرانٹ نہیں بلکہ الٹا اپنی جیب سے خرچ کر کے، اپنا قیمتی وقت اردو کی خدمت میں لگا کر اردو فانٹس سرور تک بنائے بیٹھے ہیں جہاں آپ کو رنگا رنگ یونیکوڈ اردو فانٹس ملیں گے۔ ٹھیک ہے کرلپ نے کام کیا ہے لیکن یہ بات میں پورے وثوق کے ساتھ کہہ سکتا ہوں کہ کرلپ کا کام باقی اردو کے لئے کام کرنے کے مقابلے میں کچھ بھی نہیں۔ شاید کئی دوستوں کو میری اس بات پر حیرانگی ہو لیکن دوستو! باقی لوگوں کو چھوڑو صرف کبھی اردو محفل کے کام پر نظر ڈالیے گا تو خود اندازہ ہو جائے گا کہ چند لوگ، ایک گرانٹ لے کر کام کرنے والے ادارے کی نسبت کیا کیا کر چکے ہیں اور کیا کر رہے ہیں۔ لوگ مانیں یا نہ مانیں لیکن یہ اردو بلاگنگ، اردو فورمز اور زیادہ تر اردو ویب سائیٹ اور باقی سب کچھ جہاں آج کھڑا ہے اس سب کے پیچھے بالواسطہ یا بلا واسطہ اردو محفل ہی ہے۔ آپ کو بتاتا چلوں کہ بندہ ناچیز (م بلال م) بھی آج تک جو کچھ کر سکا ہے اس کا زیادہ حصہ اردو محفل کی ہی بدولت ہے۔ بھائی لوگو! آخر تحقیقی مباحثے بھی کوئی چیز ہیں۔ اردو کمپیوٹنگ پر ایسی تحقیق اور باتیں ہمیں سوائے اردو محفل کے کسی ادارے کے پاس نہیں ملتیں۔ یونیکوڈ اردو کے بے شمار مسائل کے حل اردو محفل نے ہی دریافت کیے۔ ڈیٹابیس سے لے کر اردو ویب بیج بنانے، وی بلیٹن، پی ایچ پی بی بی، جملہ، دروپل، ورڈپریس اور کئی چیزوں کی اردو میں تحقیق، تراجم، انسٹال کرنے کا طریقہ اردو میں اور پھر مدد اردو محفل ہی نے دی اور ابھی تک دے رہی ہے۔ اردو محفل کے مزید کارنامے بتانے شروع کیے تو عام تحریر نہیں بلکہ پوری کتاب لکھنی پڑ جائے گی۔ خلاصہ یہ کہ میری نظر میں فی الحال اردو محفل کا کوئی ثانی نہیں۔

انڈیا نے تقریباً 1982 میں ہندی زبانوں کو کمپیوٹر پر استعمال کرنے کے لیے ایک اچھا سٹینڈرڈ بنا لیا تھا۔ ہم نے رو پیٹ کر 2000 کے بھی کافی بعد ایسا کیا۔ لیکن اردو کیونکہ کمپیوٹر پر ایک یتیم زبان ہے، اس لیے اس کوبھی کوئی نہیں پوچھتا۔
محترم مجھے اس بات کی سمجھ نہیں آئی کہ آپ ”اچھا سٹینڈرڈ“ کس چیز کو کہہ رہے ہیں؟ مجھے انڈیا کا تو پتہ نہیں لیکن اردو کا نوری نستعلیق فانٹ بھی تقریباً 1980ء کے آس پاس تیار ہو چکا تھا۔ 1982ء تک سات آٹھ ایسے پبلشنگ ادارے وجود میں آ چکے تھے جو نوری نستعلیق میں کتابت کرتے تھے۔ باقی بھائی جان ہمارے ہاں جب سے کمپیوٹر عام انسان تک پہنچا ہے تب سے لوگ کمپیوٹر پر اردو وقت کے حساب سے ”اچھے سٹینڈرڈ“ پر لکھ رہے ہیں۔ کم از کم میں تو 2000ء سے ہی اردو میں ہی ای میل کرتا آ رہا ہوں۔ ٹھیک ہے وقت کے ساتھ ساتھ ٹیکنالوجی تبدیل ہوتی آئی ہے لیکن اس کا مطلب یہ تو نہیں ہم اردو کو کمپیوٹر پر ایک یتیم زبان کہیں۔ اردو کمپیوٹر پر یتیم نہیں ں ں ں ں۔۔۔ بلکہ یتیم ہماری سوچ ہے۔ اردو کو اگر کوئی پوچھتا نہیں تو اس کی وجہ اردو کی یتیمی نہیں بلکہ ہماری ذہنی غلامی ہے۔ شاید حالات کو کوسنا ہماری عادت بن چکی ہے۔ بھائی صاحب اگر اردو آج پیچھے ہے تو اس کے ذمہ دار بھی ہم ہیں۔ اردو کو یتیم کہنے سے پہلے اتنا تو سوچ لیتے کہ آج اس کے وارث ہم ہیں۔ جب ہم ہی کسی قابل نہیں تو اس میں اردو کا کیا قصور؟

بے قدری کی انتہا تو دیکھیں کہ اردو میں ڈیسک ٹاپ پبلشنگ کا تقریباً واحد سافٹ وئیر، ان پیج، ایک بھارتی سافٹ وئیر ہے۔
جناب آپ کی اطلاع کے لئے عرض ہے کہ نوری نستعلیق فانٹ پاکستان میں ہی بنا تھا لیکن مزید پروگرامنگ کا کام پاکستان میں ممکن نہ ہو سکا تو پھر ہندوستان کے لوگوں نے اس پر مزید کام کر کے سافٹ ویئر تیار کیا۔ مجھے سمجھ نہیں آتی، اردو کے معاملے میں اتنی تنگ نظری کیوں۔ جس مشین پر آپ یہ تحریر پڑھ رہے ہیں وہ پاکستان نے تو نہیں بنائی بلکہ وہ بھی غیر ملکی ہی ہے۔ مجھے بھی آپ کی طرح ہندوستانیوں سے بے شمار نظریاتی اختلاف ہو سکتے ہیں، لیکن اس میں اردو کو کیوں گھسیڑ رہے ہو۔ ٹھیک ہے اردو پاکستان کی قومی زبان ہے لیکن اردو ہندوستان میں بھی بولی جاتی ہے اور یہ ان کی بھی زبان ہے، اس لئے اردو میری یا آپ کی جاگیر نہیں بلکہ یہ ہر اس انسان کی زبان ہے جو اسے پسند کرتا ہے۔
باقی آپ کو بتاتا چلوں کہ اب اردو والے انپیج کے محتاج نہیں۔ اب اردو میں ڈیسک ٹاپ پبلشنگ کئی اور سافٹ ویئر کے ذریعے ہو سکتی ہے البتہ ہم دوسری طرف نہ دیکھیں تو یہ علیحدہ بات ہے۔

سن 2010 میں جاکر حکومت (اور) لوگوں نے ونڈوز وسٹا اور سیون میں موجود اردو لکھنے کی سپورٹ اور فونٹس کی وجہ سے اردو بلاگز میں زیادہ دلچسپی دکھانی شروع کی۔ اسے سے پہلے کوئی بھی اردو ویب سائٹ دیکھنے کے لیے اس پر موجود فونٹ کو ڈاونلوڈ کرنا پڑتا تھا۔ بی بی سی اردو پہلی مقبول اردو ویب سائٹ بنی۔
حضرت زیادہ نہیں تو تھوڑی سی تحقیق کر لیتے۔ ایک طرف آپ کہہ رہے ہیں کہ 2010ء میں اردو لکھنے کی سپورٹ اور فانٹس کی وجہ سے اردو بلاگز میں دلچسپی دکھانی شروع کی، تو دوسری طرف کہتے ہیں کہ بی بی سی اردو پہلی مقبول اردو ویب سائیٹ بنی۔ کیا آپ جانتے ہیں کہ بی بی سی اردو کی ویب سائیٹ تو 2002ء میں شروع ہوئی تھی۔ یوں 2010ء والی بات سمجھ نہیں آتی۔
خیر آپ کو بتاتا چلو کہ 2010ء میں نہیں بلکہ بہت پہلے ہی ونڈوز ایکس پی میں اردو لکھنے اور فانٹس کی مکمل سہولت موجود تھی اور اردو ویب سائیٹ دیکھنے کے لئے کسی فانٹ کی ضرورت نہیں پڑتی تھی۔ اگر آپ کی مراد نستعلیق فانٹ ہے تو بھائی جان نستعلیق فانٹ تو وسٹا اور سیون میں بھی موجود نہیں، پھر آپ یہ سہرا وسٹا اور سیون کے سر کیوں سجا رہے ہیں؟ بلکہ یہ سہرا ونڈوز 8 کے سر سجائیے گا کیونکہ اس میں نستعلیق فانٹ آ رہا ہے۔۔۔ باقی اگر بات اردو بلاگنگ کی کی جائے تو عرض ہے کہ 2008ء سے تو میں بھی بلاگنگ کر رہا ہوں جبکہ کہا جاتا ہے کہ 2002ء میں عمیر سلام پہلا اردو بلاگر تھا۔ 2004ء سے تو اپنے خاور کھوکھر صاحب بھی بلاگنگ کر رہے ہیں۔ 2005ء میں اردو محفل (پہلی یونیکوڈ اردو فورم) کیا بنی پھر تو جیسے اردو بلاگنگ میں انقلاب آ گیا۔ آپ کو بتاتا چلوں کہ 2005ء میں ہی اردو سیارہ پہلا اردو بلاگ ایگریگیٹر بھی وجود میں آ چکا تھا۔ بھائی جی یہ کوئی قبل مسیح کی باتیں تو نہیں جو آپ تاریخ میں اتنی بڑی غلطیاں شامل کر رہے ہیں۔

انٹرنیٹ پر دنیا کی پہلی پانچ مقبول ترین زبانوں میں سے ایک کا ہندی چہرہ تو نظر آتا ہے، اردو نہیں۔ گوگل اور وکی پیڈیا جیسی سائٹس پر اردو ایک دو سال پہلے تک موجود نہیں تھی حالانکہ ایسی زبانیں موجود تھیں جنہیں ایک دو کروڑ سے بھی کم لوگ بولتے تھے۔ اب ورڈ میں اردو مل جاتی ہے، لیکن اردو ڈکشنری کے بغیر۔
ویسے تحریر میں یہاں تک پہنچنے تک میرے دماغ کی بتیاں بجنے لگ پڑیں تھیں کہ یہ بھائی صاحب آخر لکھ کیا رہے ہیں۔ خیر پانچ مقبول ترین زبانوں میں اگر اردو چہرہ نظر نہیں آتا تو اس کی سیدھی سی وجہ یہ ہے کہ ان چہروں کی تعداد کم ہے جو انٹرنیٹ پر اردو لکھنے کو فوقیت دیتے ہوں۔ گوگل پر ایک دو سال پہلے تک اردو نہیں تھی اگر اس سے مراد تلاش کے نتائج میں اردو کا کہہ رہے ہیں تو پھر عرض ہے کہ جس دن انٹرنیٹ پر یونیکوڈ اردو لکھی جانی شروع ہوئی اسی دن گوگل کی تلاش میں اردو شامل ہو گئی تھی۔ مزید آپ وکی پیڈیا پر اردو ایک دو سال پہلے تک موجود نہیں تھی کا کہتے ہو جبکہ ایسا نہیں تھا۔ اگر آپ قریب ترین ہوتے پھر بھی کوئی بات ہوتی لیکن آپ تو بہت فرق ڈال گئے۔ جناب وکی پیڈیا پر اردو 2004ء سے موجود ہے۔
ورڈ میں ڈکشنری سے مراد اگر یہ ہے کہ غلط الفاظ کی نشاندہی ورڈ خودبخود کر دے تو عرض ہے کہ ورڈ میں اردو ڈکشنری ”موجود“ ہے۔

باقی رہی بات معیاری اردو کی سند کے لئے اور دیگر الفاظ کے تراجم کے لئے ادارہ ہونا چاہئے تو میں اس بات پر آپ سے مکمل اتفاق کرتا ہوں۔ اب اصطلاحات کا ترجمہ کیا اور کس طرح ہونا چاہئے اس پر میں کچھ نہیں کہہ سکتا کیونکہ میں لسانیات کا ماہر نہیں اور یہ کام تو ماہرین کا ہے۔ بھائی صاحب آپ کی تحریر کے جواب میں میری اس تحریر کو اگر آپ پڑھیں تو برائے مہربانی غصہ نہ کیجئے گا۔ دراصل میں نے آپ کی تحریر میں جو غلطیاں دیکھیں سوچا ان کی نشاندہی کر دوں تاکہ لوگوں تک حقائق پہنچیں۔ یقیناً آپ اور میں ایک ہی کشتی کے سوار ہیں۔ آپ نے بھی اردو کی بہتری کے لئے تحریر لکھی ہے لیکن مجھے محسوس ہوا کہ جہاں جہاں غلطیاں ہیں ان کی مجھے نشاندہی ضرور کرنی چاہئے، سو کر دی۔ باقی اگر میں کسی جگہ غلطی پر ہوں تو امید کرتا ہوں کہ آپ اچھے انداز میں میری اصلاح ضرور کریں گے۔ آخری بات یہ کہ کمپیوٹر اور انٹرنیٹ پر اردو لکھنا اور پڑھنا کوئی مشکل نہیں بلکہ یہ بالکل انگریزی یا دیگر زبانوں کی طرح ہی ہے۔ عام صارفین کے لئے کمپیوٹر اور انٹرنیٹ پر اردو لکھنے اور پڑھنے کی مکمل سہولت موجود ہے، اس لئے بہتر یہ ہے کہ لوگوں کو اردو لکھنے کی طرف قائل کرو، نہ کہ مسائل کا انبار سنا کر لوگوں میں مایوسی پیدا کرو۔ ٹھیک ہے چند ایک مسائل کا حل ہونا ابھی باقی ہے لیکن اب اتنے بھی مسائل نہیں جن کا آپ نے ذکر کر دیا ہے، ویسے اگر کہیں مسئلہ ہے تو وہ ہماری سوچ کا ہے جو ہم اردو لکھنا پسند ہی نہیں کرتے۔ اس لئے لوگوں کے حوصلے بڑھاؤ اور اردو لکھنے اور پڑھنے کی طرف قائل کرو۔۔۔

اب دیکھئے اپنے ارد گرد کے حالات۔ ضرورت موجود ہے، حالات رستہ دیکھا رہے ہیں، ذہانت کے سمندر بہہ رہے ہیں لیکن کوئی خاص ایجاد نہیں۔ ضرورت ایجاد کی ماں ہے اور یہی ضرورت چیخ و پکار کر رہی ہے لیکن ہمارے اکثر نوجوانوں نے صرف جنسی تسکین کو ہی ضرورت سمجھا ہوا ہے اور اس ضرورت کے تحت دن بدن ”محبت“ کے نئے سے نئے ماڈل ایجاد کر رہے ہیں، جیسے موبائلی محبت، انٹرنیٹی محبت اور فیس بکی محبت وغیرہ۔ کئی نوجوان تو اس سے بھی ایک قدم آگے نکل چکے ہیں۔ ان نوجوانوں نے ”ضرورت“ کسی جنسِ مخالف کا نام سمجھ رکھا ہے اور اس ”ضرورت“ کے لئے دن رات ایک کرتے پھر رہے ہیں تاکہ ”کچھ“ ایجاد کر سکیں۔

المیہ تو یہ ہے کہ یہاں آپ کو موجد نہیں بلکہ جگہ جگہ عاشق ملیں گے۔ یہاں آپ کو سائنسی تحقیق تو نہیں البتہ لڑکی لڑکے کی دوستی کو جائز و ناجائز ثابت کرنے والی تقاریر ضرور ملیں گی۔ سب سے بڑھ کر یہاں آپ کو رہبر نہیں بلکہ نظام پر گفتگو کرتے نقاد ملیں گے۔ جو دو چار اپنے ہی جیسوں کے ”ٹاک شوز“ دیکھ کر تنقید پر تنقید کرتے پھر رہے ہیں۔ تنقید بھی ایسی کہ جس کا نتیجہ صرف اور صرف بحث برائے بحث ہے، کوئی تعمیر نہیں۔ جس تنقید کا نتیجہ حوصلہ شکنی کر رہا ہے نہ کہ کچھ کرنے کا جذبہ پیدا کرے۔ دوسری طرف ذہانت نے اپنا ایک شور مچایا ہوا کہ ”جی ہمیں کوئی رہبر نہیں مل رہا“۔ ذرہ ان کی ذہانت تو دیکھو، یہ چاہتے ہیں کہ ساری رات یہ موبائل پر گپیں لگاتے رہیں اور جب دن کو سکون سے سوئے ہوں تو آئن سٹائن آئے اور ان کے سرہانے لکھی لکھائی تیار شدہ تھیوری رکھ جائے۔ ارے خدا کے بندو! محنت کرو اور خود آئن سٹائن بنو نہ کہ شارٹ کٹ کے چکر میں سوتے رہو۔ حالات خود رہبر بنے تو ہوئے ہیں اور تمہیں بتا بھی رہے ہیں کہ اگر اپنی بقا چاہتے ہو تو ترقی کی طرف جاؤ۔

اب فیصلہ ہمیں کرنا ہے کہ ہم نے حالات کو رہبر بنا کر، ان سے سبق سیکھتے ہوئے، اپنی اصل ضرورت کے مطابق ایجادات کرنی ہیں یا پھر یونہی ہاتھ پر ہاتھ دھرے خواب غفلت میں رہنا ہے اور فضول کاموں کو اپنی ضرورتیں بنا کر اندھیروں میں سفر کرنا ہے۔ فیصلہ ہمارے ہاتھ میں ہے کہ ہم نے اپنا لیڈر آپ بننا ہے یا پھر مسیحا کا انتظار کرتے کرتے اپنی موت آپ مر جانا ہے۔

ایجادات سے مراد صرف سائنسی ایجادات ہی نہیں بلکہ یہ ایک اصطلاح استعمال کی ہے جس میں سائنسی ایجادات سے لے کر معاشی، معاشرتی اور ہر لحاظ سے ہونے والی بہتر تبدیلیاں ہیں۔ آپ جو جواور جتنا جتنا کر سکتے ہیں، خدا کے لئے وہ تو کریں۔ ہمارے اندر اخلاقیات بہت کم ہو چکی ہیں، اس وقت یہ بھی ہماری ایک ضرورت ہے۔ بہتر نظام لانے، بہتر لیڈر پیدا کرنے، بہتر ٹیکنالوجی بنانے اور بہترین معاشرہ تشکیل دینے جیسی ضرورتوں کی طرف بھی توجہ کرنی ہے۔ نوجوانوں! ”ضرورت ایجاد کی ماں ہے“ کا اصل فلسفہ سمجھو اور ”ضرورت کو بچے کی ماں“ نہ بناؤ۔ ٹھیک ہے ضرورت کے تحت بچے ”ایجاد“ کرنے پر توجہ بھی دیں اور یہ بھی ایک ”اہم“ ضرورت ہے لیکن ساتھ ساتھ یہ بھی تو دیکھیں کہ ہماری اور بھی بہت سی ضرورتیں ہیں اور ان ضرورتوں کے تحت اور بھی بہت کچھ ایجاد کرنا ہے۔

یہ تحریر کسی ایک صنف کے لئے نہیں بلکہ اس میں دونوں (لڑکے اور لڑکیوں ) کو مخاطب کیا ہے۔ بس کئی جگہ پر محاورے کے مطابق چلتے ہوئے صنف واضح ہو رہی ہے تو اس مراد ہرگز لڑکے یا لڑکیاں نہ لیا جائے بلکہ یہ سوچئے کہ دونوں اطراف میں یہ سب چل رہا ہے اور تالی دونوں ہاتھوں سے بجتی ہے۔

کافی عرصہ پہلے کی بات ہے کہ ایک دوست کا ایس ایم ایس موصول ہوا۔ ”کیا بات ہے کدھر غائب ہو، کوئی رابطہ ہی نہیں؟ بندہ کبھی کوئی ایس ایم ایس ہی کر دیتا ہے۔“
میں نے جواب دیا ”واقعی یار میں کچھ غائب غائب ہوں۔ کافی دوست شکایت کرتے ہیں۔ لگتا ہے میں غلطی پر ہوں۔ خیر میں کوشش کر رہا ہوں کہ دوستوں سے رابطے میں رہا کروں۔“
آگے سے جواب آیا ”آپ جذباتی نہ ہوں، میں نے تو بس ایسے ہی بات کر دی ہے۔“

زید نے کہا ”یار ملک کا نظام بہت بگڑ گیا ہے کسی کو تو آگے بڑھنا چاہئے۔ کسی کو تو احساس کرنا ہو گا۔“
بکر بولا ”یہ سب جذباتی باتیں ہیں۔ جب ٹھیک ہونا ہو گا ہو جائے گا۔“

کہیں بحث ہو رہی تھی۔ ایک کے پاس دلائل ختم ہوئے تو دوسرے کو بڑے آرام سے کہہ دیا کہ ”اب آپ جذباتی ہو رہے ہیں۔“

حد ہے یار۔ کوئی اپنی غلطی کا احساس کرے تو وہ جذباتی۔ کوئی بہتری کا احساس کرے تو وہ جذباتی۔ دلائل ختم ہو جائیں تو دوسرا جذباتی۔ آج کل ہمارے پاس اپنی غلطی تسلیم نہ کرنے، میں نہ مانو پر قائم رہنے اور بحث میں دوسرے کو نیچا دکھاتے ہوئے فرار کا آسان راستہ یہی ہے کہ کہہ دو ”آپ جذباتی ہو رہے ہو“۔ کسی پر اپنی بڑتری جتانی ہو، خود کو عقل کل بنانا ہو، کسی کا تمسخرا اڑانا ہو یا کہیں بھی فلسفی بننا ہو تو دوسرے کو کہہ دو ”آپ جذباتی ہو رہے ہیں“۔ ٹھیک ہے کئی لوگ بحث یا کسی دوسری گفتگو میں اتنے جذباتی ہو جاتے ہیں کہ موضوع سے ہٹ کر اِدھر اُدھر کی چھوڑنے لگ جاتے ہیں لیکن اگر کوئی بے شک جذبات میں ہی موضوع پر رہتے ہوئے دلائل دے تو پھر آپ کی بحث کا کمال تو تب ہو گا جب آپ اس کی ذات کو نشانہ نہ بناؤ اور اس کے جذبات میں دیئے گئے دلائل کو دلائل سے رد کرو۔ لیکن یہاں یہ ہوتا ہے کہ ایک بندہ دلائل سے بات کرتا ہے۔ جواب میں اِدھر اُدھر کی چھوڑی جاتی ہیں اور پھر آخر پر دلائل والے کو ”جذباتی“ ہونے کا کہہ کر فتح کا جھنڈا لہراتے پتلی گلی سے نکل جاتے ہیں۔ اگر کسی کی ساری باتیں واقعی بغیر دلائل کے صرف اور صرف جذباتی ہیں تو تب آپ اس کو ”آپ جذباتی ہو رہے ہیں“ کا کہہ سکتے ہیں لیکن اگر جذبات کے ساتھ ساتھ دلائل بھی ہیں تو پھر جواب میں جذباتی تقاریر کی بجائے دلائل دیں اور اس کی باتوں کو رد کریں۔ ویسے بھی دلائل کا جواب دلائل ہوتا ہے نہ کہ جذباتی تقاریر۔

جس طرح ہمارے معاشرے میں اس جملے (آپ جذباتی ہو رہے ہیں) کا استعمال ہو رہا ہے، اس سے تو یہی لگتا ہے کہ یہ ایک طعنہ، گالی یا بہت بڑا ہتھیار ہے۔ یہ ایک ایسا طعنہ ہے جو آپ کہیں بھی دے کر اگلے کو آگ لگا سکتے ہو۔ یہ ایک ایسا ہتھیار ہے جو آپ کسی بھی بحث میں استعمال کر کے بحث ختم کرتے ہوئے اپنی فتح کا جشن منا سکتے ہو۔اس ہتھیار کے استعمال کے بہت فوائد ہیں۔ ایک طرف آپ کو فتح ملتی ہے تو دوسری طرف دشمن کو ایسی جلن ہوتی ہے کہ اس کے چودہ طبق روشن ہو جاتے ہیں۔ ایک طرف یہ آپ کو شعور کی اعلیٰ منازل پر پہنچاتا ہوا ثابت کرتا ہے کہ آپ بہت بڑے فلاسفر ہو جو دشمن کے اندر تک اتر کر اس کے اس جذباتی پہلو کو سمجھ گئے ہو، تو دوسری طرف یہ آپ کے دشمن کو جاہل، جذباتی اور فضول ثابت کرتے ہوئے آپ کی فتح کے جھنڈے گاڑ دیتا ہے۔

آخر یہ جذبات اور جذباتی پن ہے کیا؟ کہیں ایسا تو نہیں کہ جذبات کی بھی کئی قسمیں اور کئی تعریفیں ہیں؟ ہم نے تو سنا تھا جذباتی ہونا اچھی بات ہے لیکن جذبات میں بہہ جانا ٹھیک نہیں۔ اب اس جذباتی اور پھر بہنے کی تعریف کون کرے گا؟ اس پر حدیں کون لگائے گا؟
میرے خیال میں کسی چیز کا احساس ہو تو جذبات ضرور پیدا ہوتے ہیں۔ جذبات تک آنا اچھا ہے۔ اس سے تھوڑا آگے ”جنون“ کی سرحد ہے اور آگے بڑھنا شدت ہے۔ شدت کسی کام میں بھی ٹھیک نہیں۔ مجھے لگتا ہے کہ بچوں سے پیار ہونا احساس ہے۔ اس پیار کے نتیجے میں پیدا ہونے والی کیفیت جذبات ہیں۔ دوسروں کے بچوں کے لئے یہ کم ہوتے ہیں اور اپنوں کے لئے زیادہ۔ انہیں احساس اور جذبات میں اتنا آگے نکل جانا کہ صرف اپنے بچے پیارے لگیں، اپنے بچوں کے پیار کا جنون ہے۔ مزید دوسروں کے بچوں سے نفرت ہو۔ یہ شدت پسندی کا نتیجہ ہے۔

احساس -> جذبات -> جنون -> شدت

کئی معاملات میں جنون تک پہنچنا غلط نہیں ہوتا لیکن یہ ایک ایسے پہاڑ کی چوٹی ہوتی ہے جہاں پر ہر وقت شدت کی اندھیر نگریوں میں گرنے کا خطرہ رہتا ہے۔یہ ایسی وادی ہے جس کی سرحد شدت سے لگتی ہے۔ اِدھر سرحد کے پاس گئے اُدھر شدت نے آپ کو اپنی طرف کھینچ لیا۔ اس لئے ایسے مقام پر خود کو بہت سنبھال کر رکھنا پڑتا ہے۔

میرے خیال میں ہم جس چیز کے لئے بولتے ہیں، وہ ہمارے احساسات کا نتیجہ ہوتا ہے۔اب اس چیز کے حق یا مخالفت میں بولنا ہمارے جذبات کا اظہار ہے۔ بحث میں ان جذبات کو درست ثابت کرنے کے لئے دلائل بہت ضروری ہوتے ہیں۔لیکن جذبات میں اتنا بہہ جانا کہ کسی کی سنے بغیر اپنے ہی جذبات کو ٹھیک کہنا جنون ہے۔ اور پھر بغیر سوچے سمجھے اور بغیر دلائل کے دوسروں کی باتیں رد کر دینا، شدت ہے اور یہی شدت ہر بحث کو تنقید برائے تنقید اور میں نا مانو تک لے جاتی ہے۔ میرے خیال میں انسان کے ہر کام میں احساسات اور جذبات ضرور ہوتے ہیں۔ جو میانہ روی اختیار کرتے ہیں وہ کامیاب ہوتے ہیں اور جو شدت اختیار کرتے ہیں بس پھر وہ بہتے چلے جاتے ہیں۔۔۔

گزشتہ سے پیوستہ

ساری باتوں کا خلاصہ یہ کہ سب سے پہلے معاشرے کی ترقی کے لئے مناسب زبان کا انتخاب کرنا ہے۔ جب ہم پاکستان کے لئے مناسب زبان کا انتخاب کرنے نکلتے ہیں تو ہم پر صاف واضح ہو جاتا ہے کہ ہماری ترقی کا سب سے پہلا راز ہماری قومی زبان اردو میں پوشیدہ ہے۔؟ ٹھیک ہے دنیا گلوبل ویلیج بن چکی ہے لیکن ساری ترقی یافتہ دنیا اس گلوبل ویلیج میں شامل ہوتے ہوئے عام طور پر اپنی ہی زبان اپناتی ہے۔ اس کے بعد جس بندے نے جس سطح تک جانا ہوتا ہے پھر اس کے مطابق وہ دیگر کوئی زبان یا انگریزی سیکھتا ہے۔ ساری ترقی یافتہ دنیا کے عام لوگ انٹرنیٹ پر بھی اپنی ہی زبان اپنائے ہوئے ہیں۔ انٹرنیٹ استعمال کرتے ہوئے اگر ابھی بھی ہمیں زیادہ تر انگریزی کا سہارا لینا پڑتا ہے تو اس میں قصور بھی ہمارا ہی ہے کیونکہ جتنا ہم اردو کو اپنائیں گے اتنی ہی انگریزی کی ضرورت دن بدن کم ہوتی جائے گی۔ جب ہم اردو اپنائیں گے تو ساری مشکلات آسان ہونا شروع ہو جائیں گی۔ ہمیں کسی بیگانی زبان کی وجہ عام لوگوں پر تعلیم کے راستے بند نہیں کرنے ہوں گے اور ایک انگریزی کی وجہ سے عام لوگوں کو آگے آنے سے نہیں روکنا ہو گا۔ جو جس بھی زبان میں لکھ کر، بول کر یا سوچ کر اپنا مدعا بیان کر سکتا ہے اسے اس کی اجازت دینی ہو گی۔ ہمیں اچھے لوگ سامنے لانے ہیں نہ کہ انگریزی بولنے والے لوگوں کو بڑے عہدوں پر بیٹھانا ہے۔ اس کے بعد عام بندے کو اگر مواد کسی دوسری زبان کا چاہئے تو مترجم کا استعمال کرے اور اگر زیادہ ضرورت ہو تو پھر جس کی جو زبان ضرورت ہو وہ سیکھے۔ ایک دفعہ پھر کہوں گا کہ کسی بھی معاشرے میں اپنی زبان کے علاوہ کوئی دوسری زبان سیکھنے کی ضرورت بہت کم لوگوں کو ہوتی ہے اس لئے ان تھوڑے لوگوں کو کوئی دوسری زبان سیکھانی چاہئے نہ کہ پوری کی پوری قوم پر بیگانی زبان ٹھونس کر ذہانت کا کباڑہ کر دیا جائے۔ ہمیں اس الٹی بہتی ہوئی گنگا کو سیدھا کرنا ہو گا اور ”انگریزیا“ کی بیماری سے بچنا ہو گا۔ ہم جغرافیائی لحاظ سے آزاد ہیں تو ہمیں اس ذہنی غلامی سے بھی آزادی حاصل کرنی ہو گی، تب کہیں جا کر اقوام عالم میں ہم بھی اپنی کوئی شناخت بنا پائیں گے۔ وقت کے ساتھ ساتھ بین الاقوامی سطح پر آنے والی زبانیں تو تبدیل ہوتی آئیں ہیں۔ پہلے عربی اور فارسی تھیں، اب انگریزی ہے تو کل کو کوئی اور ہو گی، اور وہ ”اردو“ بھی ہو سکتی ہے۔ ہو سکتا ہے آپ کو یہ ”دیوانے کا خواب لگے“ لیکن خواب دیکھنے کی آزادی تو دیجئے حضور؟ خیر ہر غالب قوم کی زبان خودبخود بین الاقوامی سطح پر آ جاتی ہے، لیکن دیگر قوموں کی اپنی محنت و تاریخ تو صدیوں پر محیط ہوتی ہے تو کیا کل کو کوئی دوسری زبان بین الاقوامی سطح پر آئے گی تو ہم اس کی طرف دوڑ لگا دیں گے؟ اور تب تک کی ہوئی ساری محنت، سارا ادب، ساری تاریخ چھوڑ کر نئی زبان سیکھنے چل پڑیں گے؟ خدارا ہوش کے ناخن لو اور دیکھو کہ زبانوں کی سطح تبدیل ہونے پر قومیں اپنی زبانیں نہیں بدلتیں بلکہ اپنی زبان کو اپنائے رکھتی ہیں، اپنا قیمتی ورثہ سنبھالے ترقی کرتی رہتیں ہیں۔
یاد دہانی کے لئے بتا دوں کہ مجھے انگریزی سے یا کسی بھی دوسری زبان سے کوئی دشمنی نہیں بلکہ میں نے وہ منطق آپ تک پہنچانے کی کوشش کی ہے جو میں سمجھتا ہوں کہ ہمارے لئے ترقی کا آسان ترین ذریعہ ثابت ہو سکتا ہے۔ ایک دفعہ اردو کو وہ مقام دے کر تو دیکھو، جس کی یہ مستحق ہے، پھر دیکھنا یہ زبان آپ کو کیسے دنوں میں عروج دیتی ہے۔ ہمارے نوجوانوں بہت ذہین ہیں، ایک دفعہ بیگانی زبان کی پابندی اٹھاؤ تو سہی پھر دیکھنا یہ کیسے ملک و قوم کے دن بدلتے ہیں۔

اردو ہماری قومی زبان ہے۔ گھر، بازار، دفتر اور ہر جگہ پر اس کا استعمال کرو۔ اپنی زبان کو اپناؤ اور خوشحال ہو جاؤ۔

گذشتہ سے پیوستہ

اگر کوئی جدید تحقیق یا کسی دوسرے علمی مقاصد کے لئے انگریزی سیکھے پھر بھی بات دل کو لگتی ہے لیکن مسئلہ یہ ہے کہ ہمارے ایک گروہ کو ”انگریزیا“ کی بیماری ہو چکی ہے۔ یہ بیمار اور غلام ذہن انگریزی کو اس لئے نہیں اپناتے کہ انہوں نے جدید تحقیق کرنی ہے بلکہ یہ لوگ انگریزی کو اعلیٰ مرتبے کی زبان سمجھتے ہیں یعنی ”سٹیٹس سمبل“۔ اور عام انسانوں سے خود کو اعلیٰ ثابت کرنے کے لئے اپنی اصل پہچان کھوتے ہوئے انگریزی کا سہارا لیتے ہیں۔ دراصل یہ ایسے لوگ ہیں جن کو پتہ ہی نہیں کہ وہ اس بیماری کی وجہ سے ”نہ گھر کے رہے نہ گھاٹ کے“۔ یہ ایسے لوگ ہیں جنہوں نے اپنی زبان اور رہن سہن ایک سوچی سمجھی سازش کے تحت عام پاکستانیوں سے جدا کر لیا ہے تاکہ یہ ہمارے لاشعور میں یہ بات بیٹھا سکیں کہ یہ انگریزیا والے اعلیٰ لوگ ہیں اور ہم عام عوام جاہل ہیں۔ بیماری ان لوگوں میں اتنی رچ چکی ہے کہ یہ لوگ ”انگریزیا“ کے غلام ہو چکے ہیں۔ یہ لوگ تو بیمار ہیں ہی لیکن ان کی وجہ سے یہ بیماری معاشرے میں سرطان کی طرح پھیلتی جا رہی ہے اور ہمارا مسئلہ یہ ہے کہ یہی بیمار اور غلام لوگ ہمارے سروں پر بیٹھے ہیں اور دن رات ”انگریزیا“ کا وائرس عام عوام تک پہنچا رہے ہیں بلکہ اس وائرس کے ٹیکے ہاتھ میں پکڑے ہر کسی کو ”ٹھوک“ رہے ہیں۔ کبھی آپ نے غور کیا کہ ان غلام لوگوں نے ہمیں اپنا غلام بنا رکھا ہے یعنی ہم غلاموں کے غلام بن کر رہ گئے ہیں۔ جیسے انگریز دور میں انگریزوں سے بات چیت کرنے کے لئے ان کی زبان سیکھنی پڑی تھی بالکل آج اسی طرح ان بیماروں نے ہمارے اوپر وہی نظام لاگو کر دیا ہے۔ پہلے ہم صرف انگریزوں کے غلام تھے لیکن اب مزید ذلت امیز غلامی کا طوق ہماری گردنوں میں ہے کیونکہ اب ہم انگریزوں کے غلاموں کے غلام بن چکے ہیں۔ انگریز سے آزادی لی تھی کہ ہم آسان زبان میں اور مکمل آزادی سے بات چیت کر لیں لیکن اب ان غلام ذہنوں کی وجہ سے ہم دن بدن رسوا ہو رہے ہیں۔ ہمیں اس بیماری سے بچنا ہے اور ساتھ ساتھ خود کو اور اپنی سوچ کو غلامی سے بچاتے ہوئے مکمل آزادی حاصل کرنی ہے۔ دوستوں اپنے دماغوں پر زیادہ زور نہ ڈالو! بس اتنا سوچو کہ پچھلے 64سال سے یہی انگریزیا کے بیمار لوگ ہمارے سیاہ و سفید کے مالک بنے ہوئے ہیں۔ ہمیں دن رات انگریزی کی خوراک دے رہے ہیں۔ اگر اس دوائی سے ہم نے ٹھیک ہونا ہوتا تو کب کے ہو چکے ہوتے۔ 64 سال تھوڑے نہیں ہوتے۔ خدارا اپنے آپ کو پہچانو، حقیقت کو پہچانو اور اس انگریزی کے سحر سے باہر نکلو۔ اپنی زبان اپناؤ، آسانی سے بات چیت کرو اور اتنی ہی آسانی سے ترقی کرو۔
اللہ تعالیٰ ہمارے معاشرے کے ان بیماروں کو صحت دے اور ساری قوم کو ”انگریزیا“ کے وائرس سے بچائے۔۔۔آمین

اگلا اور آخری حصہ :- ہمارے لئے اردو کیوں ضروری – خلاصہ

گذشتہ سے پیوستہ

کیسی عجیب بات ہے ہمارے ہاں عدالت فیصلہ ایک کسان کے لئے کرتی ہے لیکن فیصلہ لکھتی انگریزی میں ہے۔ قانون پاکستانیوں کے لئے ہے لیکن لکھا انگریزی میں جاتا ہے۔ انقلاب لانے والے بات غریبوں سے کرتے ہیں لیکن زبان پتہ نہیں کونسی استعمال کرتے ہیں۔ بات ثقافت کی ہوتی ہے لیکن جو زبان استعمال کی جاتی ہے وہی ثقافت کی دھجیاں اڑا رہی ہوتی ہے۔ اخبار اردو، اخبار پڑھنے والے اردو والے، اشتہارات اردو والوں کے لئے لیکن مجال ہے کوئی بھی یونیورسٹی اپنا اشتہار اردو میں دیتی ہو اور نہ ہی کسی کی ویب سائیٹ اردو میں ہے۔ ذہنی غلاموں نے ہمیں غلام اور ہمارے معاشرے کو ذہنی غلاموں کا جنجال پورہ بنا کر رکھ دیا ہے۔ کبھی آپ نے غور کیا طالب علم پاکستانی، ہڈیوں میں رچی قومی زبان اردو، نصاب انگریزی، لیکچر گلابی اردو (اردو+انگریزی) میں، طالب علم سوچتا اردو میں، امتحانات میں لکھتا انگریزی میں، طالب علم آپس میں بات چیت اردو میں کرتے، استاد سے سوال اردو میں کرتے، جواب اردو میں لیتے لیکن نصاب انگریزی۔ اوئے! یہ سب کیا ہے؟ یہ ذہنی غلاموں کا جنجال پورہ نہیں تو پھر مجھے بتاؤ اور اسے کیا کہوں؟ ہمارے ہاں پتہ نہیں کیوں ہر کام میں گنگا الٹی ہی بہتی ہے۔ آپ انٹرنیٹ پر دیکھ لیں باتیں انقلاب کی لیکن انگریزی میں، او خدا کے بندو! انہوں نے انقلاب نہیں لانا جن کو تم سنا رہے ہو بلکہ جس نے انقلاب لانا ہے وہ تو ایک عام پاکستانی ہے۔ اس تک پہنچو اور اس کی زبان میں بات کرو اور اسے سمجھاؤ، لیکن مجال ہے جو کوئی ”واقعی“ انقلاب لانے کے لئے عام انسان کی سطح پر آنے کو تیار ہو۔ یہ سب اعداد کے اور باتوں کے جادوگر ہیں، جن کا مقصد صرف یہ دیکھنا ہے کہ کتنے لوگوں نے انہیں یا ان کے صفحہ کو انٹرنیٹ پر پسند کیا، ذرا پسند کا معیار تو دیکھو، واہ سبحان اللہ۔ اِدھر آج پسند کا بٹن دبایا اُدھر کل یاد بھی نہیں تھا کہ کسی ”انقلابی“ کی آواز پر لبیک کہا تھا۔ اس میں عام بندے کا کوئی قصور نہیں بلکہ قصور تو اس ”انقلابی“ کا ہے جس نے سوچ تبدیل کرنے کے لئے عام بندے تک آنے کی کوشش ہی نہیں بلکہ انقلاب کے لئے اس کا انقلابی قدم یہ تھا کہ ”Plz Like my Page“۔ واہ رے انقلابی، صدقے جاؤں تیرے انقلاب پہ۔۔۔

بے شمار محکموں کا کام صرف عام عوام تک محدود ہے لیکن انہیں محکموں میں بھرتی کرتے ہوئے معیار انگریزی بنایا جاتا ہے۔ سی ایس ایس جیسے امتحان لیے جاتے ہیں اور بھرتی ہونے والے ”سول سرونٹ“ ہوتے ہیں۔ ایسے نوکر جنہوں نے خدمت ایسی عوام کی کرنی ہے، عام طور پر ایسی عوام سے ملنا اور مخاطب ہونا ہے، جو اردو سمجھتی ہے لیکن انہیں ”سول سرونٹ“ کو بھرتی کرنے کے لئے معیار انگریزی رکھا گیا ہے۔ یہ بات میری سمجھ سے باہر ہے کہ آخر سی ایس ایس جیسے امتحانات میں انگریزی پر اتنا زور کیوں دیا جاتا جبکہ اس امتحان کے نتیجے میں بھرتی ہونے والے تو عام عوام کے نوکر بننے جا رہے ہوتے ہیں۔ ٹھیک ہے کچھ نوکروں نے باہر کے ممالک میں پاکستان کی نمائندگی کرنی ہوتی ہے تو ایسے نوکروں کے لئے انگریزی لازمی رکھ لیں لیکن جنہوں نے پولیس جیسے محکموں میں جانا ہے جہاں پر سارا کام ہی عام عوام کے لئے کرنا ہے وہاں پر انگریزی کی اتنی کیا ضرورت ہے؟ قرضہ اور اس جیسے دیگر درخواست فارم وغیرہ ہوتے عام انسان کے لئے ہیں لیکن لکھے انگریزی میں ہوتے ہیں۔ کیا آپ کو نہیں لگتا کہ ایسا سب کچھ کر کے ہم چھوٹی چھوٹی اور بنیادی باتوں پر پاکستان کی سب سے بڑی تعداد کے لئے سیکھنے، سمجھنے اور اپنا مدعا بیان کرنے کے دروازے بند کر دیتے ہیں۔ پھر انہیں چیزوں کی آڑ میں ہم ہر ادارے میں ایجنٹ مافیا پیدا کرتے ہیں، بابو صاحب پیدا کرتے ہیں اور اچھی بھلی سوچ رکھنے والے کو صرف زبان کی وجہ سے جاہل بنا دیتے ہیں۔ کیا آپ کو نہیں لگتا کہ ہم نے اپنے نوجوان کو دو کشتیوں (اردو اور انگریزی) کا سوار کر رکھا ہے اور طالب علم کی آدھی محنت تو ایک بیگانی زبان سیکھانے میں ضائع کر دیتے ہیں۔

اگلا حصہ :- ”انگریزیا“ کی بیماری

گذشتہ سے پیوستہ

اس عنوان کا جواب صرف اتنا ہے کہ اپنی زبان، اپنی زبان اور بس اپنی ہی زبان میں ترقی کی۔
خدا کے بندو زیادہ نہیں بس تھوڑے سے تاریخ کے صفحات کا مطالعہ کرو۔ دیکھو یورپ کے اس تاریک دور کو جب انگریزی میں جدید مواد تھا ہی نہیں۔ تب کچھ بندوں نے اپنی ضرورت کے مواد کو فارسی، عربی اور دیگر زبانوں سے اپنی زبان میں منتقل کیا۔ عام عوام کو سیکھایا اور شعور دیا۔ عوام خوشحال ہونا شروع ہو گئی۔ آج وہ وقت ہے کہ کسی بھی زبان میں کوئی تحقیق آتی ہے وہ اسے فورا اپنی زبان میں منتقل کرتے ہیں کیونکہ وہ جانتے ہیں کہ پوری عوام کو نئی زبان سیکھانے سے بہتر ہے کہ چند لوگ مترجم بن جائیں اور اپنی عوام کو اسی کی زبان میں مواد فراہم کریں تاکہ جتنی محنت نئی زبان سیکھنے پر کرنی ہے اتنی کسی اور کام میں کر کے مزید ترقی کی جائے۔ کئی لوگ کہتے ہیں کہ وہ اور دور تھا جبکہ آج کچھ اور حالات ہیں۔ آج دنیا گلوبل ویلیج بن چکی ہے۔ لوگ بالکل ٹھیک کہتے ہیں واقعی وہ دور اور تھا اور یہ دور اور ہے، تب حالات اور تھے اور آج اور ہیں۔ تب مواد کم تھا تو انسان ترجمہ کر لیتے تھے۔ واہ کیا خوب منطق ہے۔ یہ منطق دیتے ہوئے ہم یہ کیوں بھول جاتے ہیں کہ آج مواد زیادہ ہے تو اس کے لئے آج ہمارے پاس وسائل بھی تو زیادہ ہیں۔ اب تو وہ وقت آ چکا ہے جب کمپیوٹر کے سامنے کتاب رکھو وہ خود ہی تراجم کرے گا۔ ہارڈ کاپی کو سافٹ کاپی میں منتقل کرے گا اور نا جانے کیا کیا خودبخود کر دے گا۔ اگر اردو جدید ٹیکنالوجی میں اس مقام پر نہیں پہنچی جہاں دیگر زبانیں ہیں تو اس میں اردو کا کوئی قصور نہیں، یہ ہماری ہی نالائقی ہے۔ مزید یہ کہ گلوبل ویلیج کا راگ الاپنے والے جن کو انگریزی کا بخار چڑھا ہوا ہے۔ جنہوں نے کنویں سے باہر دیکھا ہی نہیں کہ ساری ترقی یافتہ دنیا اپنی اپنی زبانوں کو اپنائے ہوئے مزید ترقی کر رہی ہے۔ اگر انگریزی کے بغیر ترقی ممکن نہیں تھی تو پھر انہوں نے کیسے ترقی کر لی؟ دنیا گلوبل ویلیج بن چکی ہے تو پھر گوگل اور اس جیسی کئی ایک کمپنیاں انگریزی کے علاوہ دیگر زبانوں میں کیوں موجود ہیں۔ وہ ”صرف“ اس گلوبل ویلیج کی زبان کو ہی کیوں نہیں اپناتیں؟ دیگر زبانوں میں اپنی ویب سائیٹیں اور دیگر مواد کیوں فراہم کرتیں ہیں؟ اس کا جواب صرف اتنا ہے کہ وہ کمپنیاں جانتی ہیں کہ ترقی یافتہ لوگ صرف اپنی زبان میں ترقی کرکے یہاں پہنچے ہیں اور وہ کبھی اپنی زبان نہیں چھوڑیں گے۔ ویسے بھی گلوبل ویلیج کی زبان انگریزی والی بات سرے سے ہی غلط ہے۔ بے شک دنیا گلوبل ویلیج بن چکی ہے لیکن اس گلوبل ویلیج کی کوئی ایک زبان نہیں بلکہ اتنی ہی زبانیں ہیں جتنی زبانوں والے لوگ اس میں شامل ہیں۔ کبھی آپ نے غور کیا ساری ترقی یافتہ دنیا اپنی کاغذی کاروائی اپنی زبان میں کرتی ہے۔ دیارِغیر جانے والے لوگوں کو اس بات کا اندازہ ہو گا کہ ویزا کے جو کاغذات باہر سے آتے ہیں وہ اس ملک کی اپنی زبان میں ہوتے ہیں۔ اس کے علاوہ باہر جانے والے کو اپنی اسناد اور دیگر کاغذات بھی اس ملک کی ہی زبان میں منتقل کروانے ہوتے ہیں۔ اگر انگریزی اتنی ہی اہم ہے تو وہ ملک پاگل ہیں جو آپ سے آپ کے کاغذات اپنی زبان میں مانگتے ہیں؟ وہی قومیں ترقی کرتی ہیں جو اپنے کام اپنی زبان میں کرتی ہیں اور صرف نہایت ہی مجبوری میں دوسری کسی زبان کا سہارا لیتی ہیں، کیونکہ سمجھدار قومیں دو کشتیوں کی سوار نہیں بنتیں بلکہ ایک کشتی میں بیٹھتی ہیں اور منزل کی جانب رواں دواں رہتی ہیں۔

اگلا حصہ :- ہمارے ذہنی غلاموں کا جنجال پورہ

گذشتہ سے پیوستہ

انگریزی ہم پر ٹھونسنے کے حق میں یار لوگوں کے پاس سب سے بڑے دلائل یہ ہیں کہ دنیا گلوبل ویلیج بن چکی ہے اور اس گلوبل ویلیج کی زبان انگریزی ہے۔ انگریزی ایک بین الاقوامی اور علم کی زبان ہے۔ دنیا کا زیادہ تر جدید علم انگریزی میں ہے۔ جدید تحقیق انگریزی میں ہی مل سکتی ہے۔ چلیں یار لوگوں کے یہ دلائل ہم خود مان لیتے ہیں لیکن سوال تو یہ ہے کہ یہ دلائل ہم پر یا کسی بھی قوم پر لاگو کیسے ہو سکتے ہیں؟ سب سے پہلے تو یہ بات دیکھیں کہ کسی قوم (ترقی یافتہ+ترقی پذیر) کی کتنی تعداد اس سطح تک پہنچتی ہے جہاں وہ اس گلوبل ویلیج کا حصہ بنتے ہوئے گلوبل ویلیج کی زبان اپناتی ہے؟ ٹھیک ہے دنیا گلوبل ویلیج میں شامل ہوتی ہے لیکن ساری ترقی یافتہ دنیا شامل ہوتے ہوئے عام طور پر اپنی زبان اپناتی ہے۔ اس کے بعد جس بندے نے جس سطح تک جانا ہوتا ہے پھر اس کے مطابق وہ دیگر کوئی زبان یا انگریزی سیکھتا ہے۔ ساری ترقی یافتہ دنیا کے عام لوگ انٹرنیٹ پر بھی اپنی ہی زبان اپنائے ہوئے ہیں۔ انٹرنیٹ استعمال کرتے ہوئے اگر ابھی بھی ہمیں زیادہ تر انگریزی کا سہارا لینا پڑتا ہے تو اس میں قصور بھی ہمارا ہی ہے کیونکہ جتنا ہم اردو کو اپنائیں گے اتنی ہی انگریزی کی ضرورت دن بدن کم ہوتی جائے گی۔ ویسے اس گلوبل ویلیج کی زبان کا فارمولا ہم پر ہی کیوں لاگو ہوتا ہے؟ یہ گلوبل ویلیج کے بالکل مرکز میں رہنے والے، جرمنی، فرانس، سپین اور پورے یورپ وغیرہ پر کیوں نہیں ہوتا؟ یہ انگریزی ہمارے لئے ہی اتنی کیوں ضروری ہے، یہ چین اور جاپان کے لئے اتنی ضروری کیوں نہیں؟

دوسری بات یہ کہ پاکستانیوں کی کتنی تعداد ہے جسےبین الاقوامی سطح تک جا کر علم کے حصول کے لئے انگریزی اپنانی پڑتی ہے؟ آخر پاکستان میں کتنے لوگ ہیں جنہیں جدید تحقیق جاننے کی ضرورت ہوتی ہے؟ ٹھیک ہے ابھی ہمارے درمیان ایسی تعداد بہت ہی کم ہے لیکن ہم ترقی کر بھی جائیں تو تب بھی ساری قوم نے اس بین الاقوامی سطح تک نہیں پہنچنا ہوتا بلکہ آپ دیکھ لیں ترقی یافتہ ممالک میں بھی ایسی بین الاقوامی سطح پر چند گنے چنے لوگ ہی ہوتے ہیں، جنہیں بین الاقومی یا دیگر کوئی زبان سیکھنا ضروری ہوتی ہے۔ آخر کسی قوم میں ایسے کتنے محقق ہوتے ہیں جنہوں نے بین الاقوامی سطح پر پہنچنا ہوتا ہے؟ چلیں اگر آپ کو اعتراض ہے تو مان لیتے ہیں کہ یہ تعداد گنی چنی نہیں ہوتی بلکہ زیادہ ہوتی ہے، تو پھر آپ خود اندازہ لگا لیں کہ ایک لاکھ، ایک کروڑ اور ایک قوم میں یہ تعداد کتنی ہوتی ہے؟ اس اندازے کے بعد بھی آپ دیکھیں گے کہ یہ تعداد آٹے میں نمک کے برابر ہی ہوتی ہے۔ وہ لوگ جنہوں نے بین الاقوامی سطح تک جا کر کام کرنا ہے وہ سیکھیں یا انہیں سیکھاؤ بین الاقوامی زبان۔ اب چند لوگوں کو بین الاقوامی سطح پر لانے کے لئے پوری عوام کو انگریزی سیکھانا بہتر ہے یا پھر جو اس سطح تک پہنچے صرف وہ سیکھ لے۔ صرف بیمار کو دوائی دی جاتی ہے۔ باقی جنہوں نے اپنی زندگی پاکستان سے شروع کرنی ہے اور یہیں پر کام کاج کرتے گزار دینی ہے ان تندرستوں کو صبح شام انگریزی کی خوراک دے کر الٹا بیمار کیا جا رہا ہے۔ آخر ہم انگریزی کو بنیاد بناکر کئی لوگوں پر بنیادی علم کے دروازے کیوں بند کر دیتے ہیں؟ ہم بین الاقوامی جدید تحقیق کی زبان کا کہہ کر بے شمار پاکستانیوں پر علم کے راستے بند کر دیتے ہیں۔ ہم کسی دوسری زبان کو معیار بناتے ہوئے کئی لائق لوگوں کو آگے آنے سے روک دیتے ہیں۔ تھوڑی سی تحقیق کریں تو خود جان جائیں گے کہ اس انگریزی کی وجہ سے ہمارے کتنے ہی لوگ انٹرمیڈیٹ اور بی۔اے نہیں کر پاتے۔ کبھی کسی یونیورسٹی کے نتائج دیکھیئے گا اور پھر انگریزی میں فیل ہونے والے آرٹس کے طلبہ کو شمار کریں اور ساتھ ساتھ دیکھیں کہ ایسے طلبہ نے دیگر مضامین میں جو اردو میں ہیں ان میں کیا کارکردگی دیکھائی ہے؟ پھر خود ہی جان جائیں گے کہ ایسے بے شمار طلبہ ہیں جو دیگر مضامین میں بڑے اچھے ہوتے ہیں، وہ اچھے اور دیانت دار سکالر، منتظم، سیاست دان، استاد، جرنیل،صحافی وغیرہ بن سکتے ہیں، خدا نے ان کو کسی نہ کسی خاص شعبے کی اعلیٰ خصوصیات پیدائشی طور پر دی ہوتی ہیں لیکن یہ ایک انگریزی ان کا کباڑہ کر دیتی ہے۔ پھر وہی اعلیٰ خصوصیات رکھنے والے ہمیں دکانوں پر کام کرتے اور ریڑھیاں چلاتے نظر آتے ہیں۔ اس ایک بیگانی زبان کی وجہ سے ہم ذہانت کا کباڑہ کر کے رکھ دیتے ہیں۔ ساری دنیا اس چھوٹی اور آسان بات کو سمجھ چکی ہے اور اپنی اپنی زبان اپناتے ہوئے دن بدن ترقی کر رہی ہے لیکن ہماری غلامانہ سوچ سے بھری کھوپڑی کو اتنی چھوٹی سی بات سمجھ نہیں آ رہی کہ کسی قوم کی ترقی اس کی اپنی زبان میں پوشیدہ ہوتی ہے۔

ایک دفعہ پھر کہوں گا کہ جس کو انگریزی کی ضرورت ہے اسے سیکھاؤ اور جو اپنا لوہا اپنی زبان اردو میں منوا سکتا ہے اس پر علم کے دروازے بند نہ کرو۔ جو بندہ ایک اچھا بیوروکریٹ بن کر ملک و قوم کی خدمت کر سکتا ہے، جو بندہ اچھا جرنیل بن کر اچھا دفاع کر سکتا ہے، جو ایک اچھا استاد بن کر قوم کی تربیت کر سکتا ہے انہیں اس ایک انگریزی کی وجہ سے نہ روکو بلکہ ان کی قدرتی صلاحیت کو بروئے کار لاؤ اور ترقی کی راہ پر چلو۔ جس نے بین الاقوامی سطح تک پہنچنا ہے یا جنہیں انگریزی کی ضرورت ہے صرف وہ سیکھیں یا سیکھاؤں۔ ویسے بھی جو بین الاقوامی سطح تک پہنچنے کے قابل ہوتا ہے اسے انگریزی یا دیگر کوئی بھی زبان سیکھنے میں مسئلہ بھی نہیں ہوتا کیونکہ وہ ہے ہی قابل۔ فرض کریں کہ وہ قابل تو ہے لیکن زبان سیکھنے کے معاملے میں تھوڑا کند ذہن ہے تو پھر بھی اسے کوئی مسئلہ نہیں ہو گا کیونکہ وہ ایسی سطح پر ہوتا ہے جہاں مترجم ملنے کوئی بڑی بات نہیں ہوتی۔ خدارا ہوش کرو اور اس ایک انگریزی کی وجہ سے ایک عام آدمی کو دیوار سے مت لگاؤ۔

اگلا حصہ :- قوموں نے ترقی کس زبان میں کی؟

گذشتہ سے پیوستہ

اگر بات پاکستان کی کریں تو پھر علاقائی زبانیں بہت پیچھے رہ جاتی ہیں اور دیکھنا یہ ہے کہ اس عوام کی زیادہ تعداد کو بات سمجھانے کے لئے کس زبان کا سہارا لینا پڑے گا؟ وہ کونسی زبان ہے جو پاکستانی سب سے زیادہ آسانی سے بول، لکھ، پڑھ اور سمجھ سکتے ہیں؟ آخر ایسی کونسی زبان ہے جو پورے پاکستان کی نمائندگی کر سکتی ہے؟ ایسے میں صرف ایک ہی زبان سامنے آتی ہے اور وہ ہے ہماری قومی زبان ”اردو“۔ اردو ہی پاکستان کی وہ زبان ہے جو کئی ایک زبانیں بولنے والے پاکستانیوں کو ایک دوسرے سے جوڑتی ہے۔ پاکستان کے کسی بھی علاقہ میں جائیں، جہاں آپ کو مقامی زبان نہ آتی ہو تو اس کے بعد اگر کوئی زبان آپ کا ساتھ دے سکتی ہے تو وہ اردو ہی ہے۔ چھوٹی سی اور آسان بات یہی ہے کہ ”اردو“ ہی وہ واحد زبان ہے جو ہم پاکستان میں نگری نگری گھومتے ہوئے ساتھ لے کر چل سکتے ہیں۔ اگر ہمیں معاشرے میں تبدیلی لانی ہے اور تعلیم عام کرنی ہے تاکہ زیادہ سے زیادہ بچے سکولوں میں جائیں اور پھر اعلیٰ تعلیم تک پہنچے تو ہمیں ”اردو“ کا ہی سہارا لینا پڑے گا۔ جیسے دستانہ پہن کر کسی چیز کو چھونے کا احساس اتنا اچھا نہیں ہوتا جتنا ننگے ہاتھوں چھو کرہوتا ہے، بالکل ایسے ہی اگر ہم کسی دوسری زبان کا غلاف چڑھا کر کوئی بات سمجھنے کی کوشش کریں گے، تو وہ اتنی اچھی نہیں سمجھ سکیں گے، جتنی اپنی زبان اردو میں سمجھ سکتے ہیں۔ ہم مانیں یا نہ مانیں لیکن ”اردو“ ہی ہر میدان میں ہمارا ساتھ دے سکتی ہے اور ہمیں ترقی کی طرف لے جا سکتی ہے۔

کچھ لوگ کہتے ہیں کہ جب اردو کو قومی زبان کا درجہ دیا گیا تب اردو سمجھنے والوں کی تعداد بہت کم تھی۔ لمحہ بھر کے لئے ایسا مان بھی لیا جائے تو سوال یہ نہیں کہ تب کیا حالات تھے بلکہ سوال تو یہ ہے کہ اب کیا حالات ہیں اور ان حالات میں کونسی زبان ہمارا ساتھ دے سکتی ہے؟ ہم مانتے ہیں کہ پاکستان کے ابھی بھی کچھ علاقے ایسے ہیں جہاں پر لوگ اردو نہیں سمجھتے لیکن غور کریں تو پتہ چلتا ہے کہ اردو نہ سمجھنے والے لوگوں کی تعداد آٹے میں نمک کے برابر ہے۔ مزے کی بات تو یہ ہے کہ جو زبان (انگریزی) ہم پر ٹھونسی جا رہی ہے اس کو سمجھنے والے لوگوں کی تعداد اردو سمجھنے والے لوگوں کے مقابلے میں آٹے میں نمک کے برابر ہے۔ ایک خاص طبقے کی غلامانہ سوچ کو لے کر ہم پاکستانیوں کی بہت بڑی تعداد پر علم کے راستے بند نہیں کر سکتے۔ کبھی اپنے تعلیمی نظام پر غور کریں اور کچھ اعداد وشمار اکٹھے کریں تو یہ بات کھل کر سامنے آتی ہے کہ ایسے بچے جو تعلیم ادھوری چھوڑ جاتے ہیں جہاں ان کی کئی دوسری وجوہات ہے وہاں پر سب سے بڑی وجہ بچے کو انگریزی سیکھنے میں مسئلہ ہے۔ اس بات کو لے کر اب آپ شہروں تک محدود نہ رہیئے گا، کبھی اس تقریباً 65 فیصد دیہاتی آبادی پر بھی نظر دوڑائیے گا جن کا بچہ اردو تختی فرافر لکھتا ہے لیکن انگریزی رٹے لگانے سے بھی اس کے دماغ میں نہیں بیٹھتی۔ شاید ہی کوئی بچہ ہو جسے اردو سیکھنے میں انگریزی سے زیادہ مشکل پیش آتی ہو بلکہ عام طور پر پاکستان میں ایک ان پڑھ بندہ چاہے اردو ٹھیک بول نہ سکے لیکن اردو سمجھ ضرور جائے گا۔ اگر آپ کہیں کہ شہروں میں بھی ایسے علاقے ہیں جہاں لوگ بے شک انگریزی بول نہ سکیں لیکن سمجھ ضرور جائیں گے تو عرض پھر وہی ہے کہ ایسی تعداد اردو کے مقابلے میں آٹے میں نمک کے برابر ہے۔

گو کہ کسی غیر پاکستانی کے لئے اردو کی نسبت انگریزی سیکھنا آسان ہے لیکن ہمارے معاشرے میں اردو کے علاوہ جو زبانیں موجود ہیں وہی زبانیں ہمیں اردو سیکھنے میں زیادہ آسانی فراہم کرتی ہیں۔ اس کے علاوہ صدیوں سے رائج ہمارا نظام، تاریخ اور رہن سہن بھی اردو سیکھنے کی سہولت دیتا ہے جبکہ انگریزی سیکھنا ہمارے لئے اردو کی نسبت مشکل ہے۔ کچھ لوگ اس بات کو یہ کہہ کر رد کرتے ہیں کہ اردو کی تعلیم ہم نے شروع دن سے دینی شروع کر دی تھی لیکن انگریزی کی تعلیم نہیں دی تھی اس وجہ سے اردو ہماری ہڈیوں تک میں رچ گئی ہے۔ جبکہ میں اس انگریزی کی تعلیم نہ دینے والی بات کو نہیں مانتا کیونکہ شروع دن سے ہی انگریزی کی بھی تعلیم دی جا رہی ہے، بلکہ انگریزی کی تعلیم تو اردو کے مقابلے میں زیادہ زور و شور سے دی جارہی ہے لیکن پھر بھی ناکامی ہی ہوئی ہے۔ اردو جو ہمارے اندر تک اتر چکی ہے اس کے پیچھے صدیوں کی کہانیاں ہیں۔ اب بھی اگر ہم اردو کو مکمل چھوڑ کر اس کی جگہ انگریزی کو لاتے ہیں تو 64 سال پہلے ضائع کر چکے ہیں اور ابھی ہمیں کم از کم 50 سال اور لگانے ہوں گے، تب کہیں جا کر انگریزی ہمارے درمیان اس جگہ پہنچنے کے ”قریب“ ہو گی جہاں آج اردو ہے۔ 64 سال کے تجربات سے سیکھ کر ابھی بھی ہم اپنا قبلہ درست کر لیں تو تب بھی ہمارے مزید کئی سال ضائع ہونے سے بچ سکتے ہیں۔ مادری اور ہڈیوں میں رچی زبان کی جگہ نئی زبان لانے کے لئے دن، مہینے یا سال درکار نہیں ہوتے بلکہ اس کے لئے صدیاں لگتی ہیں۔ صدیوں بعد نئی زبان آ تو جاتی ہے لیکن قوم اپنی شناخت کھو چکی ہوتی ہے۔ جب تک نئی زبان ٹھیک طرح پہلی زبان کی جگہ نہیں لے لیتی تب تک قومیں اندھیروں میں ہی بھٹکتی رہتی ہیں۔ صدیوں تک اندھیروں میں بھٹکنے سے بہتر یہی ہوتا ہے کہ اپنی زبان کو ہی اپنایا جائے اور فوری ترقی کی جائے۔

اگلا حصہ :- گلوبل ویلیج، بین الاقوامی زبان اور پاکستان

سب سے پہلے ایک بات واضح کر دوں کہ مجھے انگریزی یا کسی دوسری زبان سے کوئی دشمنی نہیں اور نہ ہی میں زبانوں سے دشمنیاں رکھنے کا قائل ہوں۔ بلکہ میں تو کہتا ہوں جس کا جو زبان سیکھنے کو دل کرتا ہے وہ سیکھے لیکن کم از کم ہم پر تو کوئی دوسری زبان نہ ٹھونسے ۔ میرا مقصد صرف اتنا ہے کہ اس بات کی وضاحت کر سکوں کہ آخر وہ کونسی زبان ہے جو ہمارے لئے سب سے زیادہ آسانیاں پیدا کرتی ہے اور ہماری ترقی کے لئے سب سے زیادہ مدد گار ثابت ہو سکتی ہے؟

کسی معاشرے کے لئے زبان کا انتخاب

جہاں معاشرہ زوال کا شکار ہو وہاں پر لوگوں کو نئی زبانیں نہیں سیکھائی جاتی بلکہ پہلے سے موجود زبان میں ہی تبادلہ خیال کیا جاتا ہے۔ جہاں تکنیکی کام رکے ہوں وہاں یہ نہیں کیا جاتا کہ پہلے دوسری زبان سیکھاؤ پھر ”ڈگری والے انجینئر“ بناؤ اور پھر ان سے کام لو بلکہ پہلے سے موجود زبان میں ہی دیسی انجینئر (مستری) بنائے جاتے ہیں اور ان سے کام لے کر ملک کو ترقی کی رہ پر گامزن کیا جاتا ہے۔ جہاں کسان ہل چلانا بھول گیا ہو وہاں پہلے اسے نئی زبان نہیں سیکھائی جاتی بلکہ فوری طور پر اس کو اسی کی زبان میں ہی ہل چلانے کی ترغیب و تربیت دی جاتی ہے تاکہ فوری اناج پیدا ہو اور انسان بھوکے نہ مریں۔ جہاں تعلیم کا فقدان ہو وہاں پر نئی زبان نہیں سیکھائی جاتی بلکہ پہلے سے موجود زبان میں ہی تعلیم دی جاتی ہے اور اگر تعلیمی مواد کسی دوسری زبان میں ہو تو پوری عوام کو نئی زبان سیکھانے سے کئی گنا آسان ہے کہ تعلیمی مواد کا اپنی زبان میں ترجمہ کیا جائے کیونکہ کوئی بھی انسان کوئی بھی بات جتنی اچھی اپنی مادری اور قومی زبان میں سمجھ سکتا ہے اتنی کسی دوسری زبان میں نہیں سمجھ سکتا۔ پتہ نہیں یار لوگوں کو اتنی چھوٹی سی بات سمجھ میں کیوں نہیں آتی۔ اگر میری بات پر یقین نہ آئے تو تاریخ کھول کر دیکھیں، سب سمجھ جائیں گے کہ جس قوم نے بھی ترقی کی وہ اپنی ہی زبان میں کی، نہ کہ کسی دوسری زبان میں۔ فرانس اور پورے یورپ نے کس کی زبان میں ترقی کی؟ جاپانی کس کی زبان میں اپنے بچوں کو تعلیم دیتے ہیں؟ چین کس زبان کے بل پر ترقی کر رہا ہے؟ اور تو اور خود برطانیہ اور امریکہ نے ترقی کے لئے کس کی زبان اپنائی؟ یہ ایسے سوال ہیں جن کا جواب ڈھونڈنے چلیں تو ہم پر کئی راز کھلتے ہیں۔

جہاں انسانوں کی سوچ میں بگاڑ پیدا ہو جائے تو اس ہجوم کو قوم میں تبدیل کرنے کے لئے سب سے پہلے انہیں کی زبان میں بات کر کے ان کی سوچ تبدیل کرنی پڑتی ہے نہ کہ پہلے انہیں کوئی نئی زبان سیکھاؤ اور پھر بات کرو۔ جہاں بھی معاشرہ زوال کا شکار ہو وہاں پر اسے ترقی کی راہ پر ڈالنے کے لئے کئی تبدیلیاں کرنی پڑتی ہیں اور سب سے پہلی تبدیلی اس معاشرے کی سوچ میں کرنی ہوتی ہے۔ سوچ کی تبدیلی کے بعد چاہے خونی انقلاب برپا ہو یا فکری انقلاب لیکن سب سے پہلی شرط سوچ کی تبدیلی ہے۔ سوچ کی تبدیلی کے لئے معاشرے کے ہر فرد تک اپنی آواز پہنچانی پڑتی ہے۔ اب اتنے بڑے ہجوم کے ہر ہر فرد کو علیحدہ علیحدہ کئی ایک زبانوں میں بات سمجھنا ممکن نہیں ہوتا۔ اس لئے آواز پہنچانے کے لئے کسی ایسی زبان کا سہارا لینا پڑتا ہے جو ہجوم کی زیادہ تعداد جانتی ہو۔ یعنی سوچ کی تبدیلی کے لئے اپنا پیغام کسی تک پہنچانے کے لئے سب سے پہلی شرط زبان کا انتخاب ہی ہے۔ کسی قوم کی ترقی کی پہلی شرط ہی یہ ہے کہ وہ اپنے لئے کسی مناسب زبان کا انتخاب کرے۔

اگلا حصہ :- پاکستان کی ترقی کا راز اردو میں پوشیدہ